LUKA 22

Geamwaal gichea eenuusta Yesu

(Mat 26:1-5; Mar 14:1-2; Yoh 11:45-53)

1Hean abeeda ea nineekiit ghweelmeeda mukaatajeega miyeayiin hamiira siguura Basaaka. 2Nea ashoohoodiga hees ea ng'oorshoodiga abeeda gwanda jeeda gasooda gichea ghoang'waayda ak gwanuus; ak iidu ghoawal buuneeda.

Yuda ghwamwas ghwalabwadaw Yesu

(Mat 26:14-16; Mar 14:10-11)

3Hean ghoabita Shataani jeeda Yudayda siguura Iskariyote, nea gaba jeedeaba fugiga atamaniyeenyean; 4Ng'ata gawa goobalool ashoohoodiga hees ea shirikareeda hees gida jea ghwalaapta bwadaw niny aba saawa. 5Gahoosan saawa muuchi ak gwaheeleesa gideaba gajeataw lapiya. 6Hean ghamwas ak gagasa gheata jea ghoalaapta bwadaw nea manda hiji eemeeda.

Yesu ghang'aap agita hamita Basaaka

(Mat 26:17-25; Mar 14:12-21; Yoh 13:21-30)

7Ghwahidu eaweeda ghweelmeeda mukaatajeega meayiina hamiira, nea eaweeda sinuusa dayeenda gisilleanda ghweelmeeda Basaaka gil. 8Iidu goojeakta Yesu Betaro ea Yohana nea gwayeesha, “Aweayeena asisina heechea eeyeaksiina Basaaka.” 9Ak geeyeesha, “Gigasayi eang'aabwa aba yeenu?” 10Gwayeesha saawa, “Ang'ula, iyoahiti mujiini gajaroonyeewana ng'eedeeda sar sirbiida beega; ghoayaachi geeshtaanyi ea ahita gheeda jea gawa jeeda, 11gooyeeshi siida bea gheeda, ‘Gwayi Giinealshoocheanda, abwaara ghooriini siyeaksi Basaaka aniini ea giinealangeasu?’ 12Ak gayghoahiimneegwa ghooriini haw sideeksa uhuumba nuut, ak ea siitaamdaam; ak goosisi jeeni.” 13Hean gaweay ea mwahita ghwadaakta ng'asheega sean gidagwachi rukuteayda; hean gwasisin Basaaka.

Hamita Ng'utamiida

(Mat 26:26-30; Mar 14:22-26; 1 Gor 11:23-25)

14Hita damanda agiischooda goopteada niny ea giijasoodigaaschi gweagiischi. 15Ak gwayeesha, “Neagasayi muuchi daak Basaakeeni aniini ea agooga heeda miidanyasa hang'weanidooda; 16aba gideaba geayeeshiineegwa, maygutaak ea eahiit aba jeeda sugoocheanduumeeda ASEETA.” 17Hean gageanu gikoombe, ak gabadiischeesa ak gwayeesha, “Oang'waanya gili, ak goolakiisiina geat; 18aba gideaba geayeeshiineegwa, maygutali mideega haghweega sabiibu, ea ghwahidu sugoocheanduumeeda ASEETA.” 19Ak gageanu mukaate, ak gabadiischeesa ak ghabwanach ak ghoadawaada saawa nea gwayeesha, “Nih saseedeanyu gil siitayda aba badahuukeagwa. Ahindunu aba giipkeateanyu.” 20Ak gwahindunu eara gikoombe iing'ata agiischooda gwayi, “Bayoogi geahiida aba badahuukeagwa neajeeda eesh aba foojeandeanyu. 21Ak goong'ulayi geatinda siichea ghwalaabwan bwadaw geambuucheewi aba hiji. 22Asi Orjeeda Siida gayghabeada gidaghayi sibean eerarsiinda ak ea dashageada siidida jea ghwalaabwan bwadaw!” 23Gabiisa goonyeari geat saawa, nea gwayi, Ng'eaha nih aba jeedeanya jea gwasin ng'asheanjiin.

