Marko̱ 13
13
Nga kitsuya Jesuu̱ nga bixundu ni̱ngu̱xi̱
(Mt 24.1-2; Lk 21.5-6)
1Nga itju ni̱ngu̱xi̱, ngu kui xu̱ta̱ xi kjibakuyáre̱, ku̱i̱cha kitsúre̱ Jesuu̱:
—Jí kua Chji̱ne, ¡chaseiri kúcha tsjuakun kui ndia̱jo, ku micha tsjuakun kui niꞌya kꞌa xi tuxi yiꞌi!
2ku̱i̱cha kiskengire Jesuu̱:
—A tjichaseri kui niꞌya kꞌa yiꞌi. Ngieje kikju̱a̱ janda chꞌuaꞌe kite sasenkixiji. Ngieje nga bixundu.
Tijñandajnu nga je kjima tiñare nga fetꞌa
(Mt 24.3-14; Lk 21.7-24; 17.22-24)
3Jaskan nga Jesuu̱ kju̱ xu̱ta̱ xi kjibakuyáre̱ kijí tjengi ya Olibo̱, xi kjitjián ngakjáin ni̱ngu̱xi̱. Kisꞌejña Jesuu̱ kum nga sindu subá, Pe, Santia, Jua ku Jandre̱, tsinengiyare̱ kui xu̱ta̱:
4—Kjia nga bixundu ni̱ngu̱xi̱. Mí najmi xi tsjuaña chu̱ba̱ xi kuitsuyaña nga kuma ngieje kui najmi.
5Ku̱i̱cha skengi Jesuu̱:
—¡Ndá Chaséjnu! Ngatu yujijnu nga tjin xi ꞌbanachajojnu 6Kjín xi kju̱a̱ꞌi ku ngajoꞌna mejénre kju̱a̱ꞌá: “Án kua Xi ꞌBatsjengiꞌan xu̱ta̱, kuitsujnu”. Jinꞌna tsichjen ku kuma xi nga kjín xi ꞌbanachajo.
7»Jun ngatu̱ mincha tkunjínjnu yajo̱jnu tsanga nuꞌyájnu nga kju̱a̱bixkán inchatsꞌijun xikjin kjaꞌi na̱xi̱nanda, ku tsanga kjaꞌi xi je tuxi mejénre kjan. Tuxa ku̱i̱cha kuma, ta̱nga tuku kjia feji nga̱sunde. 8Nga̱tꞌa tuxa kjanjun xikjin na̱xi̱nanda, kꞌuejire xi chine xu̱ta̱, ku kjín ngande kju̱a̱ꞌá chon ꞌñu. Ta̱nga tu sꞌei baꞌangitsere kui kju̱a̱, ngieje kju̱a̱ꞌon kju̱a̱nde xi kjueyáre nga̱sunde.
9»Chunjnu yajo̱jnu, nga̱tꞌa xu̱ta̱ xá tsikasꞌenre jun xu̱ta̱ ku kuaꞌonjnu ngaya ni̱ngu̱xi̱. Ngakjáin xu̱ta̱ xá xi incha batexuma ku ngakjáin xu̱ta̱ xá xi inchatsiꞌin manda kuejújnu xu̱ta̱ tuxi án nukju̱a̱yajnu ngixkun, nga̱tꞌa jun xi án tebakuyajnu. 10Tekjie nga fe nga̱sunde, nga ngieje na̱xi̱nanda, tsubáre nga bixuya én tjatse xi xu̱ta̱ nangi jmá batexuma Namiña Diuu̱.
11»Nga tsikasenjnu xu̱ta̱ ngaya tsja xu̱ta̱ xá ku ꞌbendajin kju̱a̱jnu xukúcha nga mare̱, ngatu̱ nindusinjínjnu yajo̱jnu najmi xi bixujnu nga ꞌnatsjengijnu yajo̱jnu. Namiña Diuu̱ xi kuitsuyajnu kui chu̱ba̱ en xi bixujnu. Jun jín xi nukju̱a̱jnu, Ngayaꞌasen xi Tsjé kui xi kuichjataꞌinjnu.
12»Xi ndsijín tsꞌe̱ ma xu̱ta̱ tekuini kju̱a̱tjijunre̱ xikjin. Tekuini tsikasꞌen xikjin tuxi ma nga nikjetsun. Xi nami tekuini kju̱a̱tjijunre̱ kjindiꞌe, ku xi kjindiꞌere̱ xu̱ta̱ tekuini kꞌuetꞌare namiꞌen ku tsikjesun. 13¡Ngieje xu̱ta̱ nga chꞌo kuasejnu nga̱tꞌa án tebakuyajnu! Ta̱nga án ꞌbatsjengiꞌan xi sꞌejínre nga̱tꞌaꞌna janda nga kju̱etꞌa.
