LUKA 9

Yesu goojeakta giinealan damaniyeenya

(Mat 10:5-15; Mar 6:7-13)

1Hean gaguursa ginealangaaschi atamaniyeenya ak ghoadaw uurda ea gheambalmeeda jea goobala meangeenda sean ea giiheapta geeyoonung'weaka, 2Goojeakta gaweay gwarukwiida sugoocheanduumeeda ASEETA, nea ghoahaap fuga miyeani. 3Gwayeesha saawa, “Adoayaadi geadi gil iyooweayi bareanyeeka, eara haleanjeeda, ghana shageeda, ghana mukaate, ghana lapiya ak ea adoalasi hang'weaka iyeenya. 4Gheeda jea ahita wassean, oopiidana, ea eaghus ea noang'ami ng'eang'da nyaawa. 5Nea iyoahiti heeda meegasseegwa, iyooriteawi mujiineedida ghoalalakti birjeanda mida geeshangeagwa ak gayghoah muuwuunooda aba badahuuka nyaawa.” 6Hean ghang'eatng'eat gaweay gharang'weaka gwarukwiida Giijasta Miy nea ghoahaap fuga miyean aba hiji nyooh ghwahita.

Herode moapta ng'eanyi

(Mat 14:1-12; Mar 6:14-29)

7Hean iiyiy sugoocheanda was Herode iita ng'asheega sean sisin, hean gwahirbaban, aba gideaba gwayi fuga mwaatkwa siituuna Yohana jeeda miyeeda, 8nea mwaatkwa gwayeena niihiimu geaw Eliya, nea suuk gwayeena niduudu sibaneeda bea gea ghayi bea garayi. 9Nea Herode niny gwayeena, “Yohana ghayi naalaji gheata; nih ghamneawa gajea ng'eaha eayiing'si badayda ng'asheesu seaniin?” Hean gagasa ghwadaa.

Yesu ghoang'aata fih sagalamnyooji muut

(Mat 13:21; Mar 6:30-44; Yoh 6:1-14)

10Muchu ea nibiigu Giijasoodigaaschi gwarukusa iita ginisin. Ghwaat saawa ea ghwahita mujiineeda siguura Betsayda. 11Iidu nea gwajeeng'u eemeetuw, geayaat geeshta; ama sihita ghwadeapta saawa ak goobaloola iita sugoocheanduumeeda ASEETA, ak ghoahaap fuga gasa giiheapta. 12Iidu nea niriikghta gamikta; ghapka giinealanga ak gwayeesha niny, “Siksiina buuneeda gaweay gharang'weaka ea jeeda ng'eanyiida gagasa gichea ghwaak; aba gideaba hiji geendi heeda manda sih.” 13Gwayeesha saawa, “Oatawa agooga buuneeda gichea ghwaak.” Geeyeesha, “Meendeawani gil geaghus mukaataji muut ea ghweayi iyeenya. Geaghus eeweaya eashaaha hamiteaba fiisu seaniin.” 14Abeeda fiisu headiga ak ghwahit ea sagalamnyooji muut. Hean gwayeesha ginealangaaschi, “Anung' goobiitpiit nea gwasina gharmucheeka eata fih haradam atamanamughuush.” 15Ak gwasinda gidarukteayda, ghwanung' goobiitpiit sean. 16Ng'ata gageanu mukaatajeegiga ghwanyawa amuudiin ea ghweayeegiga ghwanyawa asiyeenyean ak gagatkat gheanyangaaschi googeal humng'eeda, ak gabadiischeesa ak ghabanajaada, ak ghoadaw ginealangaaschi ghoang'aataawa eemeeda. 17Gweagiischi sean ea gwalang'u. Geeweamu gheaptanga banajanga ak ghwanyiit sooscheew damaniyeenya.

Betaro goodeaga geaw Yesu

(Mat 16:13-19; Mar 8:27-29)

18Eaweecha nea ghamwaash ASEETA nea gabwageaw, nea abeeda gwandeayi sea ginealangaaschi; hean ghoanyaash nea gwayeesha saawa, “Heapi buuneeda iibalool gwayeena geawooschi ng'eaha?” 19Ghwasha Saawa nea gwayeesha, “Gwayeena guwoosi Yohaneeda Abaatiisachi; gwayeena suurja Eliya; nea suuk gwayeena guwoosi siyagi aba jeeda sibanga ghayi bea garayi niduudu.” 20Hean gwayeesha saawa, “Ama agooga gooyeenyi geawooschi ng'eaha?” Ghwasha Betaro nea gwayeesha, “Ang'iing'i guwoosi Gristoyda ASEETA.”

