Yoane 11
11
Nter aumua Lazaro kat iwa
1Muot mwetsh awar i buwar, rukompua rante Lazaro, nsi Betania, bor a Maria nto ake Marta bapank bante.
2Maria mene ntshu asing Kumu bonko, akanumun matampi mante nto a punyu siante ; Lazaro ntshu awar i buwar, awar pank ante.
3Bapank bante bu bawat kutom ruey ngwa Yes bampe : Kumu ! yone ntshu awont wene angwa i buwar.
4Nter aoka Yes mey mas, ya kutot yampe : Bus rek buawar buwar buwa bo, bungwa isin ruton ra Ntsampe, keka Muan a Ntsampe iton.
5Yes awont Marta nto ake muan inyante, nto ake Lazaro.
6Nter aok ya ampe ya angwa i buwar, ya kukawar ona matu mape.
7Ampis ya kuror baronk bante yampe : Tshue ana, tshuakaru ra Yudea.
8Baronk kunor bampe : Kumu ! basi Yuda bunkusot ikuet mamanya, kekanko wene ukangan kuwe ona ?
9Yes kusakr : Itankua kerungwak matankua isanke imape u kat rusu ? Mpe muot asamp nto a muanyi, yante yak buak bo, isina yante ikutar muer mua bat ba man.
10Di mpe muot asamp i butu, ya ibuak, isin ya rek a muer bo.
11Nter atot ya mey mene nko, ya kubaror yampe : Mpai a bitu Lazaro ames, di minyi ruwe kuwe isina kuwa ngumun.
12Baronki bante kunor bampe : Kumu ! mpe ya amakubes, ya apaberu.
13Yes aukuror iwa ra bora Lazaro, di banta baukukan ya aukutot mey mu ntshuentshi mua barabara.
14Yes kubaror irengene irengene yampe : Lazaro amawa.
15Minyi rikuniang isin binu, isin minyi uwar ona bo, di isin keka binu bayes. Tshue ana ngwa ya.
16Tomas aurk banta Didime kuror baronki bekr yampe : Tshue ana a bitu ake, isina kuwa nto ante.
17Nter awitor Yes, atumon Lazaro u kate marompa matu mane.
18Betania awar kora kor a Yerusarem rueri (stade) isanke ibatanu.
19Basi Yuda ba buiki bawiya isin kuwitan Marta nto a Maria isina pank a banta awu yante.
20Nter aoka Marta ampe : Yes iwiwiyi, ya kuwe buso buante, di Maria asasar asin u mpuru.
21Marta kuror Yes yampe : Kumu ! Mpe wene warak war ane, pank ami kuyar uwa bo.
22Di minyi rumayeb kekanko ampe ; makima muromp wene Ntsampe, Ntsampe apaiwek.
23Yes kunor yampe : Pank awo apakaumu kat iwa.
24Marta kunsaks yampe : Minyi rumayeb yante ipaumu rusu yeruumu minyiu rusu ri buso.
25Yes kunor yampe : Minyi rungwar rungumun nto a mony, ntshu ntshyes minyi iwar a mony nter iwa yante ake.
26Ntshu ngwar a mony, mpe antshyes minyi, yekuiwa sera sera bo. Wene umayes nkoso ?
27Yante kunor yampe : E, Kumu ! Rumayes wene u Kristo, Muan a Ntsampe, ntshu yeuwiy u kat a bat ba man.
28Nter amanor ya nkos, ya kuwe uwaur muan inyante Maria busuamn, kunor yampe : Kumu angwa ane, ya ikiuri.
29Nter aok ya ruey risu, ya kukatu buas buasi kuwe ngwa Yes.
30Isin Yes keatunyingin u bora bo, yante keakobu irak ramwens Marta nto ante.
31Basi Yuda bawar nto a Maria bawintan, ntera amantar banta akatu ya uto buas buasi, banta kurabs nto ante baukukan bampe : Ya iwe ri marompa isin kuwarer ona.
32Nter ator Maria u irak rawar Yes, nter amantar yante, ya kubuak a sin u matampi mante, ya kunor yampe : Kumu ! Mpe wene wawar ane pank ami kuyar uwa bo.
