Matiu 15
15
Seko Tamana Ia God I Sivala Ne Tamana Ro I Zazu Ne Basoe
(Maka 7.1-13)
1Taramuzina nae kakia ro vano Parisio mana vano vari vatatana na tamana iri reqe me Jerusalema mana iri zae de ikoego Jesu mana iri tana ne ia, 2“Avigo tane disipoloro aro iriki lulua go kaega tamana iri taru ne qita go vano ṉalu bana ro ita? Iriki saboro kenaqe kaega karisi qira iado iri ṉaṉa so!”
3Jesu ivataule ne qira, “Do ramu! Avigo tane qamuki lulua go kaega tamana ia God, mana qamu lulua so tamana ramu tanuqamu na? 4God igo de, ‘Vamazale tamaqamu mana sinaqamu go,’ mana ‘Ṉalu kaki basoe i seko vasakate tamana ba sinana gogo ne, na vae vale.’ 5Do ramu qamu vari vatatana ne, ṉalu kaki basoe iko ne kaki pata na vazazua go na tavisi qirue tamana mana sinana, do igo, ‘Pataro dena qa vatodo zeto God.’ 6Iago basoe nae ki tora kaega na nanao vamazale tamana. Iago ramu qamu soko vamazale na so tamana ramu tanuqamu, mana qamu vapatavolome so tamana ia God go. 7Qamu vano poqepoqe! Buka tabo i sine ne go propeta Isaia i sine vasadaka bana go sauqamu ramu i pata ogoto bana. Igo,
8‘Basoero dena, iri vamazala ve so era seko ro ria,
do loborona puṉu qira, mana nanaoqira i lete laqalaqa nava era.
9Vazaka iri vae nava go era i patavolomo so,
tanego iri vari vatatana ne tamana izazu ne basoe, iri vagere ze tamana ro ria ireqe me de koe God.’ ”
Jesu I Vari Vatatana Ne Pataro I Vapoṉo Go Basoe
(Maka 7.14-23)
10Gonae Jesu i koru qira basoero ne, go mara ria ziki za de i koego, mana i sine ne qira, “Muna vavaroṉo velaka go tamuna nanao rove go! 11Patagege i keba zago saqe na basoe ne iki mazala kaega nava poṉo go basoe ne, do seko i siporo ego saqe ne tane i mazala go va poṉo go basoe ne.”
12Gonae ria disipoloro ia, iri lama mana sine ne ia, “Vano Parisio ne iri gata pataro qo sine go aro, iri lete maqata.”
13Do Jesu i sine napua, “Osina moki iki leba go kaega Mamae ikoego rani ne, tina rapusu lupo. 14Iago nanao kasupe ne qira vano Parisio! Iri kenaqa ne qira basoero ne, do iri gere qira vano kodo iri kenaqa napu ne kaki basoe kodo ne. Iago osiqiru tiruna soru zaso bolu ne.”
15Gonae Pita iseko me, “Vatalupasa ne qemu remu seko vapadapada qo sine go nae.”
16Jesu i sine ne qira, “Ke! Disipoloro era nanao qamu i varitora so nanao qira basoero nae go. 17Qamuki nanao rove so kaega pata qa seko ne go era? Talupasana iato de, pata i ge go basoe, kenaqana i keba za saqe, gonae i qoqoro za sopa ne taramuzina tina siporo kasi napu na tokamana basoe ne go. 18Do seko i siporo mego saqe na basoe nae i reqe me nanao na mana iato naeto i mazala go va poṉo na basoe ne. 19Tanego loborona nanao na basoe i tupi mego nanao sakata ro, gerena vae vale na basoe, taunata, zazu sakata de koe kene basoe, siko, poqe mana pepeu valu qira basoero ne go. 20Iato dena pataro i mazala go va poṉo na basoe. Do basoe i ṉaṉa do iki saboro kenaqe kaega karisi ne, iki mazala kaega va poṉo na basoe.”