Yesu gabaloola iita sawanadeadaanyi ea miyeadaanyi

(Mat 16:20-28; Mar 8:30—9:1)

21Gwareekusa nea gwayeesha, adiidu goorukusi sih ng'asheanji, 22Gwayeesha, “Orjeeda Siida gayghwanyas sawanadeeda ng'waan muuchi, nea gayghaheawa gweargwa ea ashoohoodiga hees ea ng'oorshoodiga, ak gajeenuus, ak gaygwaduudu eaweeteaba samwagu.” 23Ak gwayeesha buuneesean, “Siida wassean iigasa gweadu geeshteanyu, ea ada gwasamsa geaw, ak gageanu beehiidaanyi ghwasar galeagasean ak gweadu geeshteanyu. 24Aba gideaba siida wassean iigasa gwalealu eaweagaaschi gaygabeagu, nea siida huteawi eaweagaaschi aba badaydeanyu gaygwalealu. 25Siida gaygwaloosa naaha iinyas haleanjeeda sean bea muunda ng'eanyiida ak gahuteawi eaweagaaschi? 26Siida isinnean gheanyanga ea ng'asheegeasu, eara niny gaygwasissa gheanyanga Orjeeda Siida, damanda jea ghwahina aba giighaambiitaanyi ea dea Bwaabwa ea dea malaykajeega ghaydidi. 27Aba huumwa gaydarukuneegwa gideaba aba jeeni iteang'wean gwanda fuga miinaada aba hiji maygwasamu miyeeda ea eaghus ea nidaah sugoocheanduumeeda ASEETA.”

Yesu ghwayamwa oormeeda

(Mat 17:1-8; Mar 9:2-8)

28Ng'ata eawooji sis nea ghoahiit baloolda gaguursa Betaro ea Yohana ea Yakobo, hean gaweay uhuumba giijeeda ghamwaash ASEETA. 29Damani Moasheewa ASEETEAN, ghwayamwa oormeeda nea eara hang'weakaaschi gaweeriidi muuchi ea gameeng'meeng'i. 30Hean gabalool sea fih iyeenya, Musa ea Eliya, 31fiisu ghwahidu nea goodeana giigheambiita ak gabaloola badayda miyeadaanyi, jea gwasa aba Yerusalemu. 32Aba damani Betaro ea orjooga suurja ea niing'waay ruweanga muuchi, ama ng'eatng'eat ghwadaah giigheambiitaanyi ea fuga asiyeenya miinaada sea niny. 33Iidu nea gwasimsa fiisu beata gwayeesha Betaro Yesu, “Siida haw ghwanyawa gahaguuw ea meang'amwani hiji; anda meesini udahabeascheew samwagu aba hiji, dea mabeanyi ang'iing'i niirja gaba Musa nea niirja gaba Eliya”; nea niny abeeda mwanala eara gidarukuta. 34Damani baloolean, ghwahidu shamooghooda ak gwadukuta; ghabeal iidaah nea gwadukuta shamooghooda. 35Ghwanya ghuuta nyaasha jeeda shamooghooda, nea gwayi, “Nih Orjeedeanyu aaloachi, ooleeysiiniit niny.” 36Ng'ata nyeashi, geadaah Yesu ak ghwahit. Hean ghwasiinda ak ea meerukusiina sih aba eawoojigiga ng'asheega dea.

Yesu ghoahaap orjeeda bearji meangeenda

(Mat 17:14-18; Mar 9:14-27)

37Muchu nea ghwararang'aana uhuuda giijeeda, gwaroonyi eemeeda saang'a. 38Ng'ula, gwarina Sih jeeda eemeeda ak goojuur nea gwayi, “Giinealshoocheanda, geamuscheey ang'weersiina orjeeni iteanyu was haghasheedean; 39ng'ula inyeesa iibalaksa meangeenda ghwanung' goojuur, ak ghoahiil nea gwarina ghuuta furghooda, ak gwasawan muuchi, nea magassa gwariteawa. 40Iyeayeeshi giinealangaagu ooruuta, ghwaraay.” 41Ghwasha Yesu nea gwayeesha, “Ea fuga mandeawana masaweega was jeacheenga roodeadi, ak gaydeabiita heedeang'wa ea ghoah eeju? Eani orjeeni hiji.” 42Damani wunaan, ghwanung' meang'nyeandeenda ghoabeada ak ghoahiil. Ak goojuursa Yesu meangeenda muy, ak ghahaap orjeedida ak ghoadaw ghwaan. 43Ghahamng'eanyi sean iisidaa uurda haw bea ASEETA.

