ငဝ်ႈၵမ်ႇၽႃႇ 1

လွင်ႈတၢင်းဢၼ်ၽၢၼ်ႇသၢင်း

1မိူဝ်ႈၵေႃႇၸႃႉႁူဝ်ပိုင်းၼၼ်ႉ၊ ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၵၢင်ႁၢဝ်တင်းလိၼ်မိူင်းဢေႃႈ။- 2လိၼ်မိူင်းၼႆႉ ဢမ်ႇမီးႁၢင်ႈၽၢင်လႄႈပဵၼ်ဢၼ်ပဝ်ႇလၢပ်ႈဝႆႉဢေႃႈ။ လပ်းသိင်ႇမုင်းႁူမ်ႇၵႃႈၼိူဝ်တီႈဢၼ်လိုၵ်ႉဢၼ်လမ်ႇၼၼ်ႉဝႆႉလႄႈဝီႉၺိၺ်ႇၽြႃးပဵၼ်ၸဝ်ႈ ၵိင်းဝၢပ်ႈယူႇၵႃႈၼိူဝ်ပၢင်ႇၽိဝ်ၼမ်ႉဢေႃႈ။

3ၽြႃးပဵၼ်ၸဝ်ႈၵေႃႈဝႃႈ၊ ႁႂ်ႈဢၼ်လႅင်းပဵၼ်မႃးသေ၊ ဝႃႈၼင်ႇၼႆလႄႈဢၼ်လႅင်းပဵၼ်မႃးဢေႃႈ။- 4ၽြႃးပဵၼ်ၸဝ်ႈႁၼ်လွင်ႈဢၼ်လႅင်းၼၼ်ႉလီလႄႈၸင်ႇၽႄဢၼ်လႅင်းတင်းဢၼ်လပ်းသိင်ႇဝႆႉဢေႃႈ။- 5ၽြႃးပဵၼ်ၸဝ်ႈႁွင်ႉႁဵၵ်ႈဢၼ်လႅင်းၼၼ်ႉၸိုဝ်ႈၵႃဝၼ်း၊ ဢၼ်လပ်းသိင်ႇၼၼ်ႉၸိုဝ်ႈၵႃၶိုၼ်းလႄႈ ပဵၼ်ႁူဝ်ၶမ်ႈပဵၼ်ႁူဝ်ၼႂ်၊ ဝၼ်းပထမႃႉဢေႃႈ။

6ၵမ်းၼၼ်ႉ ၽြႃးပဵၼ်ၸဝ်ႈဝႃႈ၊ ႁႂ်ႈၼႃႈၽႃႉပဵၼ်မႃးၵႃႈၼႂ်းၶိုင်ႈၵၢင်ၼမ်ႉၼႆသေ။ ႁႂ်ႈၼမ်ႉၼင်ႇၵၼ်ၽၢတ်ႇၽႄၵၼ်သေ၊ ဝႃႈၼင်ႇၼႆသေယဝ်ႉ၊- 7ၽြႃးပဵၼ်ၸဝ်ႈႁဵတ်းပဵၼ်ၼႃႈၽႃႉလႄႈ ၽႄၼမ်ႉဢၼ်မီးၵႃႈၼိူဝ်ၽႃႉတင်းၼမ်ႉဢၼ်မီးၵႃႈတႂ်ႈၽႃႉၼၼ်ႉဝႆႉလႄႈ ၸင်ႇပဵၼ်ၸိူဝ်ႉၼင်ႇၼႆဢေႃႈ။- 8ၽြႃးပဵၼ်ၸဝ်ႈႁွင်ႉႁဵၵ်ႈၼႃႈၽႃႉၼၼ်ႉၸိုဝ်ႈ ၵၢင်ႁၢဝ်လႄႈ ပဵၼ်ႁူဝ်ၶမ်ႈပဵၼ်ႁူဝ်ၼႂ်၊ ဝၼ်းတူႉတီႉယႃႉဢေႃႈ။

