LIRAANGA 10

Vitsukhulu va Vaana va Nuhu

1Yava navo vitsukhulu va vaana va Nuhu, nivali Shemu, Hamu nende Yafetsa. Vaana vi shiyayi vavaka yava, vivula vaana lwa michelelo chia matsi chiali nichimali khuvwa.

2Vaana va Yafetsa yivula ni Gomeri, Makoko, Madahi, Yavani, Tubali, Mesheki nende Tirasi. 3Vaana va Gomeri yivula ni Ashikenatsi, Rifatsi nende Togaruma. 4Vaana va Yavani yivula ni Elishahu, Tarishishi, Kitimu nende Dodanimu. 5Vandu venavo navo vakuuka va vandu vamenyanga khundulu khwi inyanza khandi khu visulu via matsi. Yava navo vitsukhulu va Yafetsa, vamenyanga mu vandu vi tsimbia tsiavo tsindi lukanu khandi mu vivala, shia vandu valomolomanga lulomolomo lwavo vene.

6Vaana va Hamu yivula ni Kushi, Misri, Libia nende Kanaani -- navo vakuuka va vandu vakulikhwa mira kavo. 7Vitsukhulu va Kushi ni vandu varulanga Seba, Havila, Sabuta, Raama, nende Sabuteka. Vitsukhulu va Raama ni vandu varulanga Sheba nende Dedani. 8Kushi yivula mwana ulaangwangwa Nimurodi, mundu wali niyayaanza liihe wamanyikhana mu shivala. 9Yali muhiitsi wi tsingulu tsinyishi muno imbeli wu Mwami Nyasaye. Nashio shivune shichilanga vandu nivavoola, “Uve khuli Nimurodi, muhiitsi wi tsingulu tsinyishi muno imbeli wu Mwami Nyasaye.” 10Shivala shieshie shia yamihanga shiraanjilanga mu mataala ka Babilonia, Ereki, nende Akadi; mataala kavaka kenako koosi kali mu shivala shia Babilonia. 11Nimurodi yarula mu shivala shienesho, natsia mu shivala shia Ashuria; yumbakhayo mataala ka Nineve, Rehobotsi Iru, Kala, 12nende Reseni, litaala lili hakari ha Nineve nende Kala; nalio ni litaala likali.

13Vitsukhulu va Misri navo vandu varulanga Lidia, Anamu, Lehabu, Nafutuhu, 14Patsurusi, Kasiluha, nende Kafutori; navo vakuuka va Vafilisti.

15Vaana va Kanaani -- Mwana mukhulundu ni Sidoni nende Hetsi -- vali vakuuka va vandu vakulikhwa mira kavo. 16Kanaani yali khandi kuuka wa Vayeebusi, Vaamori, Vagirugashi, 17Vaahivi, Vaaruki, Vasini, 18Varuvadi, Vazemari, nende Vahamaatsi. Tsinzu lukanu tsia Vakanaani tsialanda, 19khutukha lwa mipaka chia Kanaani chiatukha Sidoni nichitsia khutukha mu litaala lia Kerari himbi Gaza, khandi nichitsia khutukha mu mataala ka Sodomu, Gomora, Aduma, nende Zebohimu himbi mu litaala lia Lasha. 20Yava navo vali vitsukhulu va Hamu, vamenyanga mu vandu vi tsimbia tsindi tsinyishi lukanu khandi mu vivala, shia vandu nu lulomolomo lwavo vene.

21Shemu, mwana mukhulundu wanga Yafetsa, yali kuuka wa Vayahudi voosi. 22Vitsukhulu va Shemu navo vandu varulanga mu mataala ka Elamu, Ashuria, Arupakashadi, Ludi, nende Siria -- navo vakuuka va vandu vakulikhwa mira kavo. 23Vitsukhulu va Siria vali vandu varulanga Uzi, Huli, Getseli, nende Mesheki. 24Arapakashadi yivula Shelahu; Shelahu yivula Eberi. 25Eberi yivula vaana vavili: mulala khuvo yali Peleki, shichila mumatukhu yamenyanga, vandu vu mu shivala vali vayikavulamu, khandi amwavo wewe Yokutani. 26Yokutani yivula Alumodadi, Shelefu, Hazaramavetsi, Yera, 27Hadoramu, Huzali, Dikilahu, 28Obalu, Abimaheli, Sheba, 29Ofiri, Havila nende Yobabu. Yava voosi vali vitsukhulu va Yokutani. 30Mulimi kwa vamenyamu kwarulanga havundu halaangwangwa Mesha khutukha Sefari khuluveka luli ivukwi wi shivala shi vikulu. 31Yava navo vitsukhulu va Shemu, vamenyanga mu vandu vi tsimbia tsinyishi lukanu khandi mu vivala, shia vandu valomolomanga lulomolomo lwavo vene.

32Vandu yava voosi ni vitsukhulu va Nuhu, shia vandu khulondokhana khu shivala shiavo, khulondokhana khu tsinzivulu tsindi lukanu. Lwa michelelo chia matsi chiali nichiakhavwa, vandu vu mu shivala voosi vivulwa khurula khu vaana va Nuhu.

Zur Zeit ausgewählt:

LIRAANGA 10: LLLCATHOLIC

Markierung

Kopieren