लूका 13
13
पश्चाताप करा या नाश हो
1उ बखत थ्वाड़ा लोग वाँ आयान, और उनूनले यीशु थैं क्योछ, कि रोमी राज्यपाल पिलातुस ले गलीला का जिला का थ्वाड़ा लोगून की हत्या कर दीछ, जब उन मन्दिर में बलिदान चढ़ून मरेछ्या। 2यो सुणिभेरन यीशु ले जबाब दीभेरन उनूनथैं क्योछ, “तुम की समझछा कि इन गलीली लोग और गलीली प्रदेशा का लोगून भटे ज्यादा पापी समझ छ्या जिनारा दगाड़ सब कुछ भ्योछ? जैका कारण इनून में इसी मुसीबत आछ।” 3मैं तुमूनथैं कुछूँ, कि इसो नाहातिनो; लेकिन अगर तुम अपून पापून भटे पश्चताप नी करला, तो तुम सब ले इसीकैं नाश हो जाला। 4और तुम उन अठार आदिमी का बारिमें की कौला, जो तब मर गैछ्या जब यरूशलम शैहरा का पास शिलोह की गुम्मट उनूनमें खितीछ गैछी, उन यरूशलम शैहरा का सब रूनवाला लोगून है ज्यादा पापी छ्या? 5मैं तुमूनथैं कुछूँ, कि नै, लेकिन जब तक तुम अपून पापून भटे पश्चताप नी करला, तो तुम सब ले इसीकैं नाश हो जाला।
फल रहित अंजीरो को रूखो को उदारण
6फिर यीशु ले उनुस एक कहानी बताछ, एक आदिमी ले अंगूर का बगीच में एक अंजीरो को रूख ले लगा राखछ्यो, और उ हर साल उ रूख में फल चांनखिन आछ, लेकिन ऊस के नै मिल्यो। 7तब उले अपून दास थैं क्योछ देख मैं तीन साल भटे यो अंजीरा का रूख में फल खोजनै रयूँ लेकिन के नै पानूं तैं यो रूखै स काटि दे, क्याखिनकि यो निकी जमीन स बरबाद करूनमर्यो छै। 8त यो बात में दास ले अपून मालिक थैं क्योछ, यो साल यो रूख स रून दे मैं येक चारू तरफ खड़िभेरन खाद हाललो। 9अगर अघिल साल यो रूख फल नी द्यलो त ठीक छै तब ऐस काटि द्यूला।
सब्त का दिन कुबड़ी स्यैनि को चंगो करून
10जब यीशु सबता का दिन एक यहूदी सभाघर में उपदेश दिन मरेछ्या। 11और वाँ एक स्यैनि छी, जैस अठार साल भटे भुतले बिमार कर राखछ्यो और उ कुबड़ी हो गैछी, और उ कसीकैं ले सीधी नी हो सकछी 12जब यीशु ले ऊस देखछ्य त अपून पास बुलाभेरन उथैं क्योछ, “ओ स्यैनि तैं अपून बिमारी भटे छुटी गै छी।” 13और यीशु ले उमें हात राखछ्य और उ सीधी हो गै और उ परमेश्वर की महिमा करून लागि गै। 14यो बात में यहूदी सभाघरो को सरदार गुस्सा हो भेरन कि यीशु ले सबतका दिन बिमारीन चंगा करछो, और लोगूनथैं कुन लागछो, “हफ्ता में छ: दिन छन, जैमें हमूले काम करून चैछ, उन दिनून में चंगा हो लेकिन सबतका दिन नै।” 15यो सुणिभेरन प्रभु यीशु ले क्योछ, हे कपटी लोगो, क्या तुमून में भटे हरेक जन सबतका दिन अपून बल्द और गधास किल भटे खोलभेरन पानि पिलून खिन नै ल्हीजाना। 16त यो स्यैनि जो अब्राहम का वंश भटे छै, जैस शैतान ले अठार साल भटे ले बाधी राखछ्यो, क्या सबतका दिन ऊस बन्धन भटे छुड़ून ठीक नी छोई? 17जब यीशु ले यो बात क्यान त उक सब विरोधी लज्जित हो ग्या, और भीड़ा का लोग उन महिमा का कामून भटे जो यीशु करछ्यो देखिभेरन खुशी भ्यान।
राई को दाना उदारण
(मत्ती 13:31-32; मरकुस 4:30-32)