9ၵမ်းၼၼ်ႉ ၽြႃးပဵၼ်ၸဝ်ႈဝႃႈ၊ႁႂ်ႈၼမ်ႉဢၼ်မီးၵႃႈတႂ်ႈၵၢင်ႁၢဝ်ၼႆႉၸူႉၵၼ်တုမ်ၵၼ်ယူႇတီႈလဵဝ်သေ။ ႁႂ်ႈၵုင်းပေႃႇဢွၵ်ႇသေ၊ ဝႃႈၼင်ႇၼႆလႄႈ ၸင်ႇပဵၼ်ၸိူဝ်ႉၼင်ႇၼႆဢေႃႈ။- 10ၽြႃးပဵၼ်ၸဝ်ႈႁွင်ႉႁဵၵ်ႈၵုင်းၼၼ်ႉၸိုဝ်ႈလိၼ်၊ တီႈဢၼ်ၼမ်ႉၸူႉၵၼ်တုမ်ၵၼ်ၼၼ်ႉ ၸိုဝ်ႈပၢင်ႇလၢႆႇလႄႈ ၽြႃးပဵၼ်ၸဝ်ႈႁၼ်လွင်ႈတၢင်းၼၼ်ႉပဵၼ်ဢၼ်လီဢေႃႈ။

11ၵမ်းၼၼ်ႉ ၽြႃးပဵၼ်ၸဝ်ႈဝႃႈ၊ လိၼ်ၼႆႉႁႂ်ႈတူၼ်ႈယိူဝ်ႈလႂ်၊ တူၼ်ႈၶဝ်ႈဢၼ်ၸၢင်ႈႁႂ်ႈပဵၼ်မၢၵ်ႇၶဝ်ႈမဵတ်ႉၶဝ်ႈလႂ်၊ တူၼ်ႈမႆႉဢၼ်ၸၢင်ႈႁႂ်ႈပဵၼ်မၢၵ်ႇမႆႉမၢၵ်ႇတွၵ်ႇလႄႈ ပႃးၸိူဝ်ႉပႃးၽၼ်းတီႈတူဝ်ၸဝ်ႈၵဝ်ႇယူႇလႂ်၊ ဢွၵ်ႇပဵၼ်မႃးၵႃႈၼိူဝ်လိၼ်သေ၊ ဝႃႈၼင်ႇၼႆလႄႈ ၸင်ႇပဵၼ်ၸိူဝ်ႉၼင်ႇၼႆဢေႃႈ။- 12လိၼ်ၼႆႉႁႂ်ႈတူၼ်ႈယိူဝ်ႈလႂ်၊ တူၼ်ႈၶဝ်ႈဢၼ်ၸၢင်ႈႁႂ်ႈပဵၼ်မၢၵ်ႇၶဝ်ႈမဵတ်ႉၶဝ်ႈလႂ်၊ တူၼ်ႈမႆႉဢၼ်ၸၢင်ႈႁႂ်ႈပဵၼ်မၢၵ်ႇမႆႉမၢၵ်ႇတွၵ်ႇလႄႈ ပႃးၸိူဝ်ႉပႃးၽၼ်း တီႈတူဝ်ၸဝ်ႈၵဝ်ႇယူႇလႂ်၊ ဢွၵ်ႇပဵၼ်မႃးဢေႃႈ။ ၽြႃးပဵၼ်ၸဝ်ႈႁၼ်လွင်ႈတၢင်းၼၼ်ႉပဵၼ်ဢၼ်လီလႄႈ၊- 13ပဵၼ်ႁူဝ်ၶမ်ႈပဵၼ်ႁူဝ်ၼႂ်၊ ဝၼ်းတႃႉတီႉယႃႉဢေႃႈ။

14ၵမ်းၼၼ်ႉ ၽြႃးပဵၼ်ၸဝ်ႈဝႃႈ၊ ၼင်ႇႁိုဝ်တၵ်းႁႂ်ႈၵႃဝၼ်းတင်းၵႃၶိုၼ်းပႅၵ်ႇပိူင်ႈၵၼ်ၸိုင်၊ ႁႂ်ႈႁိူၼ်းဢၼ်ႁိူဝ်ႈဢၼ်လႅင်းတင်းလၢႆ ပဵၼ်မႃးၵႃႈၼႂ်းၶိုင်ႈၵၢင်ၼႃႈၽႃႉၵၢင်ႁၢဝ်သေ။ ႁႂ်ႈပဵၼ်ပုၼ်ႈၼီႉမိၵ်ႈလၢၵ်ႈၶၼႃႇလႂ်၊ ၶိင်ႇဢၼ်မၵ်းၶၢၼ်းဝႆႉလႂ်၊ ဝၼ်းလႂ်၊ ပီႊလႂ်သေ။- 15ႁႂ်ႈၶဝ်ပဵၼ်ႁိူၼ်းဢၼ်ႁိူဝ်ႈဢၼ်လႅင်းယူႇၵႃႈၼႂ်းၼႃႈၽႃႉၵၢင်ႁၢဝ် ႁႂ်ႈလႆႈလႅင်းထွင်ႇလိၼ်မိူင်းသေ၊ ဝႃႈၼင်ႇၼႆလႄႈၸင်ႇပဵၼ်ၸိူဝ်ႉၼင်ႇၼႆဢေႃႈ။

