Matiu 22
22
Seko Vapadapada Na Lotu Vari Va Busi
(Luka 14.15-24)
1Jesu i vazazua so seko vapadapada de iri koego basoero ne. 2Igo, “Too ikoego vari miasoka ia God i gere, ṉalu kaki batu lavata i vanama ne kelo busi na sale valeke ia. 3I turine qira vano zazu ia tarina za lulu me qira basoero i rave bana qira e tarina lama ego kelo ne, do iriki soko kaega lama. 4Iago i vazao napu qira vano zazu ia, mara ria za sine, ‘Kelo ne i nama lupo to, batu lavata ne i vae vale bana to buluka lavata ro ia mana ke suka ro iri lete boruboru go, iago osina pata i nama lupo to, lama eto kelo na busi ne ramu!’ 5Do basoero iriki vakapata so kaega seko ia batu lavata ne. Iri rigo neso zazu ro ria, kakia i zae barue ia, kakia izae sitoa ia, 6kero ne, iri pala qira vano zazu ia batu lavata ne, iri sima qira mana vae vale qira go. 7Pasi nae batu lavata ne i lete muma sakata, i turi ne qira vano soldia ro ia go tarina za vae vale qira basoero iri vae vale qira go vano zazu ro ia, mana iri za subia komala ria go. 8Goto nae ia batu lavata ne, i koru napu qira vano zazu ia mana i sine ne qira, ‘Kelo busi era i nama lupo to, do basoero qa rave bana qirae go, iki tora qira to kaega lama. 9Iago muna zae zuka lavata naro, loborona komala lavata ne mana ka basoe qamu miasoba ze nae, koru me mara lamae kelo ne,’ 10Vano zazu ro ne iri zae zuka lavata na komala lavata ne, mana iri lulu qira me galavana to ka basoe iri soba go, vano velaka mana vano sakata go, gonae pade na kelo busi ne i lete puraka to go.
11Goto nae batu lavata ne ikeba me, i lama mia qira vano iri lama ego kelo ne, mana i miasoba kameka valeke iki vakeba ne kaega roku velaka i tora go vakeba ne na ṉalu teṉo na vari va busi. 12Iago i tana ne ia, ‘Vakitaka era! Avigo tane qo keba mego dena, do qoki vakeba nego kaega roku na ṉalu vari vabusi na?’ Do valeke ne iki sine so kaega kapata. 13Gonae batu lavata ne i sine ne qira vano zazu ia, ‘Lama qolo karua karisina mana makena valeke dena, mana vana qa zaqe peka ne de i rodoko go. De go tina za dae ma vari kizakiza ne saqe na go.’ ”
14Valupolupona Jesu igo, “Topu ria tane God i koru bana qira go, do taravia ria so i vine qira go.”
Tana Sauna Voli Na Takisi
(Maka 12.13-17; Luka 20.20-26)
15Vano Parisio iri kasi ne Pade Lotu ne, mana iri za vato ne dego tarina vasoru ze Jesu, loborona tana ria. 16Gonae iri turine qira kakiaro disipoloro ria mana kakia ro vano iri koego taotao ia Erode, iri za tana ne Jesu, iri go, “Valeke vari vatatana, remu qi rove aro qo kakia basoe totoloṉo. Mana qo vari vatatana ne pata ogoto de go vatovato ia God, mana qoki vakapata kaega nanao qira basoero. 17Iago sine ne qemu, avana to qo nanao go aro, avigo i totoloṉe Tamana ita tatana volia go takisi de ikoego batu lavata Siza ikoego Rom, ba kaega?”
18Do Jesu i rove bana nanao qira i sakata, i sine ne qira, “Avigo tane qamu soko go pada nava era, qamu vano bulaṉoi? 19Vamia ve era kesa qamu voli takisi nego.” Gonae iri teke ne ia kameka seleni, 20mana i tana ne qira, “Ake dudulena mana vitoṉona tane i karo ego kesa dena na?”
21Iri vataule, “Batu lavata Siza.” Jesu i sine ne qira, “Ṉalu igogo nae, teke vaule ne Siza patapata ia Siza, mana teke vaule ne God, patapata ia God go.”
22Ṉalu iri gata seko dena, iri lete poloso. Gonae iri kasi ne ia mana iri zaza go.
