यहूना 6
6
पाँच हजार आदिमीन खानो खिलूनो
(मत्ती 14:13-21; मरकुस 6:30-44; लूका 9:10-17)
1इन बातुन बाद यीशु गलील प्रदेशा की झील मतलब तिबिरियास का झील का पार ग्यो। 2और भौत ठूली भीड़ उक पछिल चल पड़छी, क्याखिनकि जो चमत्कारा काम उ बिमारून में दिखूछ्यो उन उनुस देखछ्या। 3तब यीशु डाणा में जाभेरन अपून शिष्यून का दगाड़ वाँ बैठि ग्यो। 4और यहूदीन को फसह त्यार नजिक छ्यो।
5तब यीशु ले भौत भीड़ अपून तरफ उन देखछ्य, त फिलिप्पुस ले क्योछ, “हम इनून खिन काँ है खान खिन मोल लियूनू?” 6लेकिन यो बात उले ऊस परखून खिन क्योछ, क्याखिनकि उ खुद जाण छ्यो कि उ कि करोलो। 7फिलिप्पुस ले उथैं क्योछ, कि “इदुक रोटान की कीमत द्वी सौ दिन का मजूरी बराबर होलि, और इदुक में ले उनून खिन पुर नी हुन लेकिन थ्वाड़ा-थ्वाड़ा सबून मिली ज्यालो।” 8उक शिष्यून में भटे शमौन पतरस को भाई अन्द्रियास ले उथैं क्योछ, 9“याँ एक लड़का छै, जैथैं पास पाँच रोटा और द्वी माँछा छन, लेकिन येले इदुक लोगून खिन उले कि होलो।” 10यीशु ले क्योछ, “लोगून बैठा दी।” उ जाग में भौत घास छी, तब उन लोग जिनून में बैगमैंसून की संख्या लगभग पाँच हजार छी, उन बैठग्या। 11तब यीशु ले रोटान अपून हातून में लियान, और परमेश्वरो को धन्यवाद करभेरन, बैठिना का लोगून में बाड़ी दीयान; उसीकैं माछान ले जदुक उन चाँछ्या बाड़ दीयान। करछ्य। 12जब सब लोगून ले पेट भर भेरन खान खिन खा लीछ, तब यीशु ले अपून शिष्यून थैं क्योछ, “बचिना का रोटान का टुकुड़ान जाम कर ली, कि कुछ ले बरबाद नै करि जौ।” 13त शिष्यून ले उन बचिना का टुकुड़ान जाम करछ्य, जो कि पाँच रोटान में भटे बचिना का छ्या, जिनूनले बारा टोकरी भर भेरन जाम कर्यान। 14तब जो चमत्कार उले करभेरन देखाछ ऊस उ लोग देखभेरन कुन लाग्यान; कि “यो सच्ची में परमेश्वरो को संदेश दिनवाला छै, संसार में ऊँनवालो छ्यो।” 15यीशु स पत्तो लागछै कि इन लोग मैंस राजा बनून खिन पकड़ून चाँनान, तब उ एकलो डाणान का तरफ न्हैग्या।
यीशु को पानि में हिटूनो
(मत्ती 14:22-23; मरकुस 6:45-52)
16फिर जब ब्याल भैछ, त उक शिष्य झील किनार ग्यान। 17और नाव में बैठभेरन झील का पार कफरनहूम गौं खिन जान लागनान, उ बखत अन्यारो है ग्योछ, और यीशु ऐल तक उनार पास नी आ रैछ्यो। 18और तेज आँधी तूफान का कारण झील में लहर उठून लाग्यान। 19जब उन लोग नाऊ स चलाभेरन पाँच-छ: किलोमीटर अघिल न्हैजानान, त उनूनले यीशुस झील में हिटनै नाव का नजिक ऊँनो देखछ्य, और शिष्य डर ग्या। 20लेकिन यीशु ले उनूनथैं क्योछ, “मैं छूँ; डरा जन।” 21तब शिष्य यीशुस नाव में चढ़ून खिन तैंयार भ्यान, और तुरन्त उ नाव उ जाग में पुज जाछी जा उनूले जानमरेछ्यो।
लोगून को यीशुस खोजून
22जो लोगून की भीड़ झील पार रै गैछी, दुसारा दिन उ भीड़ ले देखछ्य कि वाँ एक नाव छोड़भेरन और कोई नानि नाव छी, और यीशु अपून शिष्यनू का दगाड़ उ नाव में नै ग्यो, लेकिन केवल उक शिष्य नाव में ग्यान। 23तब और ले नाऊन तिबिरियास शैहर भटे उ जाग में आयान, जा उनूनले प्रभु को धन्यवाद करिना का बाद रवाटा खाईनाका छ्या। 24जब भीड़ का लोगून ले देखछ्य, कि याँ नै यीशु छै, और नै उक शिष्य छन, त उन लोग नाऊन में बैठभेरन यीशु खोजन खिन कफरनहूम गौं पुजियान।
यीशु जीवन को रोटो छै
