NALANGTE 20
20
Macedonia Le Achaia Ram Ah
1Cia thubuai tu dap ai Paul in sangtute tu hmunkhat ah kokhawm ai thapehnak pongkam in a forh hnuaah hnuksat ta ai Macedonia lamah feh i. 2Cia ram dunghlun tlawng zianzo ai thapehnak rel betbo i. Cen Achaia#20:2 Achaia tihnak tu tun san Greece ram i. hleng ai, 3Ciata ah hla thum um i. Syria ah feh tum napui, a pai laitak ah Judah mite in a zuar tum thu a ling manin Macedonia lamin let tum leh i. 4Berea khuami Pirhas ai fapa Sopater le Thessalonica khuami Aristarchus le Secundus, Derbe khuami Gaius, Asia ram in Tychicus le Trophimus, le Timothy inkhai paul fehpui tlang i. 5Amahte feh lak songah Troas khua in kin iang tlang i. 6Col Tello Sang Puai a bo hnua Philipi in lawng thawn feh tlang ai ni nga hnuaah Troas ah man ilai ing. Troas ah zarh khat cam i ing.
Paul In Troas Hnuataber Tlawng I
7Cani nia zan lamah pawlkomhnak zanfak ai tlang tuhin taikhawm tlang i ing. A khawmtute hnenah Paul in thu rel ai a thangha feh tuh hang manin zan seulai tian thurel i. 8Vumta khan ah khawm ai maikhuat tampui var bial i. 9Eutychus tihnak tlangval pakhat tu dawngkhamniu ah to ai Paul in raipui thu a rel fangin a mitmu sung deuhdeuh ai hnuavai fangin mitmu ngah lio manin cia inn thuah thumhnak in laipua lakah tlok i. A khul tlang fangin thi zo ihang. 10Ikhalselai Paul khai tolh taito ai cia tlangval pa heh huam vut i. Paul in, “Ning thin lau mah ih, nung lai i,” tiin ti i. 11Cen Paul tu vumta khan ah kai leh teu ai sang khiah khan ai ai tlang i, Paul tu a rai roh, zing lam nisuak tian thu a rel hnuaah feh i. 12Cia tlangval pa tu a nung in a inn ah tlun leh ai thinnuam tlang ngai i.
Troas In Miletus Ah
13Lawng vumah kai ai cia lawng thawn Assos khua ah feh tlang i ing; Assos ah Paul sawm kong tuh i ing. Ciatihin sawm kong tuh heh amah in kin rel cia i, zaimantifangin lai lampui in ani tu feh cia zo i. 14Assos ah Paul tawk tlang ai kin lawng vumah toruai ai Mitylene ah feh i ing. 15Mitylene in suak ai a thangha ah Khios hleng i ing. A tit nia fangin Samos hleng ai a thiam nia ah Miletus hleng i ing. 16Paul in Asia ramah a rai cam tuh nuam lo manin Ephesa lan tuh teu tum i. Cang thil iselai Pentecost nia khel in Jerusalem ah hleng nuam taito i.
Paul Ai Hnuataber Thucahhnak
17Paul in Miletus mi hlat ai Ephesa khua pawlpui upate in amah tawk tuhin thucah i. 18Amahte hleng fangin Paul in, “Kaimah Asia ram hleng ai a ni khathnak nia in i can hmuahhmuah ning hnenah zaitin hmang ing ti ling sio hlen i si. 19Thinniamhnak le mithli thawn Bawipa ruaih ai Judah mite ai engsanhnak khai har fualfo in tuar ing. 20Zapui hmaiah ituseh, ning inn songah khai ituseh, thurelhnak can i nai fangin ning caah bawmtu tuh hmuahhmuah in zaikhai sup loin rel ing tikhai ling i si. 21Judah mite hnenah ituseh, Gentile mite hnenah ituseh, amahte sualhnak zam in Pathian hnenah let tlang ai kin Bawi Jesuh sang kul hrimhrim tiin i rel lek zolo in ralringhnak khai pe ing. 22Cen tunah Rauhla Thianghlim ai hoihnak hlun in Jerusalem ah feh tum ing; ciata ah ziang i cang tuh i ti zaikhai ling lo ing. 23Khua cangcang ah thawngtoh le harsahnak ian in i iang i, ti ian Rauhla Thianghlim ai ralring pehnak thawmin ling ing. 24Ikhalselai kaimah caah i nunhnak heh zaikhai siar lo ing; Bawipa Jesuh in bawn tuhin i ruaihnak Pathian ai ninghiohnak Thuthangpha phuang tuh ṭuanvo heh hlehsuah liang in bawn tuh sio heh i hiamhnak i.
25Ning veksen hnenah kaimah heh suk le so ah vak ai, Pathian ai Ukhnak thu ning rel ing. Ikhalselai tun tu aisu inkhai i hmu leh tuh nawn lo ihang, ti khiah ling ing. 26Ciamanin tun nia ah fiang ngai in ning hnenah phuang ing: ningmah lakah pakhatkhat ning pairal lekhaw mawh i hluk mah ih. 27Zaimantifangin Pathian ai tumtekhnak khiah suphnak zaikhai nai loin a veksen in ning hnenah phuang sio ing. 28Ciatih imanin ningmah veve kilkhawl thiam tu ilai Rauhla Thianghlim in tuurual kilkhawltu tuhin ning dah bangin ning tuurual khiah phatak niu in kilkhawl tu ih. Pathian in a Fapa thisan thawn amah caah a bawn zohnak a pawlpui khaltu cang tu ih! 29Kai i feh hnuaah a kihkul mehleng puar kawi tuhai tuurualte heh sik tuh menma lo i, ti ling ing. 30Ningmah songin mihrek in amahte lamah hoi nuam in thudonrel in sangtute heh hoisualhnak tikcucan hleng tuh i. 31Ciamanin ralring tu ilai sun tilo zan tilo mithli thawn kum thum song ning veksen in i zirhhnak khiah hai mah ih.
32Tun tu Pathian ai kilkhawlhnak le a ninghiohnak thu songah ning ap zo ing. Amah in ning khangsoruai tuhai a minungte caah a dahciahnak hmuifu khiah ning pe tuh i. 33Aisu ai tangka, sui le hnikpon khai ot awng lo ing. 34I kut rori in naper ai kaimah le i rualpuite ai kin kulhnak thil khai suahpui ve ing ti khiah ning ling sio hlenhnak i. 35Zaizongza ah roh ngai in per ai santlai lo mite bawm tuh ising ti khiah ning hmuh zo ing; Bawi Jesuh inkhai, ‘Ngah lam tahin pehnak lamah anghnak tam sawn i,’ a tihnak ponkam heh hih tu ngio ih,” tiin thucah i.
36Paul in ciatihin a rel ben fangin a khuk caicin ai amahte veksen in sawngen tlang i. 37Paul tu kuah tlang thut tlang ai cak niu in feh tu, ti kongin amahte veksen in kap tlang dekdo i. 38Aisu inkhai i hmu leh tuh nawn lo i si, a ti manin anite lungsia cuang khiah i. Cen lawng umhnak tian hla tlang i.
Zur Zeit ausgewählt:
NALANGTE 20: RZB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Zanniat Bible © Bible Society of Myanmar, 2018.