Kameka Qole I Vaogote Jesu
(Maka 7.24-30)
21Jesu i kasi ne dego mana i zae kena i garogaro go karua komala lavata Taia mana Saidon. 22Kaki qole Kenanaiti ikoego dego i lama mana koru me, “Ke Batu! Sale ia Davita nanao ava me, sale qole era i siqane manuru sakata mana iki ko velaka kaega go.”
23Do Jesu iki sine so kaega kapata de koe qole ne. Iago disipoloro ia iri lamae de koe Jesu mana iri pene ia, “Teke neto pata isoko go, go mara za, tanego i vari vaiqi e de qata koego!”
24Do Jesu igo, “God ituri nava era sauqira basoero na Izirel, iri gere go tunana ro sipi iri rore go.”
25Torana nae qole ne i lama mana koloku tutuṉue makena Jesu mana igo, “Batu! Tavise nava!”
26Jesu i vataule ne, “Iki totoloṉo kaega na pala go pata gege ria salero ne, mana na teke ne qira go sika ro.”
27Qole ne igo, “I ogoto sivala, do sika ro iri mazala so ge na lalanuzuruna pata gege ia batu ria i soru ego tevolo ne.”
28Iago Jesu i sine ne ia, “Aro qo kakia qole i karaputa vaogoto aro! Pata qo soko go aro era tuna teke nigo.” Mana torana to nae sale qole ne i velaka to.
Jesu I Va Tavoisi Qira Topu Ria Basoero
29Jesu i kasi ne de go mana i lama goe masi pipika na Qalili mana i popoka za kaki kubolo mana i za koloku. 30Topu sasakata basoero iri lamae de ikoego Jesu, iri pala me qira, vano i le kale go tokama qira, vano kodo vano iri kikibu mana topu ria vano iri mokoso go, iri zava kekele qirae tarakenaqana Jesu mana i va tavoisi lupo qira go. 31Basoero ne iri lete nureke ṉalu iri mia go vano taveqo iri zaza velaka go, vano kodo iri mimia, vano iki vizu go kaega tokama qira i velaka napu mana vano ikiki iri gata pata go. Iago iri vazaka God ria vano Izirel.
Jesu I Va Ṉaṉa Qira Vasimao Valeke Ro
(Maka 8.1-10)
32Jesu i koru qira disipoloro ia tarina lamae de ikoego, mana i sine ne qira, “Era qa lete nanao qira basoero dena, tanego iri ko tavisi qita torana kapisa musaqara, mana i kaega ne qira to pata gege iago, qaki soko kaega tuna turi vagado qira ṉalu iri saqo go dena, tanego iri niki za memelake zuka ne.”
33Disipoloro ne iri vane de Jesu, “Adepa tatana soba ze pata gege tanego dena ikaega ka basoe, go tatana voli ze bureri tarina ge go basoero dena na?”
34Do Jesu i tana ne qira, “Ava via bureri tane i kone qamu go?” Iri va taule, “Kavitu bureri mana kavia iṉana suka ro go.” 35Iago Jesu i sine ne qira basoero ne tarina koloku e pua ne.
36Gonae i pala kavitu bureri mana iṉana ne, i seko velaka ne God, i pasia, mana i teke ne qira disipoloro ia, go tarina kena ne qira go basoero ne. 37Osiqira iri ṉaṉa mana iri kuma lupo. Disipoloro ne iri soqe pata gege i ko sivala go mana iri vapurake kavitu ebata. 38Topu qira valeke ro iri ṉaṉa go torana vasimao ria, qolero mana salero iriki qana qira kaega.
39Ṉalu i turi vagado lupo qira basoero ne, i age kaki koluka mana i goza kena Magadana.
Zur Zeit ausgewählt:
Matiu 15: VRSNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The New Testament in Varisi, Solomon Islands © Bible Society of the South Pacific, 1994, 2004.
