Yohanes 7

Yesus pe sudara-sudara suru pa Dia la iko hari raya di Yerusalem

1Abis bicara pa orang banya, Yesus pigi bajalang dari tampa satu ka tampa yang laeng di daera Galilea. Dia tara mau pigi di daera Yudea karna pemimpin-pemimpin agama Yahudi#7:1: Pemimpin-pemimpin agama Yahudi itu termasuk imam-imam, deng orang-orang dari aliran fanatik yang pe nama Farisi. Ada lagi guru agama yang ahli lima kitab Musa deng tua-tua Yahudi. Dorang ini suka lawan pa Yesus karna dorang tara percaya, Dia itu Mesias. di sana ada cari pa Dia la mo bunu. 2Waktu itu, agama Yahudi pe hari raya Pondok Daong#7:2: Hari raya Pondok Daong, itu hari raya yang orang Yahudi tinggal di ruma-ruma kacil yang dong biking dari daong-daong. Lia lagi keterangan ini di kamus. so dekat. 3Jadi, Yesus pe sudara-sudara baterek pa Dia, “Pigi suda kase tinggal tampa ini. Lebe bae Ngana pigi iko hari raya di daera Yudea, supaya orang banya yang jaga iko pa Ngana me bole lia mujizat-mujizat yang Ngana biking. 4Barang, kalu orang mo jadi terkenal, dia tara kase sambunyi apa yang dia biking. Jadi biking suda mujizat-mujizat di orang banya pe muka la orang-orang di dunia lia yang Ngana biking itu.” 5Yesus pe sudara-sudara bilang bagitu, karna dorang sandiri me tara percaya pa Dia.

6Kong Yesus bilang pa dorang, “Bolong dia pe waktu Kita mo ka sana, tapi untuk ngoni, salalu saja ada waktu untuk ngoni pigi ka sana. 7Barang, orang-orang yang tara percaya pa Kita, dorang itu tara binci pa ngoni, tapi dorang binci pa Kita, karna Kita kase tau dorang pe kalakuang jahat. 8Ngoni pigi suda ka sana bahari raya di kota Yerusalem. Kita bolong ka sana, karna bolong dia pe waktu untuk Kita ka sana.” 9Itu suda yang Yesus bilang pa Dia pe sudara-sudara, kong Dia tinggal babarapa hari lagi di daera Galilea.

Yesus mangajar di Yerusalem waktu agama Yahudi pe hari raya

10Waktu Yesus pe sudara-sudara so pigi di kota Yerusalem untuk bahari raya di sana, Yesus lagi pigi ka sana, tapi Dia pigi dari balakang deng babadiam supaya orang tara tau. 11Pe pas waktu hari raya di Yerusalem itu, pemimpin-pemimpin agama Yahudi cari-cari pa Yesus di acara itu, dorang babatanya, “Orang itu di mana e?”

12Banya orang baku-baku bisi tentang Yesus. Ada yang bilang, “Dia itu orang bae-bae.”

Ada lagi yang bilang, “Tarada, Dia itu yang jaga kase foya orang.” 13Tapi tara ada satu orang yang barani bicara di orang banya pe muka tentang Dia, karna dorang tako pa pemimpin-pemimpin agama Yahudi itu.

14Dorang biking hari raya itu, dia pe lama satu minggu, kong nanti so dua tiga hari, baru Yesus maso di Ruma Ibada Pusat pe kompleks kong mulai mangajar di situ. 15Pemimpin-pemimpin agama Yahudi herang skali, kong dorang baku bilang, “Orang ini tau skali tentang aturan-aturan di lima kitab Musa, padahal Dia itu tara perna balajar sama deng torang.”

16Yesus bilang pa dorang, “Yang Kita kase ajar ini, bukang Kita pe ajaran sandiri, tapi dari Tuhan Allah yang utus pa Kita. 17Cuma orang yang mau biking Tuhan Allah pe mau yang bisa tau kalu Kita pe ajaran ini datang dari Tuhan Allah sandiri atau dari Kita pe pikiran sandiri. 18Sapa saja yang mangajar pake dia pe pikiran sandiri, dia itu cuma mo cari puji deng hormat untuk dia pe diri sandiri. Tapi sapa saja yang mau supaya orang-orang puji deng hormat pa Tuhan Allah yang utus pa dia, dia itu pasti bicara yang butul deng tara bafoya. 19Nabi Musa so kase aturan-aturan di lima kitab Musa la ngoni iko. Tapi tara ada satu orang dari ngoni yang butul iko aturan-aturan itu. Kalu memang ngoni iko aturan-aturan itu, bikiapa kong ngoni cari mo bunu pa Kita?”

