Matiu 9

Jesu I Va Velake Valeke I Makuru Vizu Tokamana

(Maka 2.1-12; Luka 5.17-26)

1Gonae Jesu i za age koluka i kava ule za masi pipika ne mana i gado za komala ia. 2Kakia ro basoero iri pala me dekoe Jesu kaki valeke i makure vizu tokamana mana valeke ne i kekele so vesu ia. Jesu i mia dego vaogoto ria gonae i sine ne valeke i makuru go vizu na tokamana, “Kula, sale era, vasakata pataro aro iri talupasa.”

3Gonae iri gata kakia ro ria vano tarove na tamana iri vari sine ne tanuqira, “Valeke dena i seko sakate God.”

4Do Jesu i rove nanao qira, gonae i sine ne qira, “Avigo tane nanao qamu i koe so nanao sakata? 5Adeke seko dena i malumu sine na, ‘Vasakata pataro aro iri talupasa’, ba sine na ‘Degere mana zaza’?

6Iago mata va mia qamue, Tuna Basoe i kone mazala tepa pua dena sauna va talupase na vasakata pata.” Gonae Jesu i sine ne valeke i makuru go vizu na tokamana, “Degere, pala vesu aro, mana gado komala aro.”

7Valeke ne i degere mana i gado za komala ia. 8Ṉalu basoero iri mia pata ni sadaka go, iri sareki, mana iri vazaka God tanego i teke qira karaputa igogo dena de iri koe go basoero ne.

Jesu I Korua Matiu

(Maka 2.13-17; Luka 5.27-32)

9Ṉalu Jesu i kasine dego go ne i mia kaki valeke i palapala takisi, vitoṉo na Matiu i kolokue pade i zazu ego. Gonae Jesu i sine ne Matiu, “Lama ono lulu ava era”. Matiu i degere mana i lulua Jesu.

10Taramuzina nae Jesu iza ṉaṉae pade ia Matiu. Mana topu vano palapala takisi mana ria iri vatovato sakata iri za ṉaṉa tavisi qira Jesu mana ria disipoloro iago. 11Kakiaro ria vano Parisio iri tana ne qira disipoloro ia Jesu, “Avigo tane batu ramu i ṉaṉa tavisi qira basoero gogo nae?”

12Ṉalu Jesu i gata qira igo, “Vano iri ko velaka iriki soko kaega valeke varivole, do ria iri mokoso tane iri soko go. 13Za muna za toere velake talupasana seko i sine go Buka tabo igo, ‘Vari nanao tane qa soko go era dekoe basoero, do sosovolomo kaega.’ Ma sine ne qamu, era qaki lama ne kaega koru qira basoero iri vatovato velaka, do qa lama ne qira basoero iri vasakata pata go.”

Jesu I Vari Vatatana Ne Dego Qaniqani

(Maka 2.18-22; Luka 5.33-39)

14Gonae ria disipoloro ia Jon iri lama mia Jesu, iri tana ne, “Avigo tane remu mana ria vano Parisio kakiaro ṉalu qimu qaniqani do ria disipoloro aro, kaega bana so ka ṉalu iri qaniqani?”

15Jesu igo, “Avigo, qamu nanao ria iri lama kotavisi go ṉaṉa vari va busi ne tarina maqata, ṉalu iara ko tavisi qira go valeke busi voru ne ba? Kaega! Ṉalu tarina pala vakuziki ne qirae to valeke busi voru ne, ṉalu nae to iri ara mazala go qaniqani go.

16Kaega ka basoe i pala tazirana poga voru i sirakomu ze poga bana, tanego poga voru ne, tina toqo ia poga bana ara lete taridaka va lavata to.

17I kaega kaki basoe tina mazala go pala na vino voru mana zele zaqe pata tarutaru vino bana, iri zazu ne zego kapotona pata qaraqara ne, tanego pata tarutaru vino ne tina tapuaka mana tazele sakata go. Iago muna taru ze vino ramu loborona pata tarutaru vino voru, go osiqiru ne tiruna velaka lupo go.”

