Fuɗɗoode 8
8
Ɓeeɓugol ilam tuufaanu
1Laamɗo miccitii Nuuhu e kulle ladde e daabaaji wuro gonduɗi e muuɗum ley laana ɗiin fuu. O waɗi henndu wifi dow leydi de diyeele ɗeen puɗɗi ɓuytaade. 2Ilduɗe mawɗe ɗeen fuu ommbii, julanɗe kammu du cukki. 3Caggal balɗe 150 ɗeen, ndiyam ɗaam ɓuytii faa famɗiti dow leydi. 4Nyannde sappo e jeɗɗi lewru jeɗɗaɓurdu laana kaan jippii hakkunde baamle Ararat. 5Ndiyam ɗaam heddii ina ɓeeɓa faa hewti go'o lewru sappoɓurdu. Nyannde go'o lewru nduun ko'e baamle ɗeen punti.
6Caggal balɗe 40, Nuuhu omti feneetere nde waɗani laana kaan. 7O yoofi daawuwal dilli. Daawuwal ngaal ina yaha ina warta faa ndiyam ɗaam re'i dow leydi. 8O yoofi wuugaandu faa o faama yalla ndiyam ɗaam famɗitii dow leydi naa. 9Ammaa wuugaandu nduun heɓaay fuu ɗo jippoo. Ndu yeccii to Nuuhu ley laana kaan, sabo ndiyam ɗaam ina heddii na hurri leydi fuu. Nuuhu foorti junngo mum, nanngi ndu, nanni ley laana kaan.
10O doomi faa balɗe jeɗɗi katin, de o yoofi wuugaandu nduun. 11Wuugaandu nduun warti to makko kiiral naange ina wuufi haakolowol jaytun#8:11Lekki kiin ina wi'ee «Oliwe» ley faransiire, nebbam ina woni e ɓiɓɓe makki. keccol. Ndeen Nuuhu faami ndiyam ɗaam famɗitii dow leydi. 12O doomi faa balɗe jeɗɗi goɗɗe, o yoofi wuugaandu nduun, de ndu wartaay to makko katin. 13Nyannde go'o, lewru go'oɓurdu, ndiyam ɗaam hoorti. Nyannde ndeen tawi duuɓi Nuuhu wo 601. O omti laana kaan, o ndaari o tawi leydi sunndii. 14Nyannde 27, lewru ɗiɗaɓurdu tawi leydi ndiin yoorii.
15Laamɗo haaldi e Nuuhu, wi'i:
16— Njaltee laana kaan, aan e jom suudu maa e ɓiɓɓe maaɗa worɓe e deekiraaɓe muɓɓen. 17Ko wuuri, ko tagaa ko wondi e maa fuu, njaltida e maaɗa. Ɗuum woni pooli e daabaaji e ko wuuri ko ladata fuu. Ɗi ndima faa heewa, ɗi ɓeydoo faa ɗi ɗuuɗa ley adunaaru. Ɗum woni pooli e daabaaji e ko wuuri ko ladata fuu.
18Nuuhu yaltidi e jom suudu muuɗum e ɓiɓɓe muuɗum e deekiraaɓe muɓɓen. 19Daabaaji ɗiin e ko ladata e pooli, ko wuuri ley adunaaru, ngel fuu e sii muuɗum, mburtii ley laana kaan.
20Nuuhu mahani Joomiraaɗo sakkirde. O itti ley daabaaji dagiiɗi e pooli dagiiɗi ɗiin fuu, o hirsi, o waɗi sadaka buleteeɗo dow sakkirde ndeen. 21Joomiraaɗo nani uurngol mbelngol, de wi'i ley miilo mum:
— Mi huɗataa adunaaru saabe ɓii-Aadama katin, sabo ɓernde muuɗum ina anniyoo ko boni gilla wo cukalel. Mi halkataa ko wuuri fuu katin hono no ngaɗunoomi noon.
22Haddi fuu leydi na heddii
aawre e tayri,
jaangol e nguli,
ceeɗu e ndunngu,
jemma e nyalooma,
fuu celataa waɗude.
Zur Zeit ausgewählt:
Fuɗɗoode 8: FBF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© SIM International 2012, 2022
