От Иоанна 2

Ныңуӷутылъық Канами

1Пиңайӣтаңани аӷныӷыт та̄ўаңуқ ныңуҳнақылӷӣк Канами, Галилеямылңуӷми. Иисусым на̄ңа таўанлыңуқ, 2Иисусылъю малихся̄ҳтыкулъҳӣт тахсиқлъиқа̄лӷӣт ныңуҳнақылӷӣгнун. 3Вино қамахсятху, на̄ңан Иисус пика̄: «Виноңӣтут».

4Иисусым пика̄: «Аӷнами хўани, сясқыхпынаңа, сялин пилъыҳқақа ка̄сигатуқ».

5Та̄хкын Иисусым на̄ңан пикӣ қыпҳаҳтыт: «Сясқыхкаңиси лыган пилӷа̄си».

6Та̄ўаңуқ аӷвинлыгуфтут уйӷагмың улима̄ӷыт мылӷутат. Иляңи ма̄лӷук мераңулъӷик, иляңи пиңают мераңулъӷит. (Иудеит атуқақыхкаңит укмаңиҳсямун Моисейем Лӣлиҳтӯся̄н писқылъҳатун.)

7Иисусым пикӣ қыпҳаҳтыт: «Имиҳтыки та̄кут мылӷутат мыӷмың». Имиқӣт ыслъымкаӷаҳтаӷлюки.

8Та̄хкын пикӣ: «Мыӷмың имӣлъюси агля̄тыху нықынӷаҳқым умӣлга».

Ынка̄м имӣлъютың агля̄тка̄т. 9Умӣлгым на̄сӣқа̄ мық виноңуҳтыкақ. Налъюкыхкаңа накын та̄на вино пиңутаңа. (Та̄кут қыпҳаҳтыт лӣсимакыхкаңат қаюҳлъяк имӣлъютың мыӷмың пика̄лӷӣт.) Ынка̄м умӣлгым туқлъюӷлюку нулиҳтуӷнақылӷӣ 10пика̄: «Тамаҳаӷми кияң пинилӷӣмың виномың атуқақуқ сивуклъюни ынка̄м ақылъқат кыпсю̄нъыӷата тама̄на аҳся̄н аюқылӷӣ вино киңулӣлюку атуӷақа̄т. Иўырңа пинилъҳа вином атуқумаңисимазигу сивуклъюку».

11Канами, Галилеямылңуӷми Иисусым апыӷӣқа̄ алъя̄ҳлъюхўаҳтилъықсюхўа̄ни. Та̄хун алъя̄ҳлъюхўаҳтилъыӷмикун югнун ысҳаҳтыстыка̄ а̄ңылъыҳлъяни. Ынка̄м малихся̄ҳтыңита ухпықыхка̄т ипа Мессияңунилюку.

12Та̄м киңуңаның Иисус, на̄ңа, аңлыгутаңи, малихся̄ҳтыңилъю агляқат Капернаумымун, тама̄нтыкат қафсинат аӷныӷыт.

Иисус Храмымун Пилӷӣ

13Иудеит нықынӷаҳқысяҳтуңысталӷӣт Пасхамун ынка̄м Иисус агляқақ Иерусалимымун. 14Храмыми ысҳақӣ югыт акикулӷӣт волының, пынъӣӷның, голубының. Ысҳақӣлъю манимың навыҳқуҳтыт ақумлютың қаюӷвикымыхни. 15Иисусым кахсягутаңлъяӷлюни тапҳаӷмың, Храмымың а̄нысқуқӣ малигулъюки пынъӣӷнунлъю, волынунлъю. Манилӷутӣт катагӯтақлъюки миңиляткӣ, улъыҳқуқӣлъю қаюӷвигит. 16Та̄хкын югыт акилъпыгалӷӣт голубының қылъқӣ хўатын: «А̄нутыки хўакын! Атама Мыңтыӷа̄ акилъпыгаӷвигуҳтыхпына̄н». 17Малихся̄ҳтыңита нықа̄тка̄т Акузитыт Игақыхкат пилъҳат: «Мыгнукиңалъқа Мыңтыӷаҳпынун на̄фқуткынъақңўа̄қа». 18Та̄хкын Иудеит иглыӷутистыңита а̄птыка̄т Иисус: «Китум қылыҳтатын таўатын писқылъютын? Кияӷныӷым писқумакаңатын, алъя̄ҳлъюхўаҳти ипапиҳқусиҳқамың». 19Иисусым кӣмсиқӣ: «На̄фқитыху уна храм, пиңаюни аӷныӷни ныкыфлъықақа». 20А̄птыка̄т: «Лъпык ныкыфлъықсигӯ пиңаюни аӷныӷни? Ю̄к ма̄лӷук аӷвинлык сипнықлюкиңӯт аюмиқулъҳыт ныкыфтусиқыхка̄т ӯмун Храмымун». 21Иўырңа Иисусым акузиткыңъукаңа лъми югусини храмыңулюку. 22Уңуваҳтақңан туқулъыӷмың малихся̄ҳтыңита нықа̄тка̄т хўатын пилъҳа: «Уна храм, пиңаюни аӷныӷни ныкыфлъықақа». Ынка̄м ухпықыхкӣт Акузитыт Игақыхкат, Иисусымлъю акузилъҳи.

Иисусым Лӣсимакыхкаңи Қамахлъюки Югыт Натытуляңи

23Иисус Иерусалимымылъюку Пасхам нықынӷаҳқылъҳани, угляпихлъыҳӣт ысҳапаглюки алъя̄ҳлъюхўаҳтилъҳи ухпықыхкақыхкаңат, 24иўырңа Иисусым ухпықумаңилъкаңи. 25Кинкунун алңунак уңипа̄нъыӷисяӷңа̄тни аюқылӷӣ югның қаюҳлъяк лӣсимакыхкаңи натытуляңи.

Zur Zeit ausgewählt:

От Иоанна 2: ess2

Markierung

Kopieren