MATIUS 15
15
Youmaʾ Unulumek Yuba
(Mrk. 7:1-13)
1Wera Parisi nimi hnon uboka, onoʾ yuba neksin nanga hnon Yerusalem heikek ab uboka Yesus ak yek. Sikda Yesus ak heibnemekaʾ ara, 2”Hekasa anja yuba doro diriga ban nang era, sikda nunjaʾ youmaʾ nim edya ununaʾ era blekoka ulumak do? Sikda denemna dara, soruk mek eleganggonggom delemak!” hyek. 3Anasa Yesus adya sikenek ara, ”Ugumbabya ugunjaʾ neyung yab edya unulumek ununaʾ enyek unululumukanya, hekasa Imik Neyung yub ara bleklelum do? 4#Kel. 20:12, 21:17; Im. 20:9; Ul. 5:16Imik Neyung adya dara, Ugunjaʾ genong neyung ak pe gibel dololulum, anya, Alda heknedya aljaʾ genong neyung ak malya leboka walamla dara, bera hyakaʾ obnelum, hyok bok anasa, ugunda hekasa bleklelum do? 5Bok ugunja nimi yok nim ek yuba neklelum dara, nimi ben hnon aljaʾ genong neyung ak, Hekaʾ ak nadya genong neyung ugunuk eleganesisinyaʾ ara, Imik Neyung amba seleb beiyimna, helya dara, 6bera alja neyung ak, Or eleganggunumla, alalum. Anasa wera, ugunjaʾ neyung yab edya youmaʾ unulumek ununaʾ emba leboka, Imik Neyung yub ara dolbalekaʾ geblelum. 7Ugunda hyak sondaʾ hwam nim o! Ununumnaʾ lelemoknya Yesaya bedya ugunsamba leboka momnya dobokaʾ ara,
8 #
Yes. 29:13
Nimi ban nim enera, sikda yuba dem adya ok Imik Neyung ak giblemab aro giblenyak bok, sikja ganya era hyak mok beiyik gebdangoka ulumak.
9Nak ara salyaʾ giblenyak, sikja neklesak yub era nim adya yub ek neklesakjok, nadya yub ek lero neknenggulusak, aro momnya dobokaʾ ara dib lebok,”
hyok.
Nimi Malya Nenelesakaʾ Damok Yuba
(Mrk. 7:14-23)
10Dara onoʾ Yesus adya nimi nauba ak yoululum aboka sikenek lebnesukaʾ ara, ”Ugunda pe ella danalum aboka kebnelum! 11Sibamaʾ ak sam weklelanya nedya nim ara sembejaʾ gebnenggulusil bok, alda sibamaʾ ak ab ara goboka beiyik yabalelanya nedya danyek hnonok, nim ara sembejaʾ geblesil,” hyok.
12Dara Yesus adya yuba doro diriga ban nang edya, Yesus ak yeiniboka, ”Neyung o, anja ban wenyaro lelelam yub era, Parisi nimi kelemak dara, sikja ganya malya ulusilaʾ ara, ella ululam de?” aboka heimek. 13Yesus adya sikenek lebsukaʾ ara, ”Nadya neyung be imik heikek sam ululanya bedya mebnenggumlya yinaʾ era, eimik nidyaʾ yarenga lelewoka gwenewanamla. 14#Luk. 6:39Ugunda Parisi nim enesa nauba seiniwoka lenggom. Sikenek seleb henga luma yousuk nang ek anara ulumak, anya henga lumnya bedya henga lumnya bek pik ablamla. Dara sikda neikaʾ selengaʾ lomok malyingginirak,” hyok.
15Danyek Petrus bedya Yesus ak, ”Neyung o, ban sunuwoka leblam damok enyek, anyek lebna aboka nuk lelewoka neksilom!” hyok. 16Dara Yesus adya sikenek lebsukaʾ ara, ”Ugumbabya anam ella danggulum de? 17Damok ara yokaʾ hnon sibamaʾ ak sam wekoka mon lomok sam yingginiboka, onoʾ goboka yabalamla ara eilinggululum de? 18#Mat. 12:34Bok hekaʾ ok sibamaʾ ak ab goblelanya nera, ganya lomok ab ak goblamla; anya ana nong adya nim ara sembejaʾ nenelesil. 19Anasa nimi ganya lomok ab malya unaʾ ganya ara lanalamla, anadya wera nim olomak, gela salalemak, gel ganya ok deknewoka ulumak, hokaʾ dolomak, nimi derewoka waboka sondaʾ amba besa leboka nimi malya nenelemak. 20Banyan ulumla damok edya, nimi nidyaʾ ara sembejaʾ nenelesil, alda nimi soruka mek elekdanggonggom denaʾ delemakaʾ adya nimi ganya ara malya nenenggulusil,” hyok.