18फिर यीशु ले क्योछ, परमेश्वरो को राज्य कैका समान छै? और मैं येकी तुलना कैथैं करूँ। 19उ राई का एक दाना का समान छै, जैस एक आदिमी ले अपून बगीच में बोछ उ ठूलो हो भेरन रूख बन ग्यो। और आकाशा का चिड़ियान ले उ रूखा का हांगा में घोल बनायान।
खमीरो को उदारण
(मत्ती 13:33)
20यीशु ले फिर एक उदारण दीभेरन क्योछ, परमेश्वरा का राज्य की तुलना मैं कैथैं करूँ? 21उ ऊ खमीरा का समान छै, जस एक स्यैनिले लीभेरन तीस किलो धुल में मिलाछ और इसीकैं पुरो धुलो खमीर हो ग्यो
सकेत द्वार
(मत्ती 7:13,14,21-23)
22यीशु अपून शिष्यून का दगाड़ नगर-नगर और गौंन-गौंन हो भेरन उपदेश दिने यरूशलम शैहरा का तरफ जानमरेछ्या। 23तो वाँ एक आदिमी ले उनूनथैं पुछ्छै, “हे प्रभु, क्या परमेश्वर कुछ लोगून हमेशा का दण्ड भटे बचालो? यीशु ले उनूनथैं क्योछ, 24तुम परमेश्वरा का राज्य में सकरा द्वार भटे प्रवेश करना कि कोशिश करा, क्याखिनकि मैं तुमूनथैं सच्ची कुछूँ, कि भौत सारा लोग छन जो उ भटे प्रवेश करून त चाला लेकिन उन प्रवेश नी कर सकाला। 25जब परमेश्वर, जो घरो को मालिक छै, उठाभेरन द्वार बन्द कर दे, और तुम भ्यार खड़ हो भेरन रून-कलान करभेरन दवार खोलून खिन बिनती करछा, ‘हे प्रभु, हमून खिन दवार खोल दे,’ और उ जबाब दे कि मैं तुमूनथैं नै जाणनू, तुम काँ का छा? 26तब तुम कुन लागला, कि हमूले त्यारा सामुनि खाछ-पीछ और तैले हमार बजारून में उपदेश दीछ। 27लेकिन उ कलौ मैं तुमूनथैं कुछूँ मैं नै जाणनू तुम काँ का छा, ओ कुकर्म करन्या वालो तुम सब मैं भटे दूर हो। 28जब तुम अपून पूर्वज अब्राहम, इसहाक, याकूब और सब परमेश्वरो को संदेश दिनवालान परमेश्वरा का राज्य में बैठिना का, और अपून आपस भ्यार निकलूनै देखला जाँ रून और दाँतून को पिसून होलो। 29तब पुर संसारा का लोग आभेरन परमेश्वरा का राज्य की दावत में शामिल होला। 30और देख जो अपून-आप स महान समझछो, उ तुच्छ होलो; और जैस लोग तुच्छ समझनान, उ महान होलो।”
हेरोदेस राजा की दुश्मनी
31उई बखत थ्वाड़ा फरीसी लोग आभेरन उथैं कुन लाग्यान, “याँ भटे निकल जा, क्याखिनकि राजा हेरोदेस तैंस मार डालून चाँछो।” 32उले उनूनथैं क्योछ जाभेरन उ लोमड़ीथैं कै दी, कि देख मैं आज और भोल भूतून निकाल छूँ और बिमारून स चंगो करछूँ और तीसारा दिन पुरो करोलो। 33फिरले मैंस आज, भोल, और पोरखिन यात्रा करून जरूरी छै, क्याखिनकि परमेश्वरो को संदेश दिनवाला यरूशलम शैहर में मारी जालो।
यरूशलम शैहर खिन विलाप
(मत्ती 23:37-39)
34“हे यरूशलम शैहरा का लोगों, तुमूनले जो परमेश्वरो को संदेश दिनवालान मार दीछ, और जो त्यारा पास भेजि ग्यान उनून ढ़ूगानले मारछा। फिर यीशु ले क्योछ, कतुक बार मैंले यो चाछ कि जसकै मुर्गी अपून प्वाथान अपून पंखान का ताला जामा करछी, उसीकैं मैंले तुमून जामा करूँ लेकिन तुम लोगून ले नै चाँयो। 35देखा तुमोरो मन्दिर तुमून खिन उजाड़ छोड़ दी जालो। किलैकी मैं तुमूनथैं कुछूँ, जब तक तुम यो नी कौला,
‘धन्य छै उ, जो प्रभु अधिकार का दगाड़ उछो’
तब तक तुम मैंस कभे नै देखला।”
Zur Zeit ausgewählt:
लूका 13: SORNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
