NALANGTE 12
12
Reemhnak Tam Amam I
1Hemi can dungah kumpibawi Herod#12:1 Herod tu Judea ram veksen uktu Herod Agrippa i. AD 31 ai panin Sak lam Transjordan ukhnak ram Philip ukhnak ram khiah co ngah ai AD 41 in 44 tian Judea ram veksen uk i. A pu tu Herod Lian i. in Pawlpui songai Khristian hrekkhat reem pan ihang. 2John ai upa James khiah vangsau hmangin rekruai ai, 3ciami in Judah mite angruai i ti a hmu fangin Peter khai pomruai i. (Hemi tu Col tello Sang Puai bawn laitak ah i). 4Peter khiah pom ai thawng ah toh i; thawnginn kiltu ralkap bur li um ai bur khat ah ralkap pali ṭen um i; ciamite in kil tuhin amahte kut songah pe i. Kansuak Puai ben fangin zapui hmaiah a thu rel tuhin Herod ai tumtekhnak i.#Luat 12:1-27 5Ciatihin Peter tu thawng songah dah i, ikhalselai amah hrangah pawlpuite in Pathian hnenah a roh ngai in sawngen tlang i.
Thawng Songin Peter Suak I
6Herod in a thangha misenpui hmaiah Peter ai thu rel tuh a ti nia zan ah Peter tu thawnginn kiltu ralkapte pahnih lakah it i. Thir cikcin pahnih in khit ai thawnginn dawngkham khai kil tlang sio i. 7Mangrin loin Bawipa ai vancungmi dak ai amahte ithnak akhan heh tleuhnak in det ai varruai i. Vancungmi in Peter khiah a kodar in hlin ai, “Rang ngai in tho tu!” tiin phawr i. Ciasawng ah a zawngngel ai thir cikcinte pilh berh i. 8Cen vancungmi in, “Na elpen pen tulai, na kedawl khai dawl tu,” tiin ruai i. A ruaihnak bangin Peter in bawn ai vancungmi in, “Na pon sil tulai i hlun tu,” tiin ti i. 9Peter inkhai hlun ai thawnginn pualam ah suak i; vancungmi in ciatihin a bawn khiah thungai in ruat lo i; larhnak hmu i tuh ing, tiin vuah menma i. 10Ralkapte ai kilhnak dawngkham pakhat kan i, cen pahnihhnak khai kan thotho i. Hnuavai fangin khuapui song thawn pehdunhnak thir kotka tihnak ah hleng kawm i. Ciami kotka tu amahte caah a hong cia in um ai a pahnih in suak kawm i. Lampui in feh zianzo ai mangrinlo in vancungmi tu pai ai Peter lek tang i.
11Ciafangin a vumai a canghnak thilte tu fiang ngai in ling ngah ai, ‘Tun tu a cang taktak i, ti ling ngah zo ing! Herod thunaihnak songin le Judah mite in i vumah cang tuhin a daihhnak hmuahhmuah songin o tuhin Bawipa in a vancungmi a hlathnak i!” tiin ti i. 12Thilcanghnak a ling ngah hnuaah John Mark nu Mary ai inn ah feh i; ciata ah mi tampui khawm ai sawngen tlang thliahthlo i. 13Peter in sumpua lamin dawngkham ceuh ai Roda tihnak hnenum nu tu dawngkham hong tuhin kawi i. 14Peter ai aw i, ti a ling fangin a ang ze in dawngkham rin hong loin, “Sumpua ah Peter ding i!” tiin au i. 15Anite in, “Na voi heh im?” tiin ti tlang i. Ikhalselai, a ngaingai nakhaw, ti ngio manin, “A vancungmi i natu e!” ti tlang thotho i.
16Peter in dawngkham awlcom loin ceuh pah betbo i. Hnuavai fangin dawngkham hong tlang ai Peter khiah hmu ngaingai ai ngaihsunur tlang roh i. 17Peter in dap niu in um tuhin a kut zap ai, Bawipa in thawng songin a suahhnak thute khiah anite hnenah rel i. “Hemi thu heh James#12:17 James tu Jesuh ai naupa James i. le a dang sangtute hnenah rel tu ih,” tiin ti ai suak leh ai hmundang ah feh i.
18Zing lam khua var fangin thawnginn kiltu ralkapte tu, Peter ziang cang ini, tiin buai tlang ngai i. 19Peter si tuhin Herod in thupe i; ikhalselai hmu tlang lo i. Ciamanin thawnginn kiltute thu a liklak in zong ruai ai rek tuhin thupe i.
Cia hnuaah Judea ram in Herod khiah suak ai Ceasarea khua ah a rai thah um i.
Herod Thi I
20Herod tu Tyre le Sidon mite lakah a thinraw roh i; ciamanin cia khua mite tu Herod tawk tuhin feh tlang i. A hmasaber ah kumpibawi inn ai hotuber Blastas heh amahte lamah ṭang tuhin sawm tlang i. Cen Herod hnenah feh ai daphnak le remhnak bawn tuhin ngen tlang i. Zaimanin ciatihin ngen ini tifangin a ram mite ai rong ngahhnak tu Herod kumpibawi ukhnak ram songin ngah de manin i.
21A ni tiam nia ah Herod tu kumpibawi thilthuam in thuam dun ai a tohkham ah to ai mizapui hnenah thu rel i. 22Ciafangin mizapui in, “Hetih ai a pongtu heh minung ilo i, Pathian i!” tiin au tlang i. 23Ciasawng ah Bawipa ai vancungmi in Herod tu ur siava in urruai i, zaimantifangin Pathian khiah upathnak pe lo manin i. Herod tu hut in a songlam ai sio ai thi i.
24Pathian ai thu tu pungzai ai khang amam i.
25Barnabas le Saul tu Pathian thu phuang ben kawm hang manin Jerusalem an John Mark khiah hawl ai let kawm i.
Zur Zeit ausgewählt:
NALANGTE 12: RZB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Zanniat Bible © Bible Society of Myanmar, 2018.
