YOHANA 1

Ng'asheanda eaweega

1Ghayi aba garayi gwanda Ng'asheanda, nea Ng'asheanda gwandeayi sea ASEETA, nea Ng'asheanda ea ASEETA. 2Aba garayi niny gwandeayi sea ASEETA; 3haleanjeeda sean geesin aba niny, nea iimanda niny ghanyea maygwanda gil aba haleanjeeda sisin. 4Jeadaanyi gwanda eaweega, nea eaweesu ea weeshinda buuneeda. 5Nea weeshini ghoabwaay jeeda misaneeda, nea misaneeda ea miighoamu ghwajoar.

6Abeeda gwanda siisi siicheagu leabu heeda ASEETA; siguura gheawungaaschi Yohana. 7Niny ghwaan ak gamuuwu iita weeshinda, ak abeeda ghamwas buuneesean aba niny. 8Nea niny ea mii weeshinda gil, niny ghwaan gamuuwu iita weeshinda.

9Nih weeshinda huumwa gil hidu jeeda ng'eanyiida ak ghoabwaay giliwas sih. 10Niny ghayi abeeda gwanda jeeda ng'eanyiida, nea ng'eanyiida geesin aba badaydaanyi ak ea mwanala ng'eanyiida. 11Niny ghwahidu gheanyi, ak ea mwadeapta fugaaschi. 12Nea fugiga sean deapta ninyiin, ak ghamwas aba gheawungaaschiin, ghoadaw uurda jea ghoaweewa diibiga ASEETA; 13Fuga meejiilana naweeda gealaan, ghana gidabwariiyda saseeda, ghana gidabwariiyda siida, geaghus ASEETA.

14Ak iidu ghoah Ng'asheandida saseeda ak goobiida jeedeanya, niny ghwanyiit dagheerjeanduumeeda ea huumeanda ak ea sidaayi, giigheambiitaanyi, giigheambiita uurji dea Orjeeda was haghasheeda leabu heeda Bwaabwa. 15(Yohana gamuuwu iitaanyi, ak goojuur, “Nih dea ghayi earuku nea geayi, ‘Nih dea ghayi eayeenyi gay gweadu geeshteanyu ak ea haweewaneani aba gideaba gwanda madeedeanyu.’”) 16Aba hidoadaanyi aseasa sinyaschi dagheerjeanduumeeda nea geetaguurji. 17Aba gideaba deaweeda geegu aba naweeda Musa; nea dagheerjeanduumeeda ea huumeanda ghapkaana naweeda Yesu Gristo. 18Manda siida nidaah ASEETA; Orjeeda was haghasheeda, mideayi sea Bwaabwa, niny siida adaajiidi.

Giijasta Yohaneeda Abaatiisachi

(Mat 3:1-12; Mar 1:1-8; Luk 3:1-18)

19Nih gidamuuwu Yohana, goojeakta fuga Yahudi mida Yerusalemu ashoohoodiga ea fuga Lawi ghoanyaash gideaba, “Guwoosi ng'eaha?” 20Ghamwas ak ea mwashaang'a ghamwas, nea gwayi. “Aniini meawoosi Gristo.” 21Geenyaash niny, “Ak guwoosi ng'eaha? Guwoosi Eliyahi?” Gwayeesha, “Meawoosi.” Geeyeesha, “Abeeda guwoosi sibaneeda?” Gwayeesha, “Manda.” 22Geeyeesha niny, “Asi ang'iing'i guwoosi ng'eaha? Rukuneasa ak geeyeasi iita fuga ajeakneasa. Giyeaniin aba badaydaang'u?” 23Gwayeesha, “Geawooschi ghuuta siida nyeara jeeda dareapcheeda, ‘Ooleapa naweeda Ng'utamiida,’ gawuurji gidaghayi rukuteayda sibaneeda siguura Isaya.”

24Fiisu abeeda goojeagu Farisaayajeega. 25Ng'ata geanyaash nea geeyeesha, “Ang'iing'i iimuwoosi Gristo ghana Eliya, ghana sibaneeda anda giibaatiisanayi buuneeda?” 26Ghwasha Yohana nea gwayeesha, “Aniini geabaatiisananeegwa beega, ak gwanda jeedeang'wa siida miinaada nea moanali, 27siisi gaygamaseawnean, ak aniini ea mamiisean deatineada deanga geakaaschi.” 28Ng'asheesu seaniin geesin aba hoowa bea Betaniyaan giigheawda Yordani was heeda abaatiisaniisa Yohana buuneeda.

