NALANGTE 27
27
Rome Ah Paul Feh I
1Italy ah lawng in feh tuhin thu relcat fangin Paul le a dang thawngto mite tu Rome ralkap “Kumpibawi Ralkap Burpui,” tihnak hotu Julius kut ah pe i. 2Asia ram lawng cawlum hmuncang ah com kong tuh zianzo ai Adramyttium khua ai kawihnak lawng to in feh i ing. Macedonia ram Thessalonica khuami Aristarchus khai kin hnenah tel ve i. 3A thangha fangin Sidon hleng i ing. Julius tu Paul vumah ninghiohnak thinlung nai ai Paul tu a kulhnak thilrite a ngahthilhnak tuhin a rualpuite leng le tawk thilhnak can khai pe i. 4Ciata in feh ai hlivua kinmah lam lolek ah zuang manin Cyprus tikulh hli uaphnak lamin feh i ing. 5Tifingriat khiah Cilicia le Pamphylia zawn in tan tlang ai Lycia ram Myra khua hleng i ing. 6Ciata ah ralbawipa in Alexandria in Italy feh tuhhnak lawng hmu ai cia lawng in i fehruai i.
7Fung niuniu in feh ai ni tampui kin rai hnuaah a tawphnak ah har ngai in Snidas khua zawn hleng i ing. Ciata lam hlun in feh tuh hlivua in kin kham manin Crete tikulh laipua ber hli uap lamin feh tlang ai Salmon ram zum hiang in lan i ing. 8Tifingriat kam nong in feh zianzo ai harsa ngai in himhnak Lawng Cawlum Hmun tihnak hleng i ing. Ciami tu Lasea khua in hla lo i.
9Ciata ah a raipui com tlang ai Sualtlanhnak Nia#27:9 ‘Sualtlanhnak Nia’ heh (Day of Atonement) September hla bo lam ihlahle October hla thar sawng dung ai bawn dehnak puai i. luan zo ai lawng in khualtlawng heh a laukul ihang. Ciamanin Paul in hetihin amahte hnenah ruathnak pe i: 10“U le naute, heta in kin lampui tu a laukul tuh i. Ning phurhnak thilri le lawng heh hnawmhnak tawk tuhai kin nunhnak khai pai tuh i,” tiin ti i. 11Ikhalselai Paul ai relhnak tahin lawng naitu pa ai relhnak sawn khiah ralbawipa thinlung songah lut i. 12Ciami amahte lawng cawlum hmun heh khuasik cu ahcen umhnak pha lo manin mi tamsawn in cang thil lekhaw Phoenix hleng tian feh lawlaw selai ciata ah khuasik cu song um nuam i. Phoenix tu Crete tikulh ai lawng cawlum hmun i ai hlang lam nitlak lam le sak lam nitlak lam hoi in um i.
Khuahupui Zuang I
13Hlang lamin simhli nemniu zuang ai a tumtekhnak bangin feh thil tuhin ruat tlang i. Ciamanin lawng henhnak thirkawn khiah ti songin duk ai Crete tikam nong zianzo in feh i ing. 14Ikhalselai a rai hlanah, “Nisuah Sak lam Zohlipui,” roh ngai in Crete lamin zuang huho i. 15Kin lawng khiah sep ai cia hlivua tu pel thilh nawn lo manin vansang in um tlang ai kin lawng tu hlivua sephnak cangah feh menma i. 16Kauda tikulh ai hlang lam kin hleng fangin hli in ber deuh manin a zia um deuh i. Ciata ah harsa ngai in lawng ai a kenghnak khawm khiah rem deuh in dah i ing. 17Lawng vumah khawm heh duk tlang ai rihual in lawng ah kho ngai in pen i. Libya ram tikam hiangai ti songai runsiat tlangtluan pah tuh lau manin lawng heh a ponzar hla ai hlivua hoi hmunah fehruai i. 18Khuahu zuang thotho ai a thangha ah lawng ai phurhnak thilri hrekkhat tu ti songah lon i. 19A tit nia fangin lawng ai thilthuam hrekkhat lon i. 20Ni tampui song, ni le arsite hmu thil lo i ing; hli tu a roh ngai in zuang thliahthlo i. A tawphnak ahcen nung tuh khai umlamhnak nai nawn lo i ing.