20Kong orang banya itu bilang pa Dia, “Ngana so kemasukan kaapa! Sapa yang cari mo bunu pa Ngana kong?”

21Turus Yesus bilang pa dorang, “Kita kase sembu orang di hari Sabat#7:21: Hari Sabat, itu hari yang orang agama Yahudi tara bole bakarja. baru satu kali. Itu saja ngoni so herang. 22#Kej. 17:10; Im. 12:3 Padahal ngoni sandiri lagi bakarja di hari Sabat, waktu ngoni sunat orang iko apa yang nabi Musa suru. Sebenarnya, sunat itu bukang nabi Musa pe aturan, tapi aturan itu dari torang pe orang tua dulu-dulu Abraham, Ishak deng Yakub. 23#Yoh. 5:9 Jadi, kalu ngoni sunat orang di hari Sabat supaya nabi Musa pe aturan itu ngoni tara langgar, bikiapa kong ngoni mara pa Kita waktu Kita ada kase sembu satu orang pas di hari Sabat? 24Jang ngoni nilai orang cuma dari apa yang ngoni lia, tapi ngoni musti nilai orang iko apa yang butul.”

Orang-orang baku malawang tentang apa Yesus itu butul Mesias ka bukang

25Babarapa orang di kota Yerusalem dengar apa yang Yesus bilang, turus dorang bilang, “Dia ini kaapa Orang yang torang pe pemimpin-pemimpin cari-cari la mo bunu?#7:25: Pemimpin-pemimpin agama Yahudi ini cemburu pa Yesus, karna so lebe banya orang yang iko pa Yesus. 26Coba lia, Dia bicara deng bebas di orang banya pe muka tapi tara ada satu orang yang barani togor pa Dia. Kaapa pemimpin-pemimpin so tau Dia itu butul-butul Mesias, Raja yang Tuhan Allah janji mo kase slamat pa manusia? 27Tapi tara mungkin Orang ini Mesias, karna torang tau Dia ini pe asal dari mana. Kalu Raja yang Tuhan Allah so janji mo kase slamat pa manusia so datang, tara ada orang yang tau Dia itu pe asal dari mana.”

28Waktu Yesus masi sementara mangajar di Ruma Ibada Pusat pe kompleks, Dia babilang deng suara kuat, “Memang ngoni kanal pa Kita deng ngoni tau Kita pe asal dari mana. Tapi Kita datang bukang karna Kita iko Kita pe mau sandiri. Kita datang karna Tuhan Allah yang utus pa Kita. Dia itu yang butul, kong ngoni tara kanal pa Dia. 29Kita kanal pa Dia, barang Kita datang dari Dia, kong Dia itu yang utus pa Kita.”

30Pe dengar itu, dorang berusaha tangka pa Yesus, tapi tara ada orang yang dapa tangka pa Dia, karna waktu itu bolong sampe dia pe waktu yang Tuhan Allah tentukan. 31Tapi di antara orang banya itu, ada banya yang so jadi percaya pa Dia, kong dorang bilang, “Pasti ini Mesias suda, Raja yang Tuhan Allah janji mo kase slamat pa manusia. Barang, tara ada orang yang bisa biking mujizat lebe banya dari yang Dia ada biking.”

32Orang-orang Yahudi dari aliran Farisi, dorang dengar orang banya baku-baku bisi tentang Yesus. Jadi, dorang deng imam-imam kapala suru pa penjaga-penjaga Ruma Ibada Pusat supaya tangka pa Yesus.

33Waktu itu, Yesus bilang pa orang banya itu, “Kita pe waktu sama-sama deng ngoni tinggal sadiki saja. Abis itu, Kita mo bale ulang pa Dia yang so utus pa Kita. 34Ngoni nanti mo cari pa Kita, tapi ngoni tara akan dapa pa Kita, karna ngoni tara dapa pigi di tampa yang Kita mo pigi itu.”

35Pe dengar itu, pemimpin-pemimpin agama Yahudi itu baku bilang, “Dia mo pigi di mana kong, sampe torang so tara bisa baku dapa deng Dia? Jang sampe Dia mo pigi mangajar pa orang-orang Yahudi yang ada merantau di bangsa-bangsa yang bukang Yahudi di sana? 36Deng apa Dia pe maksut waktu Dia bilang torang akan cari pa Dia, tapi torang tara akan dapa pa Dia? Turus Dia bilang lagi di tampa yang Dia mo pigi itu, torang tara bisa ka sana. Kira-kira Dia pe maksut apa e?”

