Yoane 8
8
Ngat ntshu nsuesuempe
1Yes kuwe u ruk ru nkuentshi mua Oliva.
2Nyies butu ya kuwe ra mpur a Nzambi, bat bakima bawiy u ngwa yante, ya kuwar asina, ya aukubasuengs mey.
3Bat bapunt mukanta nto ake Bafarisai, banta kuwi- tshuari ngat mwetsh, bamangwat sasi, banta kuntshuer u nteng a banta.
4Ba kuror Yes bampe : Kumu ! Ngat nywe tshumangwat sasi.
5Moise amatshuwek ibo rudjak bat bunkerka busuesuempe i mamanya ; wene unor mpueny ?
6Banta bamanor nkos isin kunkik, isin kumon mpok ntshi nsoror. Di Yes kuturme ipunt nto nemp muante u man.
7Nter akaukungor banta, ya kuumun buso kubaror yampe : U kate a binu ntshu ngwa rek bube irab ya kwetshi a kwetshi imanya inkuet.
8Ya kukaturm upunt ruk ra man.
9Nter aok ba meye mas, ma kubawat, ba kuto mwetsh mwetsh, bawetare kutetshiy, ampis bekra kumans; ba kusabompr Yes yamet nto ngat ntshu awar ona u nteng a banta.
10Yes kuumun buso, yante ikamon muot mwetshi bo, na ngat yona, ya kuror nto ante yampe : Ngat, bat bumaisor ban kue ; rek a muot mwetsh maikuaksa ?
11Ngat kusakr Rek a muot mwetshi bo, Kumu. Yes kunor yampe : A minyi ake, minyi rak ikuaks wene bo, yaka, rek ukawaker bube bo.
Yesu awar muer mua bat ba man
12Yes kukabaror yampe : Minyi rungwak ru muer mua bat ba man, muot ntshu rabs ami, yak kasamp u kat a muimin bo, di ya ipamon muer mua mony.
13Bafarisai kunor bampe : Wene ukutot bukentshi buawo wene amet; bukentshi buawo rek buawar barabara bo.
14Yes kubasaks yampe : Mpe minyi rik toti bukentshi bua mia amet, bukentshi buami bungwak bua barabara ; isina minyi rumayeb mpok ato minyi nto ake mpok ikawe minyi ; di binu uyeb bo, mpok ingwiy minyi, nto ake mpok iwe minyi.
15Binu ibuntentek mey mu rutoko, di minyi utente meye ma muot bo.
16Di mpe minyi ratents muot, butente buami bungwa a barabara, isina minyi kurungwak mia amet bo ; di Tata ntshu amatom angwa nto ami.
17Mungwak mapunta u kat mukanta mu ibo ra binu, bukentshi bua bat bape bungwak bua barabara.
18Minyi rik toti bukentshi buami miamet ; Tata ntshu amatom minyi ake antotok bukentshi buami.
19Ba kunor bampe : Iso ankue ? Yes kusakra : Binu reke bantshyeb minyi bo, bake yeba ake Tata bo ; mpe binu bare ntshyeb minyi, kek bar kayeb ake Tata.
20Yes aror mey mene, aukusuengn kat ampuru a Ntsampe u kor irak rarontok banta birok ; rek a muot mwetsh amangwat bo, isin isoenki rante utukok bo.
21Yes kukabaror yampe : Minyi ruwe kuwe, binu busakusot minyi, binu ake busakuwa u kat bube bua binu ; binu bak yeb uwiy mpok iwe minyi.
22Basi Yuda kutot bampe : Ya idjaks yamet, isin inor yante nkos : Binu bak yeb uwiy mpok iwe minyi ?
23Ya kubaror yampe : Binu bu basi sina a man, minyi ake ru nsi ruk. Binu bungwar bubat ba man mene, di minyi rek rawar nsi man mene bo.
24Isin kankos imabiror minyi ampe : Buukuwa u kat bube bua binu ; isina mpe binu uyes bo, minyi nywe rungwara, binu busakuw u kat bube bua binu.
25Banta kunor : Wene u nake ? Yes kubaror : Rine ramabiror minyi kwetshi a kwetshi.
26Minyi rungwa a mey ma buiki mubiror, nto ake mubikuaks, yante amatom minyi angwak a barabara, mey maok minyi ngwar yante, minyi rumatot u kat a bat ba man.
27Ba uok bo, aukubaror Yes mey ma Tata.
28Yes kubaror yampe : Nter ibentes binu Muan a Muot, keka bupayeb minyi ru yante, minyi kurunkerk iket miamet bo, di minyi runtotok mey mamasuengs Tata.
29Yone ntshu amatom minyi angwak nto ami, Tata umpompr minyi amet bo, isina inkerak minyi matank makima mey mawont yante.