Sheang'nyeeda hawunda

24Iidu gwardu sheang'nyeeda aba jeenyaawa gideaba aahaw ng'eaha aba jeedeanya. 25Gwayeesha saawa, “Sugoodiga eemoojiga inyeesa goombaliischi aba heanyaawa; giika mideawa gheambalmeedean aba heanyaawa geeguura fuga weeda buuneeda. 26Agooga ea mii gichea awuurjeewana; aba agooga siida gasa hawunda dawuurjeewana siida mwanang'eawa sean, nea siida gasa ghang'ata mwadi dawuurjeewana siida gadiyeeda. 27Aba gideaba aahaw ng'eaha, siida apteada ak gweagiischi, ghana siidida gadiyeesa buuneedean? Ak ghaaghanyi gajea siiteani agiischiini. Ak aniini aba jeedeang'wa geawuurjeewi siida gadiyeeda.

28“Agooga goowooschi fuga ghayi milikiida galeagasean sea aniini aba jeeda simsindeanyu; 29gawuurji gidaghayi goondaneani Bwaabwa sugoocheanduumeeda, eara aniini gaydagooneegwa, 30Ak gajayeagiischeena nea gooleeshi aba jeeda sugoocheanduumeedeanyu, nea goopiitpiidi hoorgajeega sugoodiga ak goorgweaksi dooshin damaniyeenya bea Israeli.

Yesu ghwaramoar gideaba Betaro gayghwashaang'an

(Mat 26:31-35; Mar 14:27-31; Yoh 13:36-38)

31“Simon, Simon, ng'ula, Shataani gagaseegwa ghoalealdaneegwa ngaano, 32ak aniini ea naamwaashchi ASEETA ea mwasuunya masaweagaagu, ama iibiiksean giimajeegi orjooga geamadu.” 33Hean gwayeesha niny, “Ng'utamiida, geawooschi hidaat eara eeteayeena ghealooniga ghana dami.” 34Gwayeesha, “Geayeeshiineey, Betaro, eanean maygooguul nghaghooda eaweani nea mii shaang'aan niba samwagu gideaba ginalaan.”

Shageeda ea sandakwajeanda ea ng'uta

35Gwayeesha saawa, “Damanda eajeakteawaneegwa, nea moondeawani shageeda ghana sandakwajeanda ghana geeka, abeeda gwanda gida niishoadeeweegwa?” Geeyeesha, “Mandana.” 36Gwayeesha saawa, “Ghamneawa siida mideawa shageeda daada, ak gwasunu eara dea mideawa sandakwajeanda. Nea siida mandeawana ng'uta ea dashaayda hang'daanyi ak ghwasha. 37Aba gideaba geayeeshiineegwa ng'ooruutsu majaghanyi ea meahiida aba badaydeanyu, ‘Aba gideaba geegalageat sea fuga munyas’; aba gideaba gising'waar aba badaydeanyu gwanda mudeanoadaanyi.” 38Hean gwayeesha, “Ng'utamiida, ang'wearda, hiji gwanda ng'utkeak iyeenya.” Gwayeesha saawa, “Gwadeay”.

Yesu ghamwaash ASEETA aba Giijeeda Saytuunajeega

(Mat 26:36-46; Mar 14:32-42)

39Iidu gwarita ak gawa gawuurji gideaba eawoojisu, ea ghwahita Giijeeda Saytuunajeega, nea ghwaat geeshta giinealanga. 40Hita hooweani gwayeesha saawa, “Amwaasha ASEETA adiidu geesimeegwa ak ghoapiti jeeda simsimda.” 41Ghwanung'wa saawa heeda, ak ghwaloat geash gili ayang'da jakteayda lagheaneeda, ak ghang'uda gutung'weakaaschi ng'eanyi ak ghamwaash ASEETA, ak gwayi, 42“Bwaabwa, iigidibwariiydi gil giischoarjaan bayoogi; nea adaghoah gida eagasiidi, nung' ghoah daang'u.” [43Hean ghwahidu malaykajeanda leabu humng'eeda ak ghoadaw uurda. 44Iidu nea gwanda jeeda sawanadeeda, hean ghamwaash ASEETA muuchi; ak gawuurji gheawoocheandaanyi foojeanda nea goobitpisa ng'eanyi.] 45Ng'eada mooshta ASEETA, nea gabiikta heeda giinealanga, ghwahita nea nilil aba gideaba ning'ut giiseaneega, 46ak gwayeesha, “Ghwasaan anda goolili? Ang'eatng'eada amwaasha ASEETA adiidu ghoapiti jeeda simsimda.”