Roh Kudus itu sama deng aer yang biking orang hidup

37 # Im. 23:36 Waktu so hari terahir di hari raya Pondok Daong itu, pas di acara puncak, Yesus badiri kong bilang deng suara kuat, “Sapa saja yang aus, mari dia datang pa Kita supaya Kita kase minum. 38#Yeh. 47:1-12; Za. 14:8; Neh. 9:15, 19-20 Sapa saja yang percaya pa Kita, dia itu nanti mo dapa apa yang so tatulis di Kitab Suci bagini, ‘Dari dalam dia pe hati akan ada sama deng mata aer yang mangalir yang biking dia bole hidup deng Tuhan Allah slama-lamanya.’ ” 39Waktu Yesus bilang tentang aer itu, Dia pe maksut Tuhan Allah pe Roh yang orang percaya mo tarima. Barang, waktu Yesus masi ada di dunia, orang-orang bolong tarima Tuhan Allah pe Roh, karna Yesus bolong mati kong hidup ulang supaya orang lia Tuhan Allah pe hebat.

40Waktu orang banya dengar Yesus pe kata-kata itu, ada babarapa dari dorang yang bilang bagini, “Dia ini suda, Nabi yang Tuhan Allah perna janji mo datang.”

41Kong yang laeng bilang, “Dia ini Mesias suda, Raja yang Tuhan Allah janji mo kase slamat pa torang.” Tapi yang laeng bilang, “Bukang, Tuhan Allah dulu ada janji, Mesias itu akan datang dari daera Yudea, bukang dari daera Galilea.#7:41: Dorang bingung karna dong tau, Yesus basar di Nazaret di Galilea, tapi dong tara tau Dia lahir di Betlehem di Yudea. Jadi sebenarnya tentang Mesias lahir di Betlehem, itu sama deng yang so tatulis di Kitab Suci. 42#Mi. 5:1 Di Kitab Suci ada bilang, nanti Mesias mo datang dari raja Daud pe turunan, kong dari kota kacil Betlehem di daera Yudea, raja Daud pe asal.” 43Kong orang-orang itu mulai baku malawang tentang Yesus. 44Ada babarapa orang mo tangka pa Dia, tapi tara ada orang yang barani sontong pa Dia.

Pemimpin-pemimpin agama Yahudi tara mau orang iko pa Yesus

45Penjaga-penjaga Ruma Ibada Pusat itu bale pa imam-imam kapala deng orang-orang dari aliran Farisi yang suru pa dorang, kong penjaga-penjaga itu dapa tanya, “Bikiapa kong ngoni tara bawa pa Yesus kamari?”

46Penjaga-penjaga itu jawab, “Bolong perna ada orang yang bicara pe bagus macam deng Dia itu.”

47Kong orang-orang dari aliran Farisi bale bilang pa dorang, “Ee, ngoni me so dapa kase foya dari Dia kaapa? 48Coba ngoni pikir, ada ka tarada dari torang orang aliran Farisi, atau dari pemimpin-pemimpin agama Yahudi yang laeng yang jadi percaya pa Dia? Tara ada to? 49Tapi torang pe orang-orang yang banya ini percaya pa Dia karna dorang tara tau aturan-aturan di lima kitab Musa. Dorang itu pasti dapa hukuman dari Tuhan Allah.”

50 # Yoh. 3:1-2 Di antara orang-orang Yahudi dari aliran Farisi itu, ada Nikodemus. Dia itu yang dulu perna datang pa Yesus. Dia bilang pa dorang, 51“Kalu mo hukum orang iko torang pe aturan-aturan di lima kitab Musa, torang musti dengar dulu apa yang orang itu bilang, deng cari tau apa yang dia so biking to? Abis itu, baru torang bole mo kase hukuman pa dia.”

52Kong dorang bilang pa dia, “Bikiapa kong bapa bela pa Dia? Bapa ini bukang orang Galilea to? Coba bapa priksa bae-bae di Kitab Suci. Di situ bapa bole tau, tara perna ada nabi yang datang dari daera Galilea, biar cuma satu me, tarada.”

53[Abis itu, dorang samua pulang pa dong pe ruma masing-masing.

Zur Zeit ausgewählt:

Yohanes 7: PB MMU

Markierung

Kopieren