Thangambere 11

Ot ma tek ma wiu mi Babel

1Man ng’om ngung’ en e mi dhok acel man mi wec acel. 2Man etimbre, ka giwotho yo nyangu, nia ginwang’u pambu i ng’om Cinar; e gibedo keca. 3Man giwecri gigi kumae, Wubin, watimu biriki, man waweng’ugi cu. E gibedo ku biriki ka kidi, man gibedo kud uza ni ulobo. 4Man giwacu kumae, Wubin, wagomu adhura iwa, man ot ma tek ma wiu, ma wie copo tundo kum polo, man dong’ watimu iwa nying’; wamaru lal mba mba wi wang’ ng’om ngung’. 5Man Yehova loro piny kara enen adhurane ku ot ma tekne ma wiu, ma nyithindho mi dhanu gomo. 6E Yehova wacu kumae, Nen, gi dhanu acel, man gin ceke gibedo ku dhok acel; man maeni en e gin ma githeko timo: e kawono gin moko mbe ma bicere igi, ma gikeco ya gitim. 7Wubin, dong’ waloru piny, man waloku dhoggi, kara ku ging’ei wec ng’atuman pa wadi ng’atuman pa wadi. 8Kum kumeno Yehova lalugi tung’ tung’ ku keca wi wang’ ng’om ngung’: e giweko gomo adhurane. 9Ka kumeno julwong’o nyinge Babel; kum keca Yehova loko ie dhok m’i ng’om ceke: man ku keca Yehova lalugi nge nge i wang’ ng’om ceke.

Nyikwai Cem

(1 Kei 1:24-27)

10Maeni dhanum’utuk pa Cem. Cem rundi pare dak acel, man enyolo Arpakcad rundi ario yo ng’ei pi m’ucoro ng’om: 11man Cem ucamu ng’om yo ng’ei nyolo Arpakcad rundi dak abic, man enyolo nyithindho ma co ku nyithindho ma nyir.

12Man Arpakcad ucamu ng’om rundi pier adek wi abic, man enyolo Cela: 13man Arpakcad ucamu ng’om yo ng’ei nyolo Cela rundi dak ang’wen ku wi adek, man enyolo nyithindho ma co ku nyithindho ma nyir.

14Man Cela camu ng’om rundi pier adek, man enyolo Eber: 15man Cela camu ng’om yo ng’ei nyolo Eber rundi dak ang’wen ku wi adek, man enyolo nyithindho ma co ku nyithindho ma nyir.

16Man Eber ucamu ng’om rundi pier adek wi ang’wen, man enyolo Peleg: 17man Eber ucamu ng’om yo ng’ei nyolo Peleg rundi dak ang’wen ku pier adek, man enyolo nyithindho ma co ku nyithindho ma nyir.

18Man Peleg ucamu ng’om rundi pier adek, man enyolo Reu: 19man Peleg ucamu ng’om yo ng’ei nyolo Reu rundi dak ario kud abung’wen, man enyolo nyithindho ma co ku nyithindho ma nyir.

20Man Reu camu ng’om rundi pier adek wi ario, man enyolo Serug: 21man Reu camu ng’om yo ng’ei nyolo Serug rundi dak ario ku wi abiro, man enyolo nyithindho ma co ku nyithindho ma nyir.

22Man Serug ucamu ng’om rundi pier adek, man enyolo Nahor: 23man Serug ucamu ng’om yo ng’ei nyolo Nahor rundi dak ario, man enyolo nyithindho ma co ku nyithindho ma nyir.

24Man Nahor ucamu ng’om rundi pier ario wi abung’wen, man enyolo Tera: 25man Nahor ucamu ng’om yo ng’ei nyolo Tera rundi dak acel kud apar wi abung’wen, man enyolo nyithindho ma co ku nyithindho ma nyir.

26Man Tera camu ng’om rundi pier abiro, man enyolo Abram, ku Nahor, man Haran.

Nyikwai Tera

27Nie maeni gi dhanum’utuk pa Tera. Tera nyolo Abram, ku Nahor, man Haran; man Haran unyolo Lot. 28Man Haran ular utho ni won ma Tera i ng’om ma junyole i ie, i Ur mi Jukaldayo. 29Man Abram giku Nahor gigamu igi mon: nying’ ci Abram en e Sarai; man nying’ ci Nahor, en e Milka, ma nya Haran, ma won Milka, man won Izka. 30Man Sarai mugumba kwanye; nyathin pare mbe. 31Man Tera gamu Abram ma wode, ku Lot ma wod Haran, ma wod wode, man Sarai ma ci wode, ma ci wode ma Abram; man gicidho gikugi kud i Ur mi Jukaldayo, kara gicidh i ng’om Kanan; man gibino ba Haran, e gibedo keca. 32Man ceng’ pa Tera gi rundi dak ario ku wi abic; man Tera tho i Haran.

Zur Zeit ausgewählt:

Thangambere 11: AB1970

Markierung

Kopieren