मत्ती 14

यूहन्ना बपतिस्मा देणु आल़ै री हत्या

1तेई बौगतै गलील देशा रै चौथाई हिस्से रै राज़ा हेरोदेसै ज़ैबै यीशु रै बारै न शुणू, 2ता तेइयै आपणै सेवका बै बोलू, “ऐ यूहन्ना बपतिस्मै देणु आल़ा सा ज़ो मूँऐंदै न ज़िन्दा हुआ सा होर ऐण्ढै चमत्कारै रै कोम केरदा लागा सा।”

3ऐ सौऐ हेरोदेस राज़ा सा ज़ुणियै आपणै भाई फिलिप्पुस री लाड़ी हेरोदियासा री बजहा न यूहन्ना बँदी बणाईया शाँगीयै बोनिआ कैदखानै न पाऊ ती, 4किबैकि यूहन्नै तेइबै आपणै भाई री लाड़ी हेरोदेसै रखणै री तैंईंयैं नाँह केरू ती कि ऐण्ढा केरना तेरी तैंईंयैं ठीक नी ऑथि। 5एसा बजहा न राज़ा हेरोदेस यूहन्ना बै मारना चाहा ती पर सौ लोका न डौरा ती, किबैकि ते यूहन्ना बै भविष्यवाणी केरनु आल़ा मना ती। 6पर ज़ैबै हेरोदेस राज़ा रा जन्म ध्याड़ा आऊ, ता हेरोदेसै री शोहरीये हरोदेस होर तेइरै पाहुँणै सामनै नौच़िया हेरोदेस राज़ा खुश केरू। 7तैबै हेरोदेस राज़ै कसम खाईया तेसा बै बोलू कि, “ज़ो किछ़ तू मुँगली, हांऊँ वचन देआ सा मूँ सौ तौभै देणा।” 8सौ आपणी आमा री गैला न एज़िया तेसै बोलू, “मुँभै थाई न रखिया यूहन्ना बपतिस्मा देणु आल़ै री मुँडी दै।” 9राज़ा बोहू दु:खी हुआ पर आपणी कसमी री बजहा सैंघै होर सैंघै बेठैंदै लोका री बजहा न तेइयै तेसरी माँग पूरी केरनै रा हुक्म धिना। 10हेरोदेस राज़ै कैदखानै बै यूहन्नै री मुँडी काटणै री तैंईंयैं मांहणु भेज़ै। 11यूहन्नै री मुँडी काटी, होर थाल़ू न पाईआ आंणी होर शोहरी हागै धिनी। तेसै सौ मुँडी आपणी आमा हागै नैंई। 12तैबै यूहन्नै रै च़ेले आऐ होर तिन्हैं तेइरी लाश नेइया पौथी होर ज़ाइआ यीशु बै दसू।

पौंज़ हज़ार मर्दा बै रोटी खयाणी

13ज़ैबै यीशुऐ यूहन्नै रै बारै न शुणू ता सौ किश्ती पैंधै च़ढ़िया सुनसान ज़ैगा बै नौठा, ऐ शुणिया लोका ग्राँ-ग्राँ न एज़िया पैदल यीशु पिछ़ै च़लै। 14यीशु ज़ैबै किश्ती न बाहरै आऊ, ता लोकै री बोहू बड़ी भीड़ हेरिया तिन्हां पैंधै दया केरी, होर तेइयै तिन्हां सैंघलै बीमार मांहणु ठीक केरै।

15ज़ैबै सौंझ़ हुई ता तेइरै च़ेले एज़िया बोलू, “ऐ सुनसान ज़ैगा सा होर बड़ी देर हुई सा तू इन्हां लोका बै विदा केर ताकि ते ग्राँ न ज़ाइआ आपणै खाँणै रा होर रौहणै रा इंतज़ाम केरलै।”

16पर यीशुऐ तिन्हां बै बोलू, “इन्हरा ज़ाणा ज़रूरी नी ऑथि। तुसै इन्हां बै किछ़ खाँणै बै दैआत्।” 17च़ेले यीशु बै बोलू, “आसा हागै सिर्फ़ पौंज़ रोटी होर दूई मैच्छ़ी सी।”

