ROME 16
16
Pumpak Vaihlahnak
1Cencherae khua Pawlpui ai napertu kin farnu Phoebe heh ning lingthiammi i selai i daih i. 2Pathian sangtute ai bawn tuhhnak a i bangin Bawipa ai hming in ani tu cosang tu ilai bawm tuh kul lekhaw bawm tu ih. Ani tu mi tampui caah ituseh, rualpui pha, mi hnempui ngai i.
3Khrih Jesuh naruaihhnak ah kin naperpui Prisilla le Aquila hnuksat ing.#Nal 18:2 4Anite tu kaimah caah a thi ngamtute i. Anite vumah anghnak tampui nai ing; kaimah ian in ilo ai Gentile pawlpuite veksen in amahte vumah ang tlang ngai i.
5Amahte inn ai a khawmtu Khrih pawlpuite khai hnuksat ing. Asia ram songin Khrih a sang hmasabertu i ithnak i rualpui Epenetas khai hnuksat ing. 6Ning caah naper khung ngaingai a pertu Mary khai pon ing. 7I Judah phunpui le kaimah thawn thawng a totu ve Andronicus le Junia khai hnuksat ing. Anite tu hnuahlunte ai lingthiam ngai mite i ai kaimah hlanah Khristian cang kawm zo i.
8 Bawipa ai pawlkomhnak songah i rualpui pha Ampliatus hnuksat ing. 9Khrih ca naruaihhnak kin ruaihpui Urbanas khai hnuksat ing, i rualpui Stachys khai hnuksat ing. 10Khrih sanghnak ah rintlak ngaingai mi Apelles khai hnuksat ing. Aristobulus innsang ai umtute hnuksat ing. 11I Judah phunpui, Herodian le Narcissus innsang ai umtu Khristian unaute khai hnuksat ing.
12 Bawipa ca naruaihhnak ah zuam ngai ai pertu Tryphaena le Tryphosa khai hnuksat ing, cen Bawipa caah tampui a pertu i rualpui pha Persis khai hnuksat ing. 13Bawipa ca ai naruaihhnak ah pha cuang ai napertu Rufus le a fapa ngaingai bang ai phantak ngai in i siktu Rufus ai nu khai hnuksat ing.#Mar 15:21 14Asyncritus, Phlegon, Hermes, Patrobas, Hermas, le amahte hnenai Khristian unau dangdangte khai hnuksat ing. 15Philologus le Julia, Nereus le a farnu, Olympas le amahte thawn umtu Pathian ai minungte khai hnuksat ing.
16Pakhat le pakhat thuthnak thianghlim thawn hnuksatdun tu ih. Khrih ai pawlpui hmuahhmuah hnuk ning sat i.
Hnuataber Thucahhnak
17U le naute, khekdunhnak a suahpuitu le sanghnak a buaitiartu le ning pom cia zirhhnak a dotute khiah ralring tu ih tiin ning forh ing. Anite tu kom mah ih. 18Ciabang thil a bawntute tu kin Bawipa Khrih naruaihtute ilo i; amahte pumpui ca pertute i. Ponka nal le mi porhthiamhnak in mi zaran pawl heh zawl sek i. 19Mi zongzong in Thuthangpha ah rinsantlak in um heh ning ling zo sek ing; ciamanin kaimah khai ning vumah i ang ngai i. Phathnak lamah fim tu ilai a pha lohnak ahcen zaikhai ling mah ih ti i daih i. 20Cen kin daphnak hampui Pathian in ning ke hniaah Satan heh rial cing tuh i.
Kin Bawipa Jesuh ai ninghiohnak ning hnenah um tuseh.
21I naperpui Timothy in hnuk ning sat i. Ciabang thotho in kin Judah phunpui Lusius, Jason le Sosipater in hnuk ning sat tlang i.#Nal 16:1
22Hemi lai ngantu kaimah Tertius in Bawipa songah hnuk ning sat ing.
23Pawlpui pumkhawmhnak ah a inn hmang dehnak inntu pa Gaius in hnuk ning sat ve i. Hemi khuapui tangka kiltu Erastus le kin unau Quartus in hnuk ning sat kawm ve i.#16:23 Tu Kutngan Greek laibu tam sawn ah 24hnak heh um lo i. A hrek ah um ai “Kin Bawipa Jesuh Khrih ai ninghiohnak tu ning veksen vumah um tu hram seh. Amen,” tiin um i. A hrek lala ahcen 27 thawn pehcih i.#Nal 19:29; 1Cor 1:14; 2Tim 4:20 24Bawipa Jesuh Khrih ai ninghiohnak tu ning veksen vumah um tuseh. Amen.
A Hnuataber Thangphathnak
25Pathian hnenah thangphat songlawihnak pe ngasing. Amah tu Jesuh Khrih ai Thuthangpha i aupuihnak le a liam sa san tampui songah thup in um napui tunai phuanghnak thuthuk thawmin ning sanghnak songah kho ngai in ning dingruaitu i. 26Tunin cia thutak heh prophette ai lainganhnak thawmin mi zongzong ai hmaiah larruai zo i; cen kumzangza a nungmi Pathian ai thupehnak thawmin ciami thu tu aisusu inkhai sang ai hlun tuhin miphun hmuahhmuah hnenah phuang zo i.
27Thu hmuahhmuah ah fim ai amah ian Pathian a imi hnenah Jesuh Khrih thawmin thangphathnak kumzangza in um tuseh. Amen.
Zur Zeit ausgewählt:
ROME 16: RZB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Zanniat Bible © Bible Society of Myanmar, 2018.