Chu̱ba̱ xi kuitsuya nga biyu
(Mt 24.15-28; Lk 17.22-24)
14»Xi ꞌbexkiya kui en tsubáre nga tsikjínre yajo̱ꞌe ꞌmí xi mejénna texin. Nga Chaséjnu nga tjin xi tjitsjua chje̱ ngu ngande xi xaba chun jma nga kuajícha tsubáre, tuxi tjeꞌñu tiyujnu. Xi tsuba̱ ngande Judea̱, na̱xi̱ nga̱tijin nga manga̱; 15xi ngatsjá niꞌyaꞌe tsuꞌbasún, ngatu̱ ngatjajenjín tsa tjin najmi xi mejénre faikjaꞌa; 16ku xi ngijña tsuꞌba, ngatu̱ nganiꞌyaꞌeji ngatjai tsa ñajñuꞌen mejénre faikjaꞌa tsa tsú 17Yachjín xi inchayaꞌa kjindi kui chu̱ba̱ tuxi tsé kju̱a̱ꞌon xi kju̱a̱ꞌá. ¡Ni̱ma̱ xu xi kjíndinda tjínre! 18Nukju̱a̱tꞌajnu Namiña Diuu̱ nga nitjinꞌenjín nga ku̱i̱cha kuma, 19nga̱tꞌa tuxi tsé kju̱a̱ꞌon xi kju̱a̱ꞌá xu̱ta̱ ngieje kui ni̱tjin. Janda nga kitsindá Namiña Diuu̱ nga̱sunde ku janda kjatꞌei, kjema nga ku̱i̱cha tsé kju̱a̱ꞌon kjueyáre xu̱ta̱ xuku nga kui ni̱tjin, ta̱nga tekuácha kite ngi ngují ni̱tjin nga ku̱i̱cha kumataꞌin. 20Tsitjó Namiña Diuu̱ ngieje xu̱ta̱ xi kui jajín, kui kju̱a̱ nga nitjinꞌen kju̱a̱ꞌon ꞌñujín tsé kumáre. Tsanga kuajícha, ngiejere nga fesun.
21»Tsanga kui ni̱tjin tjin xi kuitsujnu: “Chaséjnu, kui kjisian kui Xi ꞌBatsjengiña”, ngatu̱ nisꞌejinjínjnu. 22Nga̱tꞌa kjia kju̱a̱ꞌi xu̱ta̱ xi inchaꞌbanacha nga kui xi ꞌbatsjengiña, nga kui incha tsuyasun Enꞌen Namiña Diuu̱, ku ngieje najmi xi tsjuakun ku ma nga ꞌbanachajo xu̱ta̱. Tsa ma xi tekuácha ꞌbanachajo xu̱ta̱ xi je tsichjare Namiña Diuu̱ nga kui faitjengire. 23¡Ndá chunjnu yajo̱jnu! Kuixa je tjen texiyájnu, nga tjen ni̱tjin nga ku̱i̱cha kuma.
Nga tsꞌutjini Kjindiꞌe xu̱ta̱ nga̱sunde
(Mt 24.29-31,42,44; Lk 21.25-28)
24»Nga jaꞌa kui ni̱tjin xi tsé kju̱a̱ꞌon kumá,
chji̱ndi̱ kꞌuya tsjuꞌbi;
kite kju̱a̱tꞌaiji sa.
25Kuixungi niñu,
ku kju̱a̱tse ngaꞌñu xi tjin ndiu̱jmi.
26»Ku kjia kjiaku̱a̱ yajnu án, Kjindiꞌe xu̱ta̱ nga̱sunde, nga ndibaꞌan ngajín yufiꞌe ndiu̱jmi, nga ndibajuꞌan ngu ngaꞌñu xi tsé kju̱ kju̱a̱ndá xi tjínna. 27Ku tsingiyaꞌan kjínditsjeꞌna nga ngieje nga̱sunde, tuxi kuma nga ꞌbetku xu̱ta̱ xi sꞌejínre nga̱tꞌaꞌna.
Najmi xi kumataꞌin ya tuse̱
(Mt 24.32-36,42,44; Lk 21.29-36)
28»Takuyajnu kju̱a̱kitakun xi kumataꞌin ya tu̱ tseje. Nga bitjure tjia chjínde ku xka̱ tjatse, je yajnu jun nga kjima tiña chandaba. 29Ku tekuácha, nga tjichasejnu nga je ku̱i̱cha kjima xuku nga texinjnu, je yajnu nga je xati faꞌiñaꞌan. 30Kju̱a̱xikjain nga kuma ngieje kui najmi, ku yajín xu̱ta̱ xi tjima kjatꞌei xi tuku skue ngisa. 31Chaja ndiu̱jmi ku nangi, ta̱nga énꞌna najmi ni̱tjin nga chaja.
32»Najmi xi be ꞌmí ni̱tjin ku ꞌmí chu̱ba̱ nga án xi faꞌiꞌan; janda Kjinditsje xi tjin ndiu̱jmi tekuácha bejí. Tekuácha najiꞌan. Toma̱ Namiña Diuu̱tse xi be.
33»Kui kju̱a̱, ndá Chunjnu yajo̱jnu, ngatu̱ sufejijnu, nga̱tꞌa yajíjnu ꞌmí ni̱tjin nga ndibáñaꞌan.
34»Xukúcha ma nga ngu xu̱ta̱ tsikjao nga xín fue. Chjare xu̱ta̱ xi inchatsixajo ku kui tsikuendaꞌre̱ nga basére niꞌyaꞌe. Nga ngu ngu xu̱ta̱ ngu tku̱ya xá xi tsjuáre, ku xi Kunda kjindetju̱a̱ ndá minengire nga chan ngatase. 35Ku kui ꞌbendu feji nga̱tꞌa bejí tsanga ngixun kútsa Tꞌajñu faꞌi xi tse̱ꞌe niꞌya, a basen ni̱tje̱n a xu nga ndiba ngayaꞌasen. Ku tekuácha jun ngatu̱ ꞌbengujíjnu anima̱jnu, 36nga̱tꞌa ma tsa Trátse faꞌiꞌan ku tjisufétsejnu. 37Najmi xi texinjnu jun, tekuácha xinna ngieje nga̱sunde: ¡Tutjsai nga ꞌbengujíjnu yajo̱jnu, Chaséjnu ngieje ni̱tjin!
Zur Zeit ausgewählt:
Marko̱ 13: MZI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
México © Sociedad Bíblica de México, A.C. AÑO