18यीशुऐ बोलू, “तिन्हां मूँ हागै आंणा।” 19तेइयै भीड़ै रै लोका बै गाह पैंधै बैशणै बै बोलू। तैबै यीशुऐ पौंज़ रोटी होर दूई मैच्छ़ी लेइया स्वर्गा धिराबै हेरिया रोटी होर मैच्छ़ी री तैंईंयैं परमेश्वरा रा धन्यवाद केरू। तैबै रोटी चोड़िया आपणै च़ेले बै धिनी होर च़ेले ते लोका बै बौंडी। 20होर सैभ खाईया रोज़ै। होर तिन्हैं च़ेले बच़ीदी रोटी न भौरुइन्दी बारा टोकरियाँ च़की। 21बेटड़ी होर शोहरू छ़ौड़िआ तौखै खाँणु आल़ै कोई पौंज़ हज़ार मर्द ती।

यीशु रा पाणी पैंधै च़लणा

22एथा न बाद यीशुऐ तुरन्त आपणै च़ेले किश्ती पैंधै बशाइया आपु न पैहलै गलील ज़िलै री समुन्द्रा पारै बै भेज़ै, ज़ाँ तैंईंयैं कि यीशु लोका बै विदा केरलै। 23भीड़ै रै लोका बै विदा केरै न बाद यीशु केल्हा प्रार्थना केरदा ढौगा पैंधै बै नौठा। सौंझ़की घेरै यीशु तौखै केल्हा ती। 24तेई बौगत किश्ती समुन्द्रा मौंझ़ै पाणी री लैहरा सैंघै डगमगाँदी लागी ती किबैकि बागर सामनै धिरै न च़लदी लागी ती। 25राती कोई च़ोऊथै पौहरै यीशु समुन्द्रा न निकल़िया तिन्हां हागै आऊ। 26तेइरै च़ेले ज़ैबै सौ झ़ीला पैंधै च़लदा हेरू ता ते डौरै होर बोलदै लागै, “ऐ ता कोई भूत सा।” ते डौरै लाइया लेरा मारदै लागै।

27यीशुऐ तिन्हां सैंघै गैला केरी होर बोलू, “हौंसला रखा ऐ हांऊँ सा होर मता डौरदै।” 28पतरसै तेइबै बोलू, “अगर तुसै सी ता मुँभै पाणी पैंधै च़लिया आपु हागै ऐणै बै बोल।”

29यीशुऐ बोलू, “एज़।” पतरस किश्ती न उतरिआ पाणी पैंधै यीशु धिराबै च़लू। 30पर सौ बागरी ब्यानै हेरिया डौरू। सौ डुबदा लागा होर सौ चिलाऊ, “ओ प्रभु जी मुँभै बच़ात्।”

31यीशुऐ तुरन्त आपणै हौथै लाइया ढौकू होर बोलू, “ओ थोड़ै बशाह केरनु आल़ै तैं आपणै मना न शक किबै केरू?” 32ज़ैबै ते किश्ती पैंधै च़ढ़ै ता बागर रूकी। 33किश्ती पैंधै ज़ो लोका ती, तिन्हैं यीशु बै प्रणाम केरु होर बोलू, “तू सच़, परमेश्वरा रा बेटा सा।”

गन्नेसरत न बीमारा बै ठीक केरना

34ते समुन्द्रा पार उतरिआ गन्नेसरत देशा न पूज़ै। 35तौखलै लोकै सौ पछ़ियाणु होर औरै-पौरै सैभ ज़ैगा तेइरै ऐणै री खबर भेज़ी ताकि सारै बीमार मांहणु बै तेई हागै आंणलै। 36होर ते अर्ज़ा केरदै लागै कि तू आसाबै आपणै झिकड़ै रा पल्लू छ़ुँगणै दै; होर ज़ुणियै छ़ुँगू ते ठीक हुऐ।

Zur Zeit ausgewählt:

मत्ती 14: KFX-NT

Markierung

Kopieren