Jesu I Va Too Kaki Sale Qole Suka Mana I Va Velake Qole I Siba Roku Ia

(Maka 5.21-43; Luka 8.40-56)

18Torana iara seko go Jesu i lama kakia batu ria vano Jiu, i koloku tutuṉe tarakenaqana Jesu mana igo, “Sale qole era iara le aqe so, do ono lama sapu ze aro karisimu mara too napu.”

19Jesu i degere i lulua valeke batu ne, mana ria disipoloro ia iri lulua ia. 20Gonae kaki qole i pala mokoso ria qolero i siporo taru parasa torana manoga karua ave, igo me muzi i siba tumuna roku ia Jesu. 21I nanao, “Ṉalu tu siba go roku ia Jesu velaka tu go.”

22Jesu i tabali i mia qole ne i sine ne ia, “Kasi sareki qole, Aro qo velaka napu to tanego vaogoto aro i va velaki go.” Torana nae qole ne i velaka to.

23Ṉalu Jesu iza dokae pade ia valeke batu ne, i mia qira basoero ne iri lete vari vaiqi mana iri dae valavata go. 24Jesu i sine ne qira, “Siporo tekere osiqamu. Qole suka dena ki le kaega ia i kamuku so.” Gonae iri vatupia vakari ne na Jesu. 25Taramuzina iri va siporo lupo qira basoero ne, Jesu i keba za loboro dekoe qole suka ne, i pala tarua karisina mana qole suka ne iza degere me. 26Gonae taramuzina pepeuna pata i zazu ne Jesu i va too napua sale qole ne izadava lupoe osina komalaro iri koe go kena igogo ne.

Jesu I Va Mimia Qiru Karua Valeke Kodo

27Ṉalu Jesu i kasi ne dego, karua valeke kodo iru kale muzi ne ia, mana iru koru me, “Ke nanao qaru to Sale ia Davita” iru go.

28Ṉalu Jesu i za keba e pade ne, karua valeke kodo ne iru za mia ia. Gonae Jesu i tana ne qiru, “Avigo qaburu vaogote era qa mazala va mimia napu qaburu?” Iru go, “Batu raru qaru vaogote aro qo mazala.”

29Gonae Jesu i siba mataqiru igo, “Tanego qaburu vaogoto, pata qaburu soko go nara tekene qaburu.” 30Mana mataqiru i mimia napu. Jesu i sine vabanabana ne qiru, “Aburu niki ara varove ze kaki basoe pata dena,” igo.

31Do taramuzina iru kasi ne Jesu, iru za pepeu lupo ze osina dia, dego Jesu iva mimia napu qiru go.

Jesu I Va Velake Valeke I Kikibu Go

32Iru ara zaza so karua valeke ne, kake ria iri pala napu me kaki valeke de ikoego Jesu. Valeke dena i kikibu tanego manuru sakata isiqane ia. 33Pasi i kale vakuziki ne manuru sakata ne Jesu, iara malumua go seko valeke ne, pasi nae basoero ne iri lete nureke, iri go de, “Ṉalu bana ne qatiki mia bana me kaega kapata igogo de.”

34Do vano Parisio iri go de, “Karaputa ia batu ria manuru ro ne tane i tekene ia, karaputa go i kakale ze go manuru sakata ro ne.”

Jesu I Nanao Vokara Ne Qira Basoero

35Jesu i gadoe osina to komala lavata ro mana komala suka na ro Qalili. Iza vari vatatanae Pade Lotu ro ne sauna Tarama Velaka na de go Too ikoego vari miasoka ia God. Mana i va tavoisi qira basoero i pala qira go soso mokoso ro ria. 36Ṉalu Jesu i mia qira basoero ne i lete vananame de iri gogo, tanego iriki ko kula kaega iri ko vana so, gere sipi ikaega go kaki tina miasoka qira go. 37Gonae Jesu i sine ne qira disipoloro ia, “Topuna pata gege na barue ne i velaka to, do basoero tarina za vaego ne iriki topu kaega. 38Iago muna pene batu na barue ne go mara valama qira topu na vano zazu go tarina vaego pata gege na barue ia ni velaka go.”

Zur Zeit ausgewählt:

Matiu 9: VRSNT

Markierung

Kopieren