25जब उनूनले यीशुस झील पार देखछ्य, त उनूनले यीशु थैं क्योछ, “गुरू जी, तैं याँ कब आछ?” 26यीशु ले उनून जबाब दीछ, “मैं तुमूनथैं सच्ची-सच्ची कुछूँ, तुम मैंस येखिन नै खोजून मरिया कि तुमूले चमत्कार काम देखीयान, बल्कि येक कारण कि तुमून ले पेट भरि रवाटा खायान। 27तुम उ खान खिन मेहनत जन करा जो नाश हो जाछो, लेकिन उ खान खिन मेहनत करा जो अनन्त जीवन तक बनिना को रूछो, जैस मैं आदिमी का च्योलो तुमून द्योलो, क्याखिनकि पिता परमेश्वर ले मैंस येस दीना को अधिकार दी रैछ।” 28उनूनले यीशु थैं पुछ्छै, “परमेश्वरा का काम करनै खिन हम कि करा?” 29यीशु ले जबाब दीछ, परमेश्वर चाँछो कि तुम उमें विश्वास करा जैस उले भेज रैछ। 30तब उनूनले उथैं पुछ्छै, “फिर तैं को वालो चमत्कार देखूछै कि हम ऊस देखिभेरन तैंमें विश्वास करा? तैं को वालो काम देखूछै? 31हमार पुरखानले बिरान जागा में मन्ना#6:31 मन्ना मतलब स्वर्ग को रोटो खाछ, जसो पवित्रशास्त्र में लिखीना को छै, कि परमेश्वर ले मूसा का जरियाले उनून खान खिन स्वर्ग भटे रवाटा दीयान।” 32यीशु ले उनूनथैं क्योछ, “मैं तुमूनथैं सच्ची-सच्ची कुछूँ कि तुमून उ रोटो स्वर्ग भटे मूसा ले नै दीनो, लेकिन म्येरो पिता परमेश्वर ले तुमून सच्ची को रोटो स्वर्ग भटे दीछ। 33क्याखिनकि परमेश्वरो को रोटो उई छै, जो स्वर्ग भटे उतर भेरन संसारा का लोगून जीवन दीछ।” 34तब उनूनले उथैं क्योछ कि हे प्रभु उ रोटो हमेशा हमून दिन कर।
35यीशु ले उनूनथैं क्योछ, “मैं उ छूँ, जो अनन्त जीवन दीछो, जो म्यारा पास आलो उ कभै भुखो नै होलो, और जो मैंमें विश्वास करोलो, उ कभै प्यासो नी होलो। 36लेकिन मैंले तुमून पैलि बताईना को छ्यो, कि तुमूले मैंस देखभेरन ले, मैं-में विश्वास नै करना। 37जो कुछ पिता परमेश्वर मैंस दीछो, उ सब म्यारा पास आलो, और जो कोई म्यारा पास आलो ऊस मैं अपून दगाड़ राखलो। 38क्याखिनकि मैं अपूनी मरजी नै बल्कि पिता परमेश्वर की जैले मैंस भेज रैछ उकी मरजी पुरो करून खिन स्वर्ग भटे आरयूँ। 39और म्यारा पिता परमेश्वर, जैले मैंस भेज रैछ उकी योई मरजी यो छै, कि जो कुछ उले मैंस दी रैछ, उ सब कुछ मैं अपून पास राखू लेकिन ऊस आखिरी दिन फिर ज्यून करूँलो। 40क्याखिनकि म्यारा पिता परमेश्वर की यो मरजी छै, कि जो कोई च्याला स देखिभेरन उमें विश्वास करोलो, उ अनन्त जीवन पालो, और मैं ऊस आखिरी दिन ज्यून करोलो।”
41येक कारण यहूदी अगुवा लोग ऊस देखिभेरन चिड़ून लाग्यान, क्याखिनकि उले कईना छ्यो, “जो रोटो स्वर्ग भटे उतर छै, उ मैं छूँ।” 42और उनूनले क्योछ, “क्या यो यूसुफ को च्योलो यीशु नाहातिन, जैका ईजा-बबा स हम जाणनू? त उ क्याखिन कुछूँ कि मैं स्वर्ग भटे आरयूँ?” 43यीशु ले उनून जबाब दीछ, कि “आपस में जन कुड़कुड़ा। 44कोई ले म्यारा पास तब तक नै आ सकूनो, जब तक पिता परमेश्वर, जेलै मैंस भेज रैछ, ऊस लीभेरन नै ऊँ; और मैं आखिरी दिन ऊस फिर ज्यून करोलो। 45परमेश्वरो को संदेश दिनवालान का लेखून में यो लिखीना को छै; ‘उन सब परमेश्वरा का तरफ भटे सिखाईना का होला।#यशायाह 54:13 ’ जै केले पिता परमेश्वर थैं सुणछ और सिखछै, उ म्यारा पास ऊँछो। 46कैले ले पिता परमेश्वर नै देख रैछ, मैं एकलो छूँ, जो परमेश्वरा का तरफ भटे आरयूँ, जैले ऊस देख रैछ। 47मैं तुमूनथैं सच्ची-सच्ची कुछूँ, कि जो कोई मैंमें विश्वास करछो, अनन्त जीवन उको छै। 48मैं उ रोटो छूँ, जो जीवन दीछो। 49तुमार पुरखानले बिरान जागा में मन्ना#6:49 मन्ना मतलब स्वर्ग को रोटो खाछ और मरग्या। 50मैं जै रोटा का बारिमें कुंछूँ, उ स्वर्ग भटे उतर छै और जो आदिमी उमें भटे खाछो उ कभै नी मरोलो। 51जीवित रोटो जो स्वर्ग भटे उतर छै उ मैं छूँ। अगर कोई यो रोटा में भटे खाछो, त उ हमेशा ज्यून रोलो; और जो रोटो में संसारा का जीवन खिन दीयूलो, उ म्येरो माँसो छै।”
