Matiu 11

Jon Na Bapitema I Tana Ne Jesu

(Luka 7.18-35)

1Ṉalu Jesu i valupo vatatana qira manoga karua disipoloro ia, iri kasi ne de igogo ne, mana iri za napue kero ne komala ro na kena Qalili, mana iri za vari vatatana mana tamana go.

2Torana i koe loborona bara ne, Jon i turi vazao qira kavia disipoloro ia go tarina za mia Jesu. 3Mana iri tana ne ia, iri go, “Avigo, aro to tane God ni pui bana ne go tono lama go? ba, timuna piri napu ne kaki basoe?”

4Jesu i sine ne qira, “Muna ule za mana sine ne Jon pataro qamu gata go mana qamu mia go. 5Basoero iri kodo go iri mimia napu, basoero taveqo iri zaza velaka, vano i pala qira voremake iri velaka napu. Ria iri ikiki go, iri gata pata napu go, ria iri le bana, iri too napu me, mana basoero iri situ go iri tarama ne qirae to tarama ia God. 6Kula, de iri koego basoero iri vanadu ze vaogoto ria, de qa koego era, mana iriki ruama nava kaega go.”

7Ṉalu disipoloro ia Jon iri ule, Jesu i sine ne qira basoero ne de igogo Jon igo, “Ṉalu qamu zae de i kaega go pata podopodo lavatana ne qamu za gata go Jon, avana tane qamu nanao go tamuna za mia go? Kaki basoe i gere loda na seseu i vizuvizu go ṉalu seva i kiure go ba? 8Ba, avigo, avana tane qamu soko go za mia na? Kaki basoe iva keba ne roku menomeno? Ramu qamu rove basoe i vakeba nego roku menomeno ro ne, i koe pade ria batu ro. 9Ba, avana tane qamu soko go mia na? Kaki propeta? Pata ogoto! Jon i sivala ne qira kero ne propetaro iri lama bana go ṉalu bana ne. 10Mana Jon dena to, God i sine ze go Buka tabo ne, igo de, ‘Era tuna turine valeke palapala seko era tina za kenaqa nigo aro. Mana iato tina vanama go zuka aro.’ 11Masine ne qamu pata ogoto, Jon na bapitema i sivala ne qira basoero iri podoe go pua dena. Do ia i lete suka sivale go Too i ikoego vari miasoka ia God, iara lete mazala sivala ne Jon. 12Tupi me ṉalu Jon na bapitema i tarama nego seko ia God, go i lama doka to ninidena, topu basoero iri pada ne varitara mana vasakate na vari vatatana na Too ikoego vari miasoka ia God. 13Lama doka ṉalu ia Jon, Tamana ro ia Mosese mana propeta ro ne go iri seko ne seko ia God. 14Mana ṉalu qamu toqe ne vaogoto na pataro iri sine go, i velaka to, Jon na bapitema dena to i gere go propeta Ilaiza. 15Ka basoe i ko qeqele na mara gata seko ro dena.

16Ava patana to tuna vapadapada qirae go basoero na ninidena? Iri gere qira so salero suka iri kolokue de iri vari va volivoli ego, mana iri koru qira qe ria iri kome kene tepa ne. 17Iri go, ‘Qimu vae ne qamu kera kula ro, do qamuki veqa mana kula so kaega. Qimu vae kera dae le remu, do ramu qamuki dae mana maqata so kaega.’ 18Ṉalu Jon na bapitema i lama go, ia i qaniqani mana iki ge loka kaega go, do basoero ne iri go, ‘I kakabua manuru sakata!’ 19Mana ṉalu era Tuna basoe qa lama go, qa ṉaṉa mana qa ge loka do basoero ne iri go, ‘Mia to valeke dona, i poro ṉaṉa, ge loka so, mana i vakitaka qira so vano palapala takisi mana vano vatovato sakata go.’ Do osina pata i reqe me nanao velaka ia God, i vasadake nanao velaka ro nae i pata ogoto.”

Komala Ro Iriki Vaogoto Go Kaega

(Luka 10.13-15)

20Kakiaro komala Jesu i zazu ne ze topu na zazu vari vapoloso, do basoero ne iriki kavale so kaega vatovato sakata ro ria, iago Jesu i muma ne qira basoero na komala ro igogo ne. 21Jesu i sine ne qira igo, “Manava sakata de qamu koego ramu komala Betsaida. Tanego zazu vari vapoloso ro i sadake go de qamu koego ne, tara vasadaka bana ne qira go basoero na Taia mana Saidon, qa nanao basoero nae tara manava sakata bana ne so vasakata pata ro ria, mana tara ria vakeba ne poga taridaka ro mana kuru ze lodu kuzuku qira go. 22Ma sine ne qamu pata ogoto, musaqara ṉalu God tina zazu ne go vivine ia, kimata tamuna pala go, tina sivala ne kimata iri pala bana go basoero na Taia mana Saidon. 23Mana ramu basoero na Kapanaum, qamu nanao God na pala vapopoka qamu aqe rani ne? Kaega! God tina vanaqe qamu aqe nako ne. Zazu vari vapoloso ro i sadake go de qamu koego, tara vasadaka bana ne qira basoero na Sodom, qa nanao Sodom tara koso ninidena bago. 24Ma sine va totoloṉo ne qamu, ṉalu God tina zazu ne vivine ia de iri koego basoero ne, kimata tamuna pala go ramu, tina sivala ne kimata iri pala bana go basoero na Sodom.”

Lama Va Era Go Muna Zino

(Luka 10.21-22)

25Torana ṉalu nae Jesu igo, “Mamae, Batu na rani mana pua, qa seko velaki go, tanego qo vamia qirae ria iriki vatatana bana qira go kaega, pataro pipika qo pika ne qira go vano tarove mana vano iri nanao rove go pata. 26Ove to Mamae iato dena de qo soko go aro tina sadaka go.

27Mamae i teke lupo nava era osina ro pata. Kaega ka basoe irove go Tuna, do Tamana so irove go, mana kaega ka basoe i rove go Tamana, do tanuna so Tuna mana basoero i vine bana go Tuna tina vasadaka ne qira go.

28Osiqamu ramu qamu lete zazu vokara mana papala maqata gogo ne, muna lama va era go mava ziṉo qamu. 29Muna lama lulua vari vatatana era, mana era ma vatatana qamu go, tanego era qa vari nanao mana qaki vazakazaka va kaega tanuqu go, too nae to qamu mazala soba zena ziṉo loborona too ramu. 30Muna rove luluna vari vatatana ro era i malumu so mana zazu na pataro qa sine go era, iki makuru kaega go.”

Zur Zeit ausgewählt:

Matiu 11: VRSNT

Markierung

Kopieren