GIING'EETA 8
8
Giishealda roopta
1Muchu ghoapkaat ASEETA Nuhu ea diyeanga sean ea dugwa sean mideayeesa niny jeeda maleambooda. Ng'ata ghwanung' ASEETA ghaghuudu jeameeda aba badayda ng'eanyiida, ak ghwasuunyaada beega; 2hean gwatkweada seawuutka sheagi jih mida uuta ng'eanyiida nea seawuutka humng'eeda geedukuta, ak geateal roopta leabu humng'eeda, 3hean ghwasuunyaada beega mida badayda ng'eanyiida giliwas eaweecha. Ng'ata askwearjooji bughala ea haradam ea damanamughuush goosha beega; 4iimuchu eaweeteaba damanispwa bea sheedeaba ispwa, ghwahiing'aan maleambooda ea ghamiinaada aba uhuuda giijeeda siguura Ararati. 5Ak gooshealeada beega ea ghwahita sheedeaba damanamughuush; hita sheedeaba damanamughuush, sing'usha sheeda, geadaah iheenga giijeega.
6Ng'ata askwearjooji haradam ghwajaat Nuhu seawadeeda maleambooda, 7ak gooruuta udaghuuh; ak ghang'eata ak gwaneayi ea ghwajaam beega aba badayda ng'eanyiida. 8Hean iimuchu gwasiksa ghariibajeanda, ghwadaah beega ea niisha aba badayda ng'eanyiida; 9ak ea mwanyasa ghariibajeanda heechea goobissa, ak gabiikta jeeda maleambooda, aba gideaba gudugwadukuta beega ng'eanyiisean. Ng'ata ghoahaakta geadi ak ghoang'waay ghariibajeanda ak goodeelsa jeeda maleambooda. 10Goomeas askwearjooji ispwa, ak gabiikta gooruuta ghariibajeanda aba jeeda maleambooda; 11ak gabiigu ghariibajeanda shing'ada headaanyi, asee anda gweana ghuuta seendooda nyawiish loodu bea geeta siguura saytuunajeanda; hean gwajeeng'u Nuhu gideaba nisuunya beega aba badayda ng'eanyiida. 12Ng'ata gabassa askwearjooji ispwa suuk, ak gooruuta gicha ghariibajeanda; ak ea mudu gabiigu headaanyi gicha.
13Iihita gweaydeaba bughalaji lah ea agi, sheeda madeeda, eaweecheanda madeeda bea sheeda, ghwajaam beega aba badayda ng'eanyiida; ak ghwajaat Nuhu uhuuda maleambooda, ak ghoang'wearda, ak ging'ulayi, badayda ng'eanyiida ea ghajaam. 14Eaweeteaba diktam ea ispwa bea sheedeaba iyeenya, ea nighajaamiit ng'eanyiida. 15Iidu gwayeesha ASEETA Nuhu, 16“Riteawana jeeda maleambooda, ang'iing'i sea gatmoadaang'u, ea orjoagaagu sea gadeemga orjoagaagu. 17Aruuta gilinyoo mideawana mideawa ea weega dariidaka ea diyeanga ea diyeanga badiina jeeda aba badayda ng'eanyiida ak abeeda gwaji muuchi aba badayda ng'eanyiida, ak goojiili ak ghoasaang'ayiichi aba badayda ng'eanyiida.” 18Hit ghang'eat Nuhu gwarita sea gatmoadaanyi, ea orjoagaaschi sea gadeemga nyaawa. 19Ea giliwas diyeayda, ea giliwas diyeayda badiina jeeda, ea giliwas dariideanda, ea gilinyoo gabadiini aba badayda ng'eanyiida, gwarita aba jeeda maleambooda nea goodeaydooschi aba heeluutka nyaawa.
Nuhu ghoadayda lukghumeeda
20Iimuchu gwasin Nuhu heeda wagiida aba badayda NG'UTAMIIDA, ak gageanu gilinyoo ea diyeayda miy gil ea gilinyoo ea dariideanda miy gil, ak ghoadayda ghoah lukghumajeega sighwarda aba heeda wagiida. 21Joon NG'UTAMIIDA shearooda ng'andit bea lukghumajeega, gwayi NG'UTAMIIDA aba jeeda gurooroadaanyi, “Maygudu damwaashta ng'eanyiida aba badayda siida, aba gideaba giiteemshajeega siida aba jeeda gurooroadaanyi ea munyas ghang'eada jeepcheanduumeadaanyi; ak ea maygudu danuus giliwas diyeayda gawuurji gidaghayi easindi. 22Hean iigudugwanda ng'eanyiida, gaygwanda damanda histeayda ea dea lajita, ak iissa gaygwanda jeameeda ea daknooda, ak gaygwanda geayda ea damanda gooroogeeda, askweari ea eawa, nea maygamuudean.”
Zur Zeit ausgewählt:
GIING'EETA 8: BG15
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible in Datooga © Bible Society of Tanzania, 2015.