Kanaan Gel Ge Yuba Dib Senemok Yuba
(Mrk. 7:24-30)
21Wera onoʾ Yesus anyagan ara loboka, alda Tirus Sidon heik berem moka byuk. 22Kanaan mok eb gel ge hnon, Yesus ak bii aboka lebgiga yalamokja, ”Daud bedya me o, nak angoo yadyek ubneya e! Nadya gelma era bisaʾ wekdoboka, hyak nauba gweklamla bar,” aboka lelemok. 23Yesus adya dara, gel genyek ara yuba mekaʾ saaboka sab eleganggumok. Anasa Yesus yuba doro diriga ban nang edya Yesus ak, ”Wenelesilimnya o, ban gel gera nuk yuba mandebnaʾ amba lero yabalamlaʾ anasa, bilom helom,” aboka molol yek. 24Yesus adya sikenek lebsukaʾ ara, ”Nara Israeli nim enyek, malya dangoka weiningdangamek nim emba ok bokol yeilinyok,” hyok. 25Dara onoʾ gel genedyaʾ anaba Yesus adyaʾ saramek sam kom lumugoka bul yeiniboka, ”Neyung o, nak arayiwananelem e,” hyok. 26Yesus adya gel genyek lebokaʾ ara, ”Mekmabo denaʾ anyek doboka gam ak sam elekna dara, perob gom,” hyok. 27Dara gel genedya Yesus ak, ”Neyung o, aldib nonga leblam. Bok gam anababya aljaʾ neyung bedya yanganaʾ gal ak sam bukoka delemna enyek, denaʾ siknaʾ yanggalamlaʾ ara gam adya boboka delemla,” hyok. 28Anasa Yesus adya gel genyek an, ”Genong o, anja dib senelelamaʾ ara hyak senenggom nong! Anasa anja unuwanaso senelam sok unuwanenggel!” hyok. Dara al wene sab-sab gel genedya gelma era gobdo merewok.
Neiklemek Nimi Nauba Hwebsuk Yuba
29Yesus ara al ulumok ak abaʾ ara loboka, Galilea mek gwan gem pik dobgiga balamok. Anya alda yok mok soko yemek bindiwoka bukumok. 30Dara nimi nauba Yesus ak, koma bulumek nim hnon, nonga heilisuk nim hnon, yuba goma dangalamek nimi hnon, henga luma yalasuk nimi hnon, anya yok-yok neiknaʾ salalesuk nimi nauba bo yalamek. Neiklemek nimi nidyaʾ ara Yesus adyaʾ saramek sam bo beil yalamek dara, Yesus adya merellilisuk. 31Nimi nauba dem nim anyagan ulumek nim era, anyek eiyiboka hyak nauba loka dasuk. Dara, yuba gom nim era yuba saro yabalamek, koma bulumek nim era mereboka yabalamek, nonga heilisuk nim era pe yan ingi yabalamek, henga luma ulusuk nim era pe henga gwelegoka eillilemek. Nimi nidyaʾ ara anyek eiyiboka, Israeli nim era Imik Neyung bek giblemek.
Nimi Denga Yubaʾ Dombadya Nang Ek Denaʾ Deb Elegosuk Yuba
(Mrk. 8:1-10)
32Wera onoʾ Yesus ara alja yuba doro diriga ban nang ek anyagan yoululum aboka, ”Nara nimi mandebnaʾ danyek, angoo yadyek ubnel. Sikda nablaboka gobdo lika winilya gwaneng bunya anyek mabsiniwab, anya wenera sikda denaʾ ara dengaramla. Sikda pikek ab gwaneng mesa dakoka somogeijek anasa, nadya dara, or bindowoululum henggunusinya,” hyok. 33Dara alja yuba doro diriga ban nang edya alak, ”Nimi mandebnaʾ naubakanya, denaʾ garan mok ek bok anasa, denaʾ ara har sam ab doboka eleganesibya do?” aboka lebek. 34Dara Yesus adya sikenek, ”Ugunuk ara roti gwanenga hekbadya ulumla do?” wenyaboka heibsuk dara, sikja Yesus ak, ”Roti gwanenga sekbadya uboka, mek hadyaʾ era or wen ulumla,” hyek.
35Dara Yesus adya nimi nidyaʾ anyagan ulumek nim ek, ugunda sokok sam buklulum aboka orugosuk. 36Anya Yesus ara roti gwaneng sekbadyaʾ anyeb, hadyaʾ danyeb doboka, Imik Neyung perob aboka giboka molowok. Seleb dara, roti gwaneng ab hadyaʾ ab dara, soruk adya soboka, alja yuba doro diriga ban nang ek elegosuk. Dara nang enedya nimi nidyaʾ bukumek nim ek boksik. 37Nimi nidyaʾ ara gigiwoka delemekaʾ loboka mona bukoka jek. Dara onoʾ, Yesus adya yuba doro diriga ban nang edya deregoka bok lobeknya nera neikaʾ ak mamaklemekaʾ ara, oulyanga sekbadya deknemokaʾ anyek mamak lobek. 38Dara anyagan bukoka delemek nim era, gelewa ab mekmab eb dara, eininaʾ orok bok, alda nengmab okaʾ anyek hiboