मत्ती 14
14
यहूना बपतिस्मा दिनवाला कि हत्या
(मरकुस 6:14-29; लूका 9:7-9)
1जब हेरोदेस राजा ले उन कामून की चर्चा सुणिछ्य, जो यीशु करून मरेछ्या, 2और ले अपून सेवकून थैं क्योछ, “यो यहूना बपतिस्मा दिनवालो छै! उ मरिना में भटे ज्यूनो है ग्योछ, येक कारण यीशु में इसा चमत्कारा का काम करना की सामर्थ प्रगट हुन मर्यान।”
3-4किलैकी राजा हेरोदेस ले कुछ बखत पैलि अपून भाई फिलिप्पुस की घरवाली हेरोदियास का दगाड़ ब्या कर लीछ, यो बात में यहूना ले राजा स डाटछ्य, येक कारण यहूना ले राजा हेरोदेस थैं क्योछ, “मूसा का नियम अनुसार तैंस अपून भाई का घरवाली का दगाड़ ब्या करून ठीक नाहातिन।” तो हेरोदेस राजा ले सिपाईन भेजभेरन यहूना स पकड़वा भेरन जेल खान में डाल दीछ। 5और उ ऊस मार डालून चाँछ्यो, लेकिन लोगून भटे डरछ्यो किलैकी उन ऊस परमेश्वरो को संदेश दिनवाला मानछ्या।
6लेकिन जब राजा हेरोदेस को जन्मदिन आछ, त हेरोदियास की चेलि ले उत्सव में मेहमानू का सामुनि नाच दिखाभेरन राजा हेरोदेस स खुश करछ्य। 7येक कारण तब राजा हेरोदेस ले उथैं कसम खाभेरन वादा करछ्य, “कि तैं जो कुछ ले मांगलि मैं द्यूलो।” 8उ ईजा ऊस पैलि भटे सिखा राँछ्यो, येक कारण उ कुंछी, “यहूना बपतिस्मा दिनवालो को खोरो कटवा भेरन थाली में याँई मंगवा दे।” 9यो सुणिभेरन राजा भौत दुखी हुछो, लेकिन अपून वादा और दगाड़ में बैठिना का वालान कारण उकी माँग स मना नी कर सक्यो, और हुकुम दीछ, कि यहूना खोरो येस दी, दी जौ। 10तब राजा ले तुरन्त सिपाईन स हुकुम दीछ, कि यहूना खोरो कटवा दीछ। 11और उले जेल खान में जाभेरन यहूना का खोरो काटिभेरन एक थाली में राखभेरन चेलि स दीछो, और उ अपून ईजा पास लिजाछी। 12यो खबर सुणिभेरन यहूना का शिष्यून आयान, उकी लाश स ली ग्यान, और ऊस दफना दीछ और जाभेरन यीशु बताछ।
पाँच हजार आदिमीन खिलून
(मरकुस 6:30-44; लूका 9:10-17; यहूना 6:1-14)
13जब यीशु ले यो सुणछ्य, त नाव में चढ़भेरन उ वाँ भटे एकान्त जाग में न्हैजाछो। और लोग यो सुणिभेरन नगर-नगर भटे पैदल उक पछिल उनान। 14नाव भटे उतर भेरन यीशु ले एक भौत ठूली भीड़ देखछ्य, और उनूनमें तरस खाछ, और उ भीड़ में जो बिमार छ्या चंगो कर्यान।
15और ब्याल हुन मसछ्य त यीशु का शिष्यून ले उक पास आभेरन क्योछ, “यो त बिरान जागा छै, और देर हो गै; त तुम इन लोगून विदा करा कि इन आश-पासा का बसतीन में जाभेरन अपून खिन खानो मोल ली लिया।” 16लेकिन यीशु ले उनूनथैं क्योछ, “उनोरो जानो जरूरी नाहातिन! तुम इन लोगून खिन खान का इन्तजाम करा।” 17उनूनले यीशु थैं क्योछ, “याँ हमार पास पाँच रोटा और द्वी माँछा का अलावा केले नाहतिन।” 18यीशु ले क्योछ, “उनून म्यारा पास ल्या।” 19तब यीशु ले लोगून घास में बैठून खिन क्योछ, और उनून पाँच रोटान और द्वी माँछा हात में थामीयान, और स्वर्ग का तरफ चाँभेरन, परमेश्वरो को धन्यवाद करछ्य और रोटान टोड़ी-टोड़ी भेरन शिष्यून दीनै रैयान, और शिष्यून ले लोगून दीछ। 20और उन लोगून ले पेट भर भेरन खान खिन खाछ। जब सबून ले खाना खा लीछ, तब शिष्यून ले बचिना का रोटान ले बारा टोकरी भर भेरन उठायान। 21और खान में स्यैनिन और ननतिनान छोड़िभेरन लगभग पाँच हजार आदिमी छ्या।
यीशु को पानि में हिटन
(मरकुस 6:45-52; यहूना 6:15-21)
22और यीशु ले अपून शिष्यून थैं क्योछ, कि तुम तुरन्त अपून नाव में चढ़भेरन मैं है पैलि झील का पार खिन न्हैजा, तब तक मैं भीड़ स विदा करछूँ। 23और यीशु ले लोगून विदा करनाका बाद उ प्रार्थना करून खिन एक डाँण में न्हैग्या, और ब्याल हुन तक वाँई एकलो छ्यो। 24उ बखत नाव झील का बीच में छी, और लहरून ले डगमगान मरेछ्यी, क्याखिनकि हवा उलटा दिशा में चलून मरेछ। 25और यीशु रात्तै तीन है छ: बजे का बीच में, यीशु गलील प्रदेश की झील में पानि हिटभेरन उनार पास आयान। 26शिष्य यीशु स पानि में हिटून देखिभेरन घबरा जानान, और कुन लागनान, “यो भूत छै!” और डरा का मारिले हकाक करून लागनान। 27तब यीशु ले उनूनथैं बात करछ्य और क्योछ, “हिम्मत करा, डरा जन, मैं छूँ।” 28और पतरस ले ऊस जबाब दीछ, “हे प्रभु अगर तैं छै, त मैंस अपून पास पानि में हिटभेरन उनाको हुकुम दे।” 29यीशु ले क्योछ, “अ!” तब पतरस नाव भटे उतर भेरन यीशु का पास जान खिन पानि में हिटून लागछो। 30लेकिन उ हवा देखिभेरन डर ग्यो, और जब डूबून लागछो त हकाक करभेरन कुंछो, “हे प्रभु मैंस बचौ।” 31और यीशु ले तुरन्त उको हात पकड़छ्य और क्योछ, “हे अविश्वासी, तैले क्याखिन शक करछ्य?” 32और जब उन नाव में चढ़ ग्या, त हवा थामी जाछी 33जो शिष्य नाव में छ्या, उन यीशु का खुटान में पड़भेरन कुंनान, “सच्ची में तैं परमेश्वरो को च्योलो छै।”
गन्नेसरत में बिमारून चंगा करून
(मरकुस 6:53-56)
34और जब यीशु और उक शिष्य नाव में गलील प्रदेशा का झील का पार गन्नेसरेत गौं में पुजियान। 35और वाँ का लोगून ले यीशु स पछ्याणी लीछ, और आश-पासा का सब गौन में उकी खबर फैला दीछ, और उन सब बिमारीन यीशु का पास ल्यान। 36और यीशु थैं विनती करून लाग्यान, कि अपून कपाड़ा को एक किनार छुन दे, और जो उक कपाड़ास छू छ्यो उ चंगो हो जा छ्यो।
Zur Zeit ausgewählt:
मत्ती 14: SORNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