Dayeenda gisilleanda bea ASEETA

29Muchu ghwadaah Yesu nea ghwaan headaanyi ak gwayeesha, “Ng'ula Dayeenda Gisilleanda bea ASEETA jea gageanda riing'eeda jeeda ng'eanyiida! 30Nih dea ghayi earuku eayeenyi, ‘Gwanda siisi jea gamaseawneani, aba gideaba niny ghayi gabay gwanda madeedeanyu, aba gideaba gwanda madeedeanyu.’ 31Aniini siisi ghayi mwaanali, amadu ghaawunyi deabaatiisan aba beega ak abeeda geeteajiisa Israeli.” 32Ng'ata gamuuwu Yohana ng'asheega nea gwayi, “Naadaayi Guroorooda gwashuubeanda ghariibajeanda nea ghoabina humng'eeda ak goobissa uhuudaanyi. 33Eara aniini abeeda mwaanali; amadu ghwanung' siidida ghayi ajeaknean deabaatiisan aba beegean gwarukunean gideaba, ‘Siidida jea daaha nea gwashuubeesa Guroorooda ak goobissa uhuudaanyiin siida nih diita jea goobaatiisan aba Guroorooda Ghaydidiin.’ 34Ak aniini ea naadaayi ak ea neamuuwu gideaba siisi Orjeeda ASEETA gil.”

Giinealanga madeeda bea Yesu

35Muchu gabiikta Yohana ghamiinaada sea ginealangaaschi asiyeenya. 36Hean gang'ula Yesu nea ghang'ata ak gwayeesha, “Ng'ula, Dayeenda gisilleanda bea ASEETA!” 37Ghwayiiy Giinealangiga asiyeenyean niny nea gwarugu ng'asheesu ak ghwaat geeshta Yesu. 38Ghwayam geaw Yesu ak ghwadaah nea ghwaat geeshta ak ghoanyaash saawa nea gwayeesha, “Googaseadayi naaha?” Hean geeyeesha niny, “Rabi” (nea gideaba Giinealshoocheanda gil), “ang'iing'i giibiiti yeenu?” 39Gwayeesha saawa, “Abeeni ak gajadaaha.” Ng'ata ghwaat geeshta, ak ghwadaah heeda eawoojisu abiita, goobiitpiit gwandeawa niny eaweedida abeeda gaba aseeta damanamughuush. 40Iiy orjeanagi aba jeedeaba giika asiyeenyean nea gabalool Yohana ak ghwaat geeshta Andreya gil, was orjeeda geenyea Simoneeda siguura Betaro. 41Goosheeda ghwadaah Simoneeda was orjeeda ghaamwat, ak gwayeesha, “Sidaayi Masiya” (nea gideaba Gristohi). 42Hean ghwaat heeda Yesu. Daah Yesu gwayeesha, “Ghamneawa geeguureeweey Simon Orjeeda Yohana? Asi gajeeguureeweey Gefa” (nea gideabeadaanyi ea Betaro gil).

Yesu gaguursa Filipo ea Natanaeli

43Iimuchu ea nigasa Yesu beata Galilaya. Ghwadaa Filipo ak gwayeesha, “Eani geeshteanyu.” 44Filipo niny siida leabu Betsayda gil, mujiineeda geaba Andreya ea Betaro. 45Filipo ghwadaah Natanaeli ak gwayeesha, “Sidaayi siida ghayi ng'oar Musa ng'asheagaaschi aba jeeda deaweeda. Siisi ghayi ng'asheagaaschi ghang'oar sibanga. Yesuheeda Nasareti, was orjeeda Yosefu.” 46Gwayeesha Natanaeli niny, “Asi eara Nasareti ghoamu gwarina gilimiyi?” Gwayeesha Filipo niny, “Beeni daaha.” 47Ghwadaah Yesu Natanaeli nea ghwaan headaanyi, ak gwayi, “Ng'ula, Israelajeanda huumwa, manda jeadaanyi ng'uyeega eara gil!” 48Gwayeesha Natanaeli niny, “Asi ang'iing'i ginaldananiin?” Ghwalamda Yesu ak gwayeesha, “Ghwanyawa ghaadaayeeyi nea gudumidana guumda shaboogheecheanda nea eara Filipo ea mii ghwaan gaguurneey.” 49Ghwasha Natanaeli nea gwayeesha, “Rabi, ang'iing'i guwoosi Orjeeda ASEETA! Guwoosi Sugoocheanda Israeli!” 50Ghwasha Yesu nea gwayeesha, “Ghamneawa gumwasi aba gideaba geayeeshiineey ghwanyawa ghaadaayeeyi nea gudumidana guumda shaboogheecheanda? Asi gaydaaha ng'asheega hees naawa suh.” 51Hean gwayeesha niny, “Aba huumwa, aba huumwa, geayeeshiineegwa, gajadaaha nea ghwajaada humng'eeda, ak gajadaaha malaykajeega ASEETA heeda mwascheeng'da suurja ghwararang'aan ghapka heeda Orjeeda Siida.”

Zur Zeit ausgewählt:

YOHANA 1: BG15

Markierung

Kopieren