16ၼင်ႇၼၼ်လႄႈ ၽြႃးပဵၼ်ၸဝ်ႈႁဵတ်းပဵၼ်ႁိူၼ်းဢၼ်ႁိူဝ်ႈဢၼ်လႅင်းလူင်သွင်လုၵ်ႈဢၼ်ဝႃႈ ဢၼ်ယႂ်ႇလုၵ်ႈၼိုင်ႈ ပုၼ်ႈဢၼ်တၵ်းဢုပ်ႉပိူင်ႇၵႃဝၼ်း၊ ဢၼ်လဵၵ်ႉလုၵ်ႈၼိုင်ႈ ပုၼ်ႈဢၼ်တၵ်းဢုပ်ႉပိူင်ႇၵႃၶိုၼ်း ဢိၵ်ႇတင်းလၢဝ်တင်းလၢႆသေယဝ်ႉ၊- 17ၽြႃးပဵၼ်ၸဝ်ႈဢဝ်ဝႆႉၵႃႈၼိူဝ်ၽႃႉၵၢင်ႁၢဝ်ႁႂ်ႈလႆႈလႅင်းထွင်ႇလိၼ်မိူင်း၊- 18ဢိၵ်ႇတင်းႁႂ်ႈလႆႈဢုပ်ႉပိူင်ႇၵႃဝၼ်းတင်းၵႃၶိုၼ်းလႄႈ၊ ၽႄဢၼ်လႅင်းတင်းဢၼ်လပ်းသိင်ႇဝႆႉဢေႃႈ။ ၽြႃးပဵၼ်ၸဝ်ႈႁၼ်လွင်ႈတၢင်းၼၼ်ႉပဵၼ်ဢၼ်လီလႄႈ၊- 19ပဵၼ်ႁူဝ်ၶမ်ႈပဵၼ်ႁူဝ်ၼႂ်၊ ဝၼ်းၸတုၵ်ႉထႃႉဢေႃႈ။

20ၵမ်းၼၼ်ႉ ၽြႃးပဵၼ်ၸဝ်ႈဝႃႈ၊ ၼမ်ႉၼႆႉႁႂ်ႈၵိူတ်ႇလဵင်ႉတရိၵ်ႈသၢၼ်ႇဢၼ်ဢသၢၵ်ႈလိပ်းယူႇလႄႈ ၸၢင်ႈတူင်ႉၸၢင်ႈၼိုင်ယႂ်ႇယႂ်ႇၼမ်ၼမ်မႃးသေ။ ၼူၵ်ႉၵေႃႈႁႂ်ႈမိၼ်ၵႃႈၼိူဝ်လိၼ်မိူင်းၼႂ်းၼႃႈၽႃႉၵၢင်ႁၢဝ်သေ၊ ဝႃႈၼင်ႇၼႆဢေႃႈ။- 21ၼင်ႇၼၼ်လႄႈ ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ် ၸႃႉၸဵမ်ပႃလူင်တင်းလၢႆလႄႈ တရိၵ်ႈသၢၼ်ႇဢၼ်ဢသၢၵ်ႈလိပ်းယူႇလႄႈ တူင်ႉၼိုင်ဢၼ်ၼမ်ႉၵိူတ်ႇလဵင်ႉမႃး မဵဝ်းလႂ်မဵဝ်းၼၼ်ႉၼမ်ၼႃႇၵႃႈမီးတင်းသဵင်ႈတင်းလူင် ဢိၵ်ႇတင်း ၼူၵ်ႉဢၼ်ၸၢင်ႈမိၼ်ၵႃႈမီးတင်းသဵင်ႈတင်းလူင်လႄႈ ၽြႃးပဵၼ်ၸဝ်ႈႁၼ်လွင်ႈတၢင်းၼၼ်ႉ ပဵၼ်ဢၼ်လီဢေႃႈ။- 22ၽြႃးပဵၼ်ၸဝ်ႈပၼ်တၢင်းလီတီႈၶဝ်လႄႈဝႃႈ၊ ၵိူတ်ႇလဵင်ႉလုၵ်ႈလဵင်ႉလၢင်းလႄႈ ယႂ်ႇၽႄႈၼမ်ၵိုၼ်းတႃႉ။ ႁႂ်ႈတဵမ်ၼမ်ႉပၢင်ႇလၢႆႇတင်းလၢႆတႃႉ။ ၼူၵ်ႉၵေႃႈႁႂ်ႈယႂ်ႇၽႄႈၼမ်ၵိုၼ်းမႃးၵႃႈၼိူဝ်လိၼ်တႃႉ၊ ဝႃႈၼင်ႇၼႆလႄႈ၊- 23ပဵၼ်ႁူဝ်ၶမ်ႈပဵၼ်ႁူဝ်ၼႂ်၊ ဝၼ်းပိၼ်ႇၸမႃႉဢေႃႈ။

24ၵမ်းၼၼ်ႉ ၽြႃးပဵၼ်ၸဝ်ႈဝႃႈ၊ လိၼ်ၼႆႉႁႂ်ႈၵိူတ်ႇလဵင်ႉသတ်ႉတဝႃႇ ဢၼ်ဢသၢၵ်ႈလိပ်းယူႇ၊ မဵဝ်းလႂ်မဵဝ်းၼၼ်ႉ၊ ဢၼ်ဝႃႈ တူဝ်ယဵၼ်ႇတူဝ်ငႄႈလႂ်၊ တရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းလႂ်၊ တူဝ်ႁၢႆႉလႂ်မႃးသေ၊ ဝႃႈၼင်ႇၼႆလႄႈ ၸင်ႇပဵၼ်ၸိူဝ်ႉၼင်ႇၼႆဢေႃႈ။- 25ၼင်ႇၼၼ်လႄႈ ၽြႃးပဵၼ်ၸဝ်ႈႁဵတ်းပဵၼ်တူဝ်ႁၢႆႉမဵဝ်းလႂ်မဵဝ်းၼၼ်ႉ၊ တူဝ်ယဵၼ်ႇတူဝ်ငႄႈမဵဝ်းလႂ်မဵဝ်းၼၼ်ႉ၊ တရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းၵႃႈၼိူဝ်လိၼ် မဵဝ်းလႂ်မဵဝ်းၼၼ်ႉလႄႈ ၽြႃးပဵၼ်ၸဝ်ႈႁၼ်လွင်ႈတၢင်းၼၼ်ႉ ပဵၼ်ဢၼ်လီဢေႃႈ။

26ၵမ်းၼၼ်ႉ ၽြႃးပဵၼ်ၸဝ်ႈဝႃႈ၊ ႁဵတ်းပဵၼ်ၵူၼ်းၸွမ်းၼင်ႇပုင်ႇႁၢင်ႈႁဝ်း၊ ႁၢင်ႈၽၢင်ဢၼ်လဵဝ်ၵၼ်တင်းႁဝ်းတႃႉႁဝ်း။ ႁႂ်ႈမၼ်းဢုပ်ႉပိူင်ႇပႃပၢင်ႇလၢႆႇလႂ်၊ ၼူၵ်ႉၵၢင်ႁၢဝ်လႂ်၊ တူဝ်ယဵၼ်ႇတူဝ်ငႄႈလႂ်၊ လိၼ်တင်းသဵင်ႈတင်းလူင် တင်းတရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းၵႃႈၼိူဝ်လိၼ်ၵူႈၸိူဝ်ႉၵူႈပိူင်လႂ်သေ၊ ဝႃႈၼင်ႇၼႆဢေႃႈ။- 27ၼင်ႇၼၼ်လႄႈ ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၵူၼ်း ၸွမ်းၼင်ႇပုင်ႇႁၢင်ႈတူဝ်ၸဝ်ႈၵဝ်ႇဢေႃႈ။ ၸွမ်းၼင်ႇပုင်ႇႁၢင်ႈၽြႃးပဵၼ်ၸဝ်ႈၼၼ်ႉ၊ မၼ်းၸဝ်ႈၽၢၼ်ႇသၢင်းႁဵတ်းပဵၼ်ၶဝ်ဢေႃႈ။ ၶဝ်ၼၼ်ႉၸိုင်၊ မၼ်းၸဝ်ႈၽၢၼ်ႇသၢင်းႁဵတ်းပဵၼ် ၵူၼ်းၸၢႆးၵူၼ်းယိင်းဢေႃႈ။- 28ၽြႃးပဵၼ်ၸဝ်ႈပၼ်တၢင်းလီတီႈၶဝ်လႄႈဝႃႈ၊ ၵိူတ်ႇလဵင်ႉလုၵ်ႈလဵင်ႉလၢင်းလႄႈယႂ်ႇၽႄႈၼမ်ၵိုၼ်းတႃႉ။ ႁႂ်ႈတဵမ်လိၼ်မိူင်းလႄႈ ပႄႉၼႅင်ႇတႃႉ။ ဢုပ်ႉပိူင်ႇပႃပၢင်ႇလၢႆႇလႂ်၊ ၼူၵ်ႉၵၢင်ႁၢဝ်လႂ်၊ တရိၵ်ႈသၢၼ်ႇဢၼ်ဢသၢၵ်ႈလိပ်းယူႇလႄႈ ၸၢင်ႈၵႂႃႇၸၢင်ႈၵၢၼ်း ၵႃႈၼိူဝ်လိၼ်ၵူႈၸိူဝ်ႉၵူႈပိူင်လႂ်တႃႉ၊ ဝႃႈၼင်ႇၼႆဢေႃႈ။