Tana Sauna Too Ule Napu Me Tepa Le
(Maka 12.18-27; Luka 20.27-40)
23Kameka musaqara na so nae, kakiaro ria vano Sadusi, iri lamae dei koego Jesu mana iri tana ne ia, tanego iri go basoe le iki mazala kaega nara too ule me, 24“Valeke vari vatatana, Mosese igo, ṉalu kaki valeke busi ile do i kaega ne sale gogo ne, kaena valeke nae tina busi napua nanaro na togana, go sale tiruna vapodo go tina sale ia valeke ni le go. 25Tamakena taravitu iri koe komala qata koego dena, gonae ke lavata sivala ne i busi mana i le, do i kaega ne sale, iago valuluna i busi napua nanaro na togana, do i kaega ne qiru sale. 26Gonae i vari pada lupo so de iru koe go varuana mana vapisana ne, mana osiqira to tamakena taravitu i varipada lupo so, mana iri le lupo go. 27Valupolupo na qole ne i le napu. 28Aria, tina doka go musaqara ṉalu osiqira vano le tarina too ule me tepa le, akena to tina qole ogoto ia qole ne? Tanego osiqira tamakena taravitu ne iri busi lupo so kameka qole dena.”
29Jesu ivataule ne qira, “Ramu qamuki rove kaega zazao na Buka tabo ne, mana qamuki rove kaega karaputa ia God go, go nanao qamu i kebu go. 30Ṉalu vano le tarina too ule napu mego, valekero mana qolero tariniki busi kaega, tarina ko gere qira so aqelo ro na rani ne. 31Tepa ia too ule ia basoe tepa le ne, avigo qamuki toere kaega pata i sine ne qamu go God? Igo, 32‘Era to qa God ia Abra-am, God ia Aisak, mana God ia Jekop.’ Iago God iki God ria kaega vano le, do i God ria vano too.”
33Ṉalu basoero ne iri gata seko ro dena, iri lete poloso ne vari vatatana ia Jesu.
Tamana I Lete Mazala Sivala Go
(Maka 12.28-34; Luka 10.25-28)
34Ṉalu vano Parisio iri gata, ria vano Sadusi i makuru qira tana napu, tanego sauna seko vataule i zazu ne Jesu, iri kameka teṉo de ikoego Jesu, 35mana kaki kameka ria, valeke vari vatatana na Tamana i soko tana vasoru ze na Jesu, tana dena. 36“Valeke vari vatatana,” igo, “adeke Tamana tane i lete mazala sivala ne qira osina ro Tamana ro na?”
37Jesu i vataule ne ia, “ ‘Ono mamaligara ne God Batu aro, osina to puṉumu, osina to madaumu, mana osina to nanaomu go.’ 38Tamana dena to i lete mazala mana i lete sivala ne qira kero ne tamana ro go. 39Mana varuana Tamana i lete mazala napu go igo de, ‘Mamaligara ne qira kero ne basoero, gere na qo mamaligara nigo tanumu.’ 40Osina to Tamana ro ia Mosese mana vari vatatana ro ria propeta ro, gogo ne, i tatadaṉa lupo eso karua seko Tamana dena.”
Tana Sauna Mesia
41Ṉalu vano Parisio iri kameka teṉo, Jesu i tana ne qira, 42“Nanao qamu ramu ne, ake sinaqe ia tane tina go mego Mesia na?” Iri vataule ne, “Tina go me sinaqe ia batu lavata Davita.”
43Gonae Jesu i tana napu ne qira, “Do avigo tane Spirit tabo i teke go nanao batu lavata Davita i koru ze Mesia Batu ne? Davita igo,
44‘God i sine ne Batu era igo,
Ono koloku e tepa karisi matauqu mana tuna taru vaqoqoro qirae kana ro aro polana karaputa ro aro.’
45Davita i koru ze Mesia dena, ‘Batu ia’. Iago avigo tane basoe i podo gome sinaqe ia Davita, tina Batu napu iago Davita na?”
46Torana so nae, kaega to kaki a vano Parisio i mazala go sine na kakipata, mana pasi to ṉalu nae iri sareki to tana ne na Jesu go.
Zur Zeit ausgewählt:
Matiu 22: VRSNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The New Testament in Varisi, Solomon Islands © Bible Society of the South Pacific, 1994, 2004.