Yesu gabiikta gabaloola ng'asheega miyeadaanyi

(Mat 17:22-23; Mar 9:30-32)

Damani duu ghahamng'eanyi aba haleanjeeni siniin, gwayeesha ginealangaaschi, 44“Anung' gaweay ng'asheesu jeesinga iidigeagwa; aba gideaba Orjeeda Siida gajeayiin geatinga buuneeda.” 45Ea mwanala ng'asheanji sirukusean, aba gideaba sifunya saawa, ak abeeda ea majeeng'na; ak ghoawal ghoanyaash niny iiteaba ng'asheanji.

Siida haweewa sean ng'eaha?

(Mat 18:1-5; Mar 9:33-37)

46Iidu ghoaptu sheang'nyeeda eegasa eanal siida jea gwaheedu aba jeenyaawa. 47Hean gwajeeng'u Yesu gidabaloola gurooruunatka nyaawa, gaguursa jeebi mwanang' ak ghwayiin murdeadaanyi, 48ak gwayeesha saawa, “Siida deaptaawa gheawungeasu baleanda uurji nih ghwadeaptanaan aniini, nea siida deaptanaan aniini ghwadeapta siida ghayi ajeaknean; aba gideaba siida mwanang'eewaneegwa oogasean ea haweewaneegwa oogasean.”

Siida mwahasheasa gaba meatkweedeanya

(Mar 9:38-40)

49Ghwasha Yohana nea gwayeesha, “Siida haw, sidaayi siida aruuta meangeenda aba gheawungaagu, ak geeyeeshi nung'waada aba gideaba siidida mabwaaheasa.” 50Gwayeesha Yesu niny, “Adagudoaheawi; aba gideaba siida mwahasheasa siisi gaba meatkweedeanya.”

Fuga Samariya ghaheawa ghwadeapta Yesu

51Iidu nea nineekiit eawoojiga jea ghabeawa humng'eeda hean gamanya beata Yerusalemu. 52Goojeakta buuneeda goosheedeawa niny, ak gaweay gharang'da Samariya, gwasisin heechea goobiida; 53ak ghaheawa fugeaba hoowa ghwadeapta niny, aba gideaba ghoang'waay naweeda gawa Yerusalemu. 54Daah ginealangaaschi was geaba Yakobo ea Yohana gwayeesha, “Ng'utamiida, gigasayi eeguursiina beasta jea gwaleabu humng'eeda ak gwaduulu fiisu?” 55Gwayamsa geaw saawa ak gwareekusa.” 56Ghang'eatng'eat gaweay gharang'da nuut.

Fuga gasa ghwaat geeshta Yesu

(Mat 8:19-22)

57Iidu nea gudugwanda naweeda gwayeesha Sih niny, “Gaydeadu geeshtaang'u aba hiji uwi sean.” 58Gwayeesha Yesu niny, “Fureayoonga gwandeawa shoomeanga, nea dariidaka gwandeawa ghoorajeega nyaawa, nea Orjeeda Siida ea mandeawana eara heeda jea ghwayiin uhuudaanyi.” 59Gwayeesha siinuut, “Eani geeshteanyu.” Ak gwayeesha, “Ng'utamiida, nyooh sikseani ghanyi dawa dabuy ghweandeanyu.” 60Gwayeesha niny, “Nung'waada muscheeka gabuy muscheeka nyaawa; ak ang'iing'i, guwi rukwiida sugoocheanduumeeda ASEETA.” 61Gwayeesha siinuut, “Aniini gaydeadu geeshtaang'u, Ng'utamiida; nea gidamadeeda ginyo goonean gheata dawa daheeli fugeaba gheenyu.” 62Gwayeesha Yesu niny, “Manda siida jea ghoang'waay mageemng'eanda ak goong'weersa bwadaw jea ghwahit aba sugoocheanduumeeda ASEETA.”

Zur Zeit ausgewählt:

LUKA 9: BG15

Markierung

Kopieren