Thangambere 7
7
Pi M’ucoro Ng’om
1Man Yehova wacu ni Noa kumae, Wubin wuku juodi ceke i avur; kum aneni ibedo pwe i wang’a i kind dhanum’utuk maeni. 2Ku ba lim ceke ma leng’ igam abiro abiro, ma co ku ma dhakune; man ku ba lim ceke ma gi leng’ ungo, gam ario ario ma co ku ma dhakune: 3man winyo ma kor polo bende, abiro abiro, ma co ku ma mon, kara ugwok kodhi bed kwo i wang’ ng’om ceke. 4Kum fodi ceng’ udong’ abiro, man abikonjo koth wi ng’om ceng’ pier ang’wen ku diewor de pier ang’wen; man ku ba gin ceke ma kwo m’acwio abinyotho woko kud i wang’ ng’om. 5Man Noa timo calku ceke ma Yehova ng’olo ire.
6Man Noa rundi pare dak abusiel kinde ma pi m’ucoro ng’om ni wi ng’om. 7#Mt 24:38, 39; Lk 17:27Man Noa mondo, ku wote, man dhaku pare, ku mond wote gikugi, i avur, ni kum pi dupa mi pi m’ucoro ng’om. 8Kind lim ma leng’, man kind lim ma gi leng’ ungo, man kind winyo, man kind kwond gin ceke ma lak wi ng’om, 9gimondo ario ario ba Noa i avur, ma co ku ma mon, calu Mungu ng’olo ni Noa. 10Man etimbre yo ng’ei ceng’ abiro, nia pi dupa mi pi m’ucoro ng’om ni wi ng’om. 11#2 Pet 3:6I rundi dak abusiende mi camung’om pa Noa, i dwi mir arionde, i ceng’ apar wi abirone mi dwije, i cenguno kulo ceke mi nam ma dit uthwogre, man wang’ polo yabre. 12E koth ni wi ng’om ceng’ pier ang’wen ku diewor pier ang’wen.
13I cenguno Noa mondo i avur, man wot Noa, en e Cem ku Ham man Yafeth, man dhaku pa Noa, ku mond wote adek gikugi; 14gin, man ku ba yedi ceke ku kite ku kite, man lim ceke ku kite ku kite, man ku ba gin ceke ma lak i ng’om ku kite ku kite, man ku ba winyo ku kite ku kite, man ku ba winyo ceke ma kwonde tung’ tung’. 15Man gimondo i avur ba Noa, ario ario mi weg kum ceke ma lietho mi kwo ni i igi. 16Man ju ma gimondo, gimondo ma nico ku ma dhaku mi weg kum ceke, calu Mungu ng’olo ire: man Yehova ciko bang’e. 17E pi m’ucoro ng’om ubedo wi ng’om ceng’ pier ang’wen; man pi sagre, e eting’o avurne, man etingre malu ku wi ng’om. 18E pi sagre, man enyai dit wi ng’om; man avur uwotho wi wang’ pi. 19E pi sagre apila wi ng’om; man gudi ma wiu ceke ma gini the polo ceke umbre. 20Pi pong’ ma sagu bot apar wi abic; man gudi umbre. 21Man weg kum ceke ma wotho ku wi ng’om utho, winyo, man lim, ku yedi, man ku ba gin ceke ma lak wi ng’om ma wotho wi ng’om man dhanu kubang’gi kubang’gi: 22gin ceke ma yuyo mi tipo mi kwo ni i umgi, mi gin ceke ma ginuti wi ng’om m’uthwo, githo. 23E gin ceke ma kwo kubang’e kubang’e unyothre ma ni i wang’ ng’om, dhanu, ku lim, man gin ma lak wi ng’om, ku winyo ma kor polo; e ginyothri kud i ng’om: man Noa kende e m’udong’, ku ju ma gini kude i avur. 24Man pi sagre wi ng’om ceng’ dak acel ku pier abic.
Zur Zeit ausgewählt:
Thangambere 7: AB1970
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Holy Bible In Alur (Lur), Revised Orthography © United Bible Societies, 1970.
