Seemthawhnak 12
12
Abraham Kawhnak
1 Bawipa ni Abram cu, “Na ram leh na rualsan leh na pa ih innsang matain ka tan hmuh thokmi ram ah tat. 2Miphun pipa ah ka tan vua thok, cun ka tan thluasuah thok ih na min thangin ka vua thok, cuticun thluasuahnak ah a cang taw ci. 3A tan thluasuah tu cu ka thluasuah thok ih a tan camkha tu cu ka camkha thok; culeh namah thawngin vulei cung miphun hmawhhmawh thluasuahmi an i thok,” tiah a ti.
4Curuangah Abram cu Bawipa ih sim mangin a tat; cun Lot cu amah rum an tat. Abram cu Haran in a pawh ah sawmsarih leh kum nga a ti. 5Abram ni a nupi Sarai leh a naupa Haran ih tiapa Lot pita hngai in an khawlmi ngeihsiah zate, Haran ah an ngeihmi an salpawl rum Kanaan ram laah tat ding cun a thawhtia. Kanaan ram an phat tikah, 6Abram cu Shekhem timi hmun, Moreh ih khukkhih kung a pha. Acui caan ah Kanaan mi cu ram sungah an om. 7Cutikah Bawipa ni Abram hemah langin, “Na ciitlang hemah ahi ram hi ka pia hngai thok,” tiah a ti. Curuangah Abram ni acunang ahcun a hemih lang tu Bawipa caah pakawh a don. 8Acunang cun Bethel nisuahnakla tlang ram ah a thawntia ih, vapinla ih Bethel leh vongpinla ih Ai khua lakkarah puanthlaam a sa; cun acunang ahcun Bawipa caah pakawh a don ih Bawipa ih min koin a bia. 9Culeh Abram cu thlangla Negeb tiang a thawntia miarmo.
Abram leh Sarai Izipt ah
10Kanaan ram sungah mangṭaam a tlung. Curuangah Abram cu Izipt ram ah tluangmi in khuasa dingah a zong tat, icatile ram sungah mangṭaam a rauh. 11Izipt ram a luh samte ah a nupi Sarai hemah, “Nang hi numi hmelṭha na ii ti ka tiah; 12Izipt mile ni an tan hmuh tikah, ‘Hihi cu a nupi a ii’ an ti thok; cutikah a ma that hngai thok, nang zong cu an tan zuah thok. 13‘A tarnu ka ii’ ti la, namah ruangah ka sul tluang in, namah ruangah ka nunnak zuah a i taw,” tiah a ti. 14Abram cu Izipt ram a luh tikah Izipt mipawl ni a nupi cu a mawi vuai ti an hmu. 15Faraoh ih rianṭuan bawile ni acu nu an hmuh tikah Faraoh hngan ah an lawm. Culeh Sarai cu Faraoh ih inn ah hruaitaak a ii. 16Culeh amah nu ruangah Abram cu ṭhateih zoh a ii; cun tuu, cawpe, laak pamipawl, pami leh numi salpawl, laak numipawl, kalaukpawl a ngei hngai.
17Ihmansela Abram ih nupi Sarai ruangah Faraoh leh a innsang cu a rauhmi tiahhrinsiapawl a tuarsak hngai. 18Curuangah Faraoh ni Abram cu koin, “Ka parah itu ti zetzo ci maw? Ituruangah ani cu na nupi a ik a ma sim lo? 19Ituruangah ‘Ani cu ka tarnu a ii’ na ti ta? Curuangah kovawh ka nupi ah ka lattiak. Atu na nupi hi pita la tat,” tiah a ti. 20Culeh Faraoh ni a milaipawl cu Abram ih thuhla ah thu a pia hngai ih anmimi ni a nupi leh a ngeihmi zate rum an ṭhawl.
Zur Zeit ausgewählt:
Seemthawhnak 12: KHBF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Khualsim Holy Bible © Bible Society of Myanmar, 2021.