52यो बात में यहूदी लोग यो कैभेरन आपस में झगाड़ा करून लाग्यान, “यो आदिमी क्याखिन अपून माँसो खान खिन दी सकछो?” 53यीशु ले उनूनथैं क्योछ, “मैं तुमूनथैं सच्ची-सच्ची कुछूँ, जब तक तुम मैं आदिमी का च्याला को माँसो नी खाला, और खून नी प्याला तब तक तुमून जीवन नी मिलोलो। 54जो म्येरो माँसो खाछो, और म्येरो खून पीछो, अनन्त जीवन उको छै, और मैं न्याय का दिन ऊस फिर ज्यून करोलो। 55क्याखिनकि म्येरो माँसो सच्ची में खाना की चीज छै, और म्येरो खून सच्ची में पीना की चीज छै। 56जो म्येरो माँसो खाछो और म्येरो खून पीछो, उ मैंमें बनिनाको रूछूँ और मैं उमें बनिनाको रूछूँ। 57मैंस म्यारा पिता परमेश्वर ले भेज रैछ, जो जीवन दीछो। जसा तरीका ले उले मैंस जीवन दी रैछ, उसीकैं मैंले उ आदिमी स जीवन द्यूलो जो म्येरो माँसो खाछो। 58जो रोटो स्वर्ग भटे उतर रियोछ, उ योई छै, तुमार पुरखान का नयाति नाहातिन जैस खायो और मरग्या, जो कोई यो रोटो खालो, उ हमेशा ज्यून रौलो।” 59यीशु ले यो बात तब क्यान, जब कफरनहूम गौं का एक यहूदी सभाघर में उपदेश दिन मर्यो छ्यो।
अनन्त जीवन को संदेश
60यीशुका शिष्यून में भटे भौतून ले यो बात सुणिभेरन क्योछ, “यो त भौत कठिन बात छै, येस को मान सकछो?” 61यीशु ले अपून मन में यो बात जाणिभेरन कि म्यारा शिष्य यो बात ले आपस में कुड़कुड़ान मर्यान, उले उनूनथैं पुछ्छै, “क्या यो बात तुमून मैंमें विश्वास करून में रोकछी? 62और अगर तुम मैं आदिमी का च्याला स स्वर्ग जानो देखला, जाँ उ पैलि छ्यो, त कि होलो? 63परमेश्वर की आत्माई छै, जो जीवन दिनवालो छै, लेकिन शरीर नै दी सकूनो, जो बात मैंले तुमूनथैं कईना का छन उन पवित्र आत्मा ले बोली जानान, जो बात मैंले तुमूनथैं कईना का छन, उ आत्मा और जीवन ले छै। 64लेकिन तुमून में भटे कतुक इसले छन जो विश्वास नै करना।” क्याखिनकि यीशु त पैलि भटे जाण छ्यो कि जो विश्वास नै करना उन को छन? और को ऊस पकड़वालो। 65और उले क्योछ, “येक कारण मैंले तुमूनथैं कईनाको छ्यो कि जब तक कैसई पिता परमेश्वरा का तरफ भटे बरदान नै दीई जौ तब तक उ म्यारा पास नै आ सकनो।”
पतरस को विश्वास
66यो बातुन का कारण उक भौत शिष्य ऊस छोड़भेरन न्हैजानान, और उक बाद उनूनले उको दगोड़ो छोड़ दीछ। 67तब यीशु ले उन बारा शिष्यून थैं क्योछ, “क्या तुम ले छोड़भेरन जान चाछाई?” 68तब शमौन पतरसले ऊस जबाब दीछ, “हे प्रभु, हम कैका पास जानू? अनन्त जीवन का बात त्यार पास छन। 69और हम तैंमें विश्वास करछ्य, और जाणिगया कि तुम पवित्र जन छा जैस परमेश्वर ले भेज रैछ।” 70यीशु ले उनून जबाब दीछ, “क्या मैंले तुम बारून नै चूनछै? तब ले तुमून में भटे एक जनि शैतान बश में छै।” 71यो बात यीशु ले शमौन इस्करियोती को च्योलो यहूदा का बारिमें क्योछ, जब कि यो उई बारा शिष्यून में भटे एक छ्यो, जो यीशुस धोखा दीन वालो छ्यो।
Zur Zeit ausgewählt:
यहूना 6: SORNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