Ging'ooyda Yesu

(Mat 26:47-56; Mar 14:43-50; Yoh 18:3-11)

47Miighoabit ghuuta aba baloolda ghwahidu eemeeda nea goodeana siisi siguura Yuda, bea jeeda giinealanga atamaniyeenya, nea gooshooyna saawa. Gwaneekiisa Yesu ak ghwasam gheata; 48gwayeesha Yesu, “Yuda ghamneawa gilaabi bwadaw Orjeeda siida aba samita gheata?” 49Deagu fugiga mideawean gwayeesha, “Ng'utamiida gajeabwarana ng'utkeaka?” 50Gafagu siyagi ng'utaanyi ak ghwalas soomjeanda ashoohoocheanda haw ak gwalaksa ng'eanyi iita geatinda dugwa. 51Gwayeesha Yesu, “Anung'waada nideay!” Ghoang'waay iita ak ghoahaap. 52Ng'ata gwayeesha Yesu ashoohoodiga hees, ea shirikareeda gheeda sibata ASEETA ea gweargwa, buwa ghoang'waay niny, “Ghoapkaandi gili oapkaanji oang'oanya mareanghweanda, nea gooyeadu ng'utkeaka ea gulupkeaka? 53Eawoojisu nea geendeaydooschi galeagasean aba jeeda gheeda sibata ASEETA, ghanea miyoang'wanyaan ak ghamneawa nih ea damandeang'wa gil ea uurda misaneeda.”

Betaro ghwashaang' Yesu

(Mat 26:57-58,69-75; Mar 14:53-54,66-72; Yoh 18:12-18,25-27)

54Hean geang'waay ak geayaat ea eayaat gheeda Ashoohoocheanda haw. Gamaseaw Betaro nea sheagi; 55iidu geayeat beasta aba bugharjeanda daghata gheeda nea geendeayi sean, ak eara Betaro gwanda hiji. 56Ng'ata ghwadaah hutpa gadiyeeda nea gwanda heedeesh ak goohang'ooysa ghaang' ak gwayeesha, “Eara siisi gwandeaydooschi sea niny.” 57Ghwashaang' nea gwayeesha, “Gatmooda, siisi aniini mwaanali.” 58Miigageawiit ghwadaah siinuut ak gwayeesha, “Eara ang'iing'i gibeahi jeedeaba fugiga.” Gwayeesha Betaro, “Siida meabeahi.”

59Iidu nea ning'ata aseedeanagi gwayeesha siinuut, “Aba huumwa siisi earada goodeaydooschi niny; aba gideaba niny siida Galilaya.” 60Gwayeesha Betaro, “Siida, mwaanali eara gida inyaashi.” Deagheata damani duu gabaloolean, googuul nghaghooda. 61Ghwayam geaw Ng'utamiida ak gang'ula Betaro. Ghoapkaat Betaro ng'asheanda Ng'utamiida, gidaghayi rukusiinda gideaba, “Eanean heeda miigooguula nghaghooda gajea niheawanaan niba samwagu.” 62Hean gwarita jarooda ak gooyeawda muuchi.

Yesu geeshka nea geabwar

(Mat 26:67-68; Mar 14:65)

63Ghwahita fugiga gwachi ang'waay Yesuun ak gwashika nea ghabwar; 64Geegeanu ak geedukuta gheanyanga ak geepearsa nea geeyeesha, “Heapi rukuneasa siida lasnyi?” 65Ak geerukusa ng'asheega saang'a bea giing'weaka.

Yesu geayaat madeeda girgweageeda

(Mat 26:59-66; Mar 14:55-64; Yoh 18:19-24)

66Sakteayda nea goorearu aseeta, gabadageat gweargwa sea ashoohoodiga hees, ea ng'oorshoodiga, ak geeyeadu madeeda girgweageeda, ak geeyeesha, 67“Iiwoosi Gristo, girukuneasa.” Gwayeesha saawa, “Eara darukuneegwa, majaghanyi amwasa; 68ak eara daanyaashcheegwa ng'asheanda ea mwajashaaha. 69Nea gidang'eada ghamneawa Orjeeda Siida gaygoopteada aba meatkweeda geatinda dugwa bea ASEETA hoauur.” 70Gwayeesha sean, “Aba seareani guwoosi Orjeeda ASEETA?” Gwayeesha saawa, “Goorugu agooga gideaba geawooschi.” 71Hean geeyi, “Asi gudeegassa mushooduspwa naaha? Aba gideaba siyiing'si geat ng'asheega ghuutaanyi.”

Zur Zeit ausgewählt:

LUKA 22: BG15

Markierung

Kopieren