1 KORIN 5
5
Pawlpui Songai Sualhnak
1Sakhua mite inrin zakthikul tihnak nupa sualhnak ning lakah um i ti ling ing. Mi pakhat tu a pa nunawn thawn pawl dun i, tiin i rel tlang i.#Danp 22:30 2Ningmah tu ning puar le hngal cop lai i si! Lungsia in um tuh sawnhnak ilo i sim? Ciabang minung tu ning bu songin ning suah tuhhnak i.
3Kin taksa pumpui tu lamhla ah um napui i thinlung tu ning hnenah um ai ciabang thil sual a bawntu vumah ningmah lakai a um taktak bangin Bawipa Jesuh hming in thukhan zo ing. 4Hmunkhat ai ning pumkhawm fangin kin hnenai a ummi kin Bawipa Jesuh ai huham thawmin ning lakah i thinlung in ning umpui ve ai, 5he pa tu Bawipa ai Nia ah a rauhla nunohnak ngah tuhin a pumsa heh hnawmcan tuhin Satan hnenah pe tu ih.
6Ning hngalhnak heh thil pha ilo i. Santehhnak ai, “Col tlawmniu in sanghlom veksen thoruai sio i,” ti ling awng lo i sim?#Gal 5:9 7A cianghlimmi cang tuhin ning lakai a ummi col hlun sualhnak heh lon tusek ih. Ciatihin col tel loin em tharhnak sang ning cang tuh i; ningte tu col tello sang i si ti ning ling ing. Kin Kansuak Puai tuufa Khrih in hibawlhnak ah sel zo manin kin Kansuak Puai heh a pan zo ihang.#Luat 12:5 8Ciamanin kin Kansuak Puai heh col hlun sualhnak le phatlohnak thawn roih cihhnak sanghlom thawn ilo in col tello cianghlimhnak thutak sanghlom thawn bawn ngasing.#Luat 13:7; Danp 16:3
9Ning hnenah i kuat awnghnak lai songah nupa sualhnak bawn in misualte thawn kom dun mah ih, tiin ning rel zo ing. 10Ciatihin i tifangin laivum mi misualte, pamhaptute, rukote le milim biatute heh pawl mah ih, i ti nuamhnak ilo i. Anite thawn pawl dun tuh lo ti lekhaw he laivum heh hlum kul tuh lawlaw heh i sin! 11Aisu khai sangtu ti dun cing in nupa sualhnak bawntute, pamhaptute, zurite le rukote i ti nuamhnak i. Ciabang mite thawn in rong ai tuhin a to khai to tlang mah ih.
12Thungai in tifangin a pualam mi thukhan tuhhnak tu i naṭuan ilo i. A pualam mi tu Pathian in thukhan tuh i. 13Ikhalselai ning bu song mite tu amahte thu khan sah tuh ilo i sim? Lai Thianghlim in, “Ning bu songin misualte heh suah tu ih,” ti i.#Danp 13:5; 17:7
Zur Zeit ausgewählt:
1 KORIN 5: RZB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Zanniat Bible © Bible Society of Myanmar, 2018.