33Nter amantar Yes arer ya, nto basi Yuda bawar nto ante ake kurer, yante kumon nkebi kat ntem muante, yante kurit.
34Yante kuror yampe : Bamaney kue ? Banta kunsaks bampe : Kumu ! Wiya, wimon.
35Yes kurer.
36Basi Yuda kutot bampe : Rent ana nko amangont yante.
37Bana bamwetsh u kat a banta kutot bampe : Ya adipr mis ma bin a mis mabama, ya rek ayeb uber iwa uwat muot nywe ?
38Yes kukamon nkebi, ya kurit, ya kuwiy ri marompa, marompa mawar kata por imanya, barita imanya buso.
39Yes kuror yampe : Wor ana imanya, Marta panke a bor nyiu kunor yampe : Kumu ! ya amapont isina ya amabik matu mane ane.
40Yes kunor yampe : Minyi rek riror ampe : Mpe wene wayes, wapatar ruton ra Ntsampe?
41Ba kuwor imanya rawa u mper irak rabes nyiu, Yes kurent mis u ruku yampe : Tata ! Minyi rikiweki misanka isina wene umaok rutot rami.
42Minyi rumayeb wene umpak pok minyi matankua makima, di minyi runtot nko, isina bat bene bunyemt ane bumantong keka bayes, wene wamatom.
43Nter aman ya utot nkos ya kuwam ankono yampe : Lazaro, toa.
44Nyiu kuto, biyer nto ake matampi makanta nto iper, buso buante ake buawar buarar iper. Yes kubaror yampe : Mpusur ana, bumompr iwe.
45Basi Yuda ba buiki bawiya ngwa Maria, batar mey maker Yes, ba kunyes.
46Di bamwetsh u kat a banta kuwe ngwa Bafarisai kuwa- basuengs mey maker Yes makima.
Bafarisai kubuak kuk ntshi djak Yes
47Bampank bakump banen nto ake Bafarisai kubwak kuk bampe : Bitu tshuker mpuenyi ? Isin muot nywe ikukeri bisana bia buiki.
48Mpe bitu tshumompor nkona, bat bakima bunyes kunyes ; basi Rome buwiy kuwiy upants bor a bitu nto ake sin a bitu.
49Di mwetsh kat a banta, rukompua rante Kaifa, awar kumu bampank bakump ntshu nene ibur rina, ya kubaror yampe : Binu rek bayeb mey bo.
50Binu ukan bo, busek muot mwetsh iwa isina bat bakima, sin ikima uwa bo.
51Di ya kuaror nkos isina ya yamet bo, isina ya awar kumu bampank bakump ntshu nene ibur rina, ya atot mey makutowiy, Yes yeiwa isin sin.
52Ya keawa isina sin imwetsh bo, isina kukuekiy ban ba Ntsampe bakima bamuangn nko rutoko rumwetsh.
53Rusu rina banta bamakueriy mey isin kundjak.
54Isin mey mene Yes ukatou irengene irengene kat basi Yuda bo, ya kukatu kuwe ra sin awar a kora kor u busuebe bu ibuings u kat abor bumwetsh rukompua ra bunta Efraim, ya awar na nto baronki bante.
55Rusu ru nianko nkira mu Asamp Ntsampe mu basi Yuda muawar kora kor, bat ba buiki bamakatu u sin a banta, bamabentu ra Yerusarem buso bu rusu Rasampa Ntsampe isin kuyemps mitem mia ba.
56Ba baukusot Yes, ba baukutot ba ba awar ba u mpuru a Ntsampe bampe : Binu bukukan mpuenyi ? Yante yak wiy rusu ru nianko mun mpe ?
57Bampank bakump banen nto ake Bafarisai bamatey ibo bampe : Mpe muot amayeb irak rungwa yante isuengen, isin keka ba buwangwat.
Zur Zeit ausgewählt:
Yoane 11: EJK2012
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Copyright © 2012, ASAREB, Suisse MiDi BIBLE