29ၽြႃးပဵၼ်ၸဝ်ႈဝႃႈ၊ တူၺ်းလူး၊ ၵဝ်ပၼ်တူၼ်ႈၶဝ်ႈ ၵူႈၸိူဝ်ႉၵူႈပိူင်ဢၼ်ၸၢင်ႈႁႂ်ႈပဵၼ် မၢၵ်ႇၶဝ်ႈမဵတ်ႉၶဝ်ႈ ၵႃႈၼိူဝ်လိၼ်ၵူႈတီႈၵူႈလႅၼ်၊ တူၼ်ႈမႆႉဢၼ်ပျေႉၸုမ်ႇတင်းမၢၵ်ႇဢၼ်ႁႂ်ႈပဵၼ်ၸိူဝ်ႉပဵၼ်ၽၼ်း ၵူႈၸိူဝ်ႉၵူႈပိူင်တီႈသူဢေႃႈ။ ပဵၼ်ပုၼ်ႈဢၼ်သူတၵ်းၵိၼ်ဢေႃႈ။- 30တီႈတူဝ်ဢၼ်ယူႇၵႃႈၼိူဝ်လိၼ်လႂ်၊ ၼူၵ်ႉၵၢင်ႁၢဝ်လႂ်၊ တရိၵ်ႈသၢၼ်ႇဢၼ်ဢသၢၵ်ႈလိပ်းယူႇလႄႈ ၸၢင်ႈၵႂႃႇၸၢင်ႈၵၢၼ်းၵႃႈၼိူဝ်လိၼ်လႂ် ၵႃႈမီးတင်းသဵင်ႈတင်းလူင်ၵေႃႈ၊ ၵဝ်ပၼ်တူၼ်ႈယိူဝ်ႈတူၼ်ႈယႃႈၵူႈမဵဝ်းပုၼ်ႈဢၼ်ၶဝ်တၵ်းၵိၼ်ဢေႃႈ၊ ဝႃႈၼင်ႇၼႆလႄႈ ၸင်ႇပဵၼ်ၸိူဝ်ႉၼင်ႇၼႆဢေႃႈ။- 31ၽြႃးပဵၼ်ၸဝ်ႈလူတူၺ်းၵႃႈဢၼ်မၼ်းၸဝ်ႈႁဵတ်းပဵၼ် တင်းသဵင်ႈတင်းလူင်သေယဝ်ႉ၊ ႁၼ်လွင်ႈဢၼ်ပဵၼ်ဢၼ်လီၼႃႇလူင်လၢင်လႄႈ ပဵၼ်ႁူဝ်ၶမ်ႈပဵၼ်ႁူဝ်ၼႂ်၊ ဝၼ်းသႃႉထမႃႉဢေႃႈ။

Zur Zeit ausgewählt:

ငဝ်ႈၵမ်ႇၽႃႇ 1: CBMS

Markierung

Kopieren