30Nter atot Yes mey mene nkos, bat ba buiki kunyes yante.
31Yes kuror basi Yuda bene bamanyes : Mpe binu bawar u kat a mey mami, nkos keka bungwar bu baronk bami ba barabara.
32Binu bapayeb barabara, keka barabara yapabipusur.
33Banta kunsaks bampe : Bitu tshu bakana ba bora Abraham, bitu ketshuatowar basou ba muot bo ; a wene nkos unor mpuenyi ampe : Binu bapapusu ?
34Yes kubasaks yampe : Barabara, barabara, minyi rik birori, muot ntshu nkerk bube, angwak nsou bube.
35Nsou kuangwak u kat a mpuru matankua makima sera sera bo ; di muan isin ya ngwak matank makima sera sera.
36Mpe Muan ibipusur, binu bapapusu a barabara.
37Minyi rumayeb binu bungwar bu bakana ba bora Abraham ; di binu bukusot untshak minyi, isin mey mami rek manyingin u kat a binu bo.
38Minyi runtotak mey matar minyi bora a Tata, binu ake bunkerk mey matar binu bora iso a binu.
39Ba kunsaks bampe : Tata a bitu, Abraham, Yes kubaror yampe : Binu barawar bana ba bora Abraham, keka bumpaker nko akerk Abraham.
40Di kekanko binu bukusot untshak minyi, minyi muot rumak biror mey ma barabara maok minyi ngwa Ntsampe ; Abraham keakerk nkos bo.
41Di binu bunkerk mingun miso a binu. Ba kunor bampe : Bitu rek tshuawar bana bu misuesuempe ; bitu tshungwar a Tata a bitu mwetshi, yante Ntsampe.
42Yes kubaror yampe : Mpe Ntsampe yar war Iso a binu, keka bamapont minyi, isin minyi rato ngwa yante, minyi rawiy ngwa yante; minyi kerawiy mi amet bo, di ya amatom minyi.
43Isin ye binu uok rutot rami bo ? Isin binu uyeb bo uok ruey rami.
44Binu bungwa bana ba bora Satan, binu bungontok kukokos ruwont ru iso a binu. Ya awak ndjak a bat kwetshi a kwetshi, yante uwar u kat a barabara bo, isina barabara rek a yinta u kat ante bo. Matank makim mpe yante atot ikuis antotok meye mante muntotok ya, isina ya angwak muna ikuis, angwak ake isante makuis.
45Di minyi, isin intotok minyi a barabara, kek imerk binu untshyes.
46Nake u kat a binu itusuengs bube buaker minyi ? Mpe rumak biror mey ma barabara, isin ye binu untshyes minyi bo ?
47Mpe muot awar muot a Ntsampe, ya iok mey ma Ntsampe ; binu bungwak rek maok ; isina binu rek bawar bat ba Ntsampe bo.
48Basi Yuda kunsaks bampe : Bitu tshuntot a barabara ampe, wene u nsi Samaria, nto ake wene ngwa nto nsong mua Satan mpe ?
49Yes kusaks yampe : Rek nsong mua Satan u kat ami bo ; di minyi runkupuiminyi Tata, di binu bunkusip minyi.
50Minyi kerunsotok ruton rami bo, di yuekr ntshu nsotoka angwar, yante yeitent a barabara.
51Barabara, barabara minyi rik birori, mpe muot aront mey mami, yekeimon iwa bo.
52Basi Yuda kunor bampe : Antana tshumayeb wene ungwar i nsong mua Satan, Abraham amawa, nto ake baprofete, wene wampe : Mpe muot aront mey mami, yekeimon iwa bo.
53Wene unek tata a bitu Abraham bunene, yante ntshu awa ? Baprofete ake bamawa, wene ake u nak ?
54Yes kusakr yampe : Mpe minyi ratons miamet ruton rami rungwa nkona, Tata, utonos minyi ; ya yone unok binu ampe, Ntsampe a binu.
55Binu kebamanyeb ya bo, di minyi ramanyeb, mpe minyi raror ampe, minyi kuramanyeb, minyi ruwiy mun ikuis nko binu ; minyi ramanyeb yante, minyi runkaront mey mante.
56Iso a binu Abraham awar i nianko isin kutar rus rami, ya amarutar, yante awar i nianko.
57Basi Yuda kunor bampe : Mabur mawo rek mawar makuem matanu wene wamatar Abraham !
58Yes kubaror yampe : Barabara, barabara, minyi rik birori, buso Abraham utowar bo, minyi rapakwar.
59Di banta kurab mamanya isina kunkuet, Yes kusuam, ya kutoa u mpur a Ntsampe, ya kuwe.
Zur Zeit ausgewählt:
Yoane 8: EJK2012
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Copyright © 2012, ASAREB, Suisse MiDi BIBLE
