От Матфея 3

Иоанным Крестителым Уңипақилъҳа

1Та̄кўаниңани Иоанн Крестителым агляӷлюни килга̄ңанун Иудеям, пӣнлиқақ уңипақимың. 2Хўатын пикақ: «Авутыҳқылъюси та̄қитык сыӷлыҳқынъыӷмың, қаюҳлъяк Атаныҳпагулъҳа Қилягым ка̄сяҳтӯма̄қ». 3Иоанныңӯқ ӯкналиқистым Исаиям акузиткыхка̄ хўатын пӣқңами:

«Килга̄ни кина акилӷӯгақуқ хўатын:

“Ята̄ҳқитыху Атанӷым тӯмкаҳқа̄,

таклъяӷрукыхсяҳтыху иглыӷавихка̄!”»

4Иоанным а̄ткӣ верблюдым мылъқўа̄ның улима̄ӷыт, мықамың тафсилюни, нықыклъюни саранчамыңлъю мёдымыңлъю. 5Югыт агляҳтӯткат лъңанун Иерусалимымыңлъю, Иудеямыңлъю, увитаңаныңлъю Кӣўым Иорданым. 6Сыӷлыҳқылъытың қайвиҳқынӷатки, Иоанным крестиӷықыхкаңи Иорданыгни.

7Иоанным ысҳаӷлюки Фарисеилӷутытлъю, Саддукеилӷутытлъю тагилӷӣт лъңанун крестиӷысқылъютың пикӣ: «Лъпыси нымыӷьяни! Китум анагысқиси Кияӷныӷым нанқихтылъыҳқа̄ның ка̄нъақылӷӣмың? 8Сивуклъюси пинитун пилъыҳпысигун ипапиҳқитыху сыӷлыҳқылъыҳпысиның авутыҳқылъыҳси. 9Хўатынңам сюмыҳтаӷаҳпынаси: “Кияӷныӷым нанқихна̄нӷитӣлъю қаюҳлъяк киңунқӣлъю Авраамым”. Уңипа̄тамси Кияӷныӷым Авраам киңуныңлъя̄нъаяӷа̄ ма̄кын уйӷагның! 10Хўа̄ ма̄тын қалъқалимаяқлъыхӣнаҳлъютың аюқут уқфигыт акўӣтхун. Қамахлъютың уқфигыт пинилӷӣмың пӣтыстинӷилңӯт кыплъюки, кынӷыгнун милю̄сяҳқа̄гут. 11Мыҳқун крестиӷаӷӣқуңа авутыҳкыхканун сыӷлыҳқылъыӷмыхның. Иўырңа тагияҳқам киңумның крестиӷылъықӣси Аглыӷналӷӣгныңлъю Таӷныӷагның, кыныӷмыңлъю. Аҳтуӷьяҳқа̄нӷитыҳлъяхтуқ хўаңамның, рыпалъ талўа камыхкык тугумӣқыпагниңитахка. 12Та̄на тагияҳқақ нанқихтияқлъыхӣна̄гуқ. А̄фсяҳқақӣ пинилӷӣт югыт сыӷлыӷның, катам пӣтысӣӷаҳтым пыкутаминың малъӣлъҳатун зернот. Кахпаглюки зернот малъяқ тама̄на милю̄сяҳқақа̄ қа̄мьяҳқа̄нӷилңӯгнун кынӷыгнун».

Крестиӷылъҳа Иисусым

13Та̄хкын Иисус Галилеямың тагикақ Иорданыгнун, Иоаннымун крестиӷысқылъюни. 14Иўырңа Иоанным акузинъақуткыхкақсяқаңа хўатын: «Хўаңа лъпык крестиӷьяҳқақсяӷаҳпыңа. Сяңавык хўаңамнун тагизин?»

15Иўырңа Иисусым пика̄: «Лыган ся̄қсин крестиӷыңа қаюҳлъяк таўатын пикумтуң апыӷӣҳлъықаҳпуң Кияӷныӷым пиюкылъҳа».

Ынка̄м Иоанным крестиӷыка̄.

16Иисус крестиӷьятни мыӷмың а̄ныхкақ. Та̄хкын қиляк қылъпыӷлюни ысҳақакык Кияӷныӷым Таӷныӷакык укилӷӣк голубытун аюқлъютык, ынка̄м лъңакун налюкак. 17Та̄хкын ма қилягмың пикақ: «Унаңӯқ пиниқыхкаҳлъяка Иӷнықа, ыфқуқыпихтақа».

Zur Zeit ausgewählt:

От Матфея 3: ess2

Markierung

Kopieren