Thangambere 4

Kain giku Habil

1E ng’atuca ng’eyo Eva ma cege; e egamu ie, man enyolo Kain, man ewacu kumae, Agamu ng’atu ma nico ku kony pa Yehova. 2Man kendo enyolo umin mire ma Habil. Man Habil en e jakwac mi rombe, ento Kain en e jafur ng’om. 3Man etimbre yo ng’ei nindo moko, nia Kain utero girathiera mi nying’ ng’om ni Yehova. 4#Ebr 11:4Man Habil bende, utero nyithi rombe ma kayu mir udul rombe pare ku mione. Man Yehova foyo Habil ku girathiera pare: 5ento efoyo Kain ungo ku girathiera pare. E ng’ecwiny unego Kain dit, man emino wang’e. 6Man Yehova wacu ni Kain kumae Kwinyo negi nedi? man imino weng’i nedi? 7Tek itimo ber, ebiyire iri ngo? man tek itimo ber ungo, dubo bedo dhugola; man yeny pare bibedo yor i beng’i; ento dong’ ibim wie. 8#Mt 23:35; Lk 11:51; 1 Yoh 3:12Man Kain uweco ku Habil m’umin. Man etimbre, kinde ma gini i podho, nia Kain upodho wi Habil m’umin mire, man enege.

9Man Yehova wacu ni Kain kumae, Habil m’umeru ni kani? Man ewacu kumae, Ang’eyo ngo: adoko jakwac p’umira’? 10#Ebr 12:24Man ewacu kumae, Itimo ang’o? ba rimb umeru ywak i bang’a kud i ng’om. 11Man kawono julemi ku ba ng’om, m’uyabu dhoge kara ejol rimb umeru kud i cingi; 12kan ifuro ng’om, ebimio tego pare kendo ngo iri; ibidoko jang’wec man jawoth m’ariri i ng’om. 13Man Kain uwacu ni Yehova kumae, Masendi para dit ma sagu m’acopo bedo ko. 14Nen, iriema woko tin kud i wang’ ng’om; man jubiketho abedo apana ni weng’i; man abibedo jang’wec man jawoth m’ariri wi ng’om; man ebitimbre, nia ng’atu ma tek unwang’a ebinega. 15E Yehova wacu ire kumae, Ka kumeno ng’atu ma tek unego Kain, jubiculo kwor i wie bang’ abiro. E Yehova ketho giranyutha kum Kain, kara ng’atu ma tek unene kud enege. 16Man Kain uai woko kud i vut Yehova, man ebedo i ng’om mi Nod, ma ni yo nyangu ni Aden.

Nyikwai Kain

17Man Kain ung’eyo dhaku pare; man egamu ie, man enyolo Enok: man egomo adhura, e elwong’o nying adhurane Enok, m’ulubo nying’ wode, ma Enok. 18Man Enok unyolo Irad: Irad ke nyolo Mehuyael; Mehuyael ke nyolo Methucael; Methucael ke nyolo Lamek. 19Man Lamek ugamu ire mon ario: nying’ ng’atu acel Ada, man nying’ ng’atu mucelo ke Zila. 20Man Ada nyolo Yabal: en e weg wagi ju ma bedo i hema ma weg lim. 21Man nying uminne Yubal: en e weg wagi dhanu ma goyo adungu kud usegu. 22Man Zila, unyolo Tubal-kain bende, ma jabodho mi jam girathuma mi mola man mi nyunyu kubang’e kubang’e: man nyamin Tubal-kain en e Nama. 23Man Lamek uwacu ni mon pare kumae:

Ada wuku Zila, wuwinj dwanda;

Wu mond Lamek, wuwinj wec para:

Kum anego dhanu kum tong’o lero i kuma,

Man jalawobi kum goc m’egoya;

24Tek jubiculo kwor pi Kain wang’ abiro,

Andha Lamek wang’ pier abiro wi abiro.

Nyikwai Seth

25E Adamu ng’eyo dhaku pare kendo; man enyolo nyathin ma nico, e elwong’o nyinge Seth: kum, ewacu kumae, Mungu ketho ira kodhi mange ka Habil; kum Kain unege. 26Man ni Seth, ire bende junyolo nyathin ma nico; man elwong’o nyinge Enoc. I kinde maeni dhanu maku lwong’o nying’ Yehova.

Zur Zeit ausgewählt:

Thangambere 4: AB1970

Markierung

Kopieren