21Lawng vumai mite tu ni tampui um hnuaah a hmaiah Paul ding ai, “U le naute, i thurelhnak ngai ta i silai Crete tikulh in feh loin um singlai hebang hnawmralhnak tawk tuh lo ising. 22Ikhalselai tunah ning thinlau mah ih, tiin ning rel ing. Lawng tu kin sung tuh napui kinmah kin nunhnak tu kin sung tuh lo i. 23Zaimantifangin mizan ah i naitu le i biahnak Pathian ai vancungmi i hnenah lar ai, 24“Paul, lau mah! Rome kumpibawi hmaiah ding kul tuh isi! Pathian na vumah a pha manin nangmah thawn a fehtute heh pakhat khai thi loin amahte nunhnak zuah tuh sio i,’ tiin ti i. 25Ciamanin u le naute, lau mah ih! Zaimantifangin kaimah in Pathian rinsan ai i relciahnak bang rori in cang tuh i. 26Ikhalselai tikulh pakhatkhat ah hli in kin sep tuh i,” tiin ti i.
27Zan hlaili khim zo i, Mediterranean Tifingriat ah khuahu in kin hual dekdo i. Zan seulai dung ah lawng kiltute in laipua thawn kin nong hang tiin vuah tlang i. 28Ciamanin rihual in thirtum khit in hla tlang ai ti tu pi za le pi kul thuk i. Cia hnuaah hla lehthio ai pi sawmkua i. 29Lawng in lungpui sawh ngah mawh ngai ti lau manin a khel lamin a penhnak thirkawn pali hla tlang ai sawngen kongin khuavar tuh iang tlang i. 30Cen lawng naperte tu tlan tum i; khawm khiah ti songah hla tlang ai hmai lamin a penhnak thirkawn hrekkhat hla tuh bangin um tlang khel i. 31Ikhalselai ralbawipa le ralkapte hnenah Paul in, “Lawng kiltute lawng vumah um hlah lekhaw ning nung tuh umlam tuh um lo i,” tiin ti i. 32Ciamanin khawm penhnak rihualte heh ralkapte in sat ai vokkuang lawngte tu lanruai sek i.
33Khua a var hlan deuh ah Paul in rong ai tuhin ruai i: “Ni hlaili song thinlau in um zo ai he song hmuahhmuah ah zaikhai ai lo i si. 34Ninghioniu in rong a tlawmniu tal ai tu ih. Ning nunhnak tuhin kul i. Ning lu vumai samfang pakhat khai pairal tuh lo i,” tiin ti i. 35Ciatihin a ti hnuaah Paul in sang tlawmniu lang ai a veksen hmaiah Pathian hnenah sawngen ai sang khiah khan ai ai i. 36Midangte khai thintha tho tlang leh ai rong tlawmniu ai tlang ṭen i. 37Lawng vumai a umtu kin veksen in zahnih sawmsarih le paruk i ing.#27:37Hemi 276 tihnak heh kutngan laihnahzual hrekkhat ahcen 275 tiin um ai a dang hrekkhat songah 76 ti inkhai um i. 38A cateng ai hnuaah sangvut hmuahhmuah khiah tifingriat songah lon sek ai ciatihin lawng khiah zangruai deuh i.
Lawng Hnawm I
39Khua var fangin lawng kiltute in tikam hmu tlang ai akon ram i ti ling thil lo Ikhalselai tikel ai tikam pakhat hmu ai cang thil lekhaw ciata ah lawng comruai tum i. 40Ciamanin lawng henhnak rihual sat ai thirkawn heh tifingriat ah hla i; cen lawng cawkhnak rihual ai penhnak hawk i. Cen lawng hmai lam ber ah a ponzar khiah zar ai hlivua in hmai lamah hmut manin tikam lamah feh i ing. 41Ikhalselai lawng in siatnawi pah ngah ai khoi sek i. A hmai lam tu siatnawi songah dawt meng ai mer thil nawn lo i; A khel lam tu tilep in hual dekdo ai tawng lio i.
42Ralkapte in thawngto mite khiah tileuh tuhai tikam hleng fangin tlan tuh sio lau manin rek tuh sek in ruat i. 43Ikhalselai ralbawipa in Paul khiah hup nuam manin kham i. Cen tileuh thiam pawl tu lawng in theuh tuhin le ti kamah leuh tuhin thupe i. 44A tanglaitute in thingpek le lawng kehhnak thingpekte lep in hlun tlang i. Ciatihin kin veksen in ti kamah himniu in hleng i ing.
Zur Zeit ausgewählt:
NALANGTE 27: RZB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Zanniat Bible © Bible Society of Myanmar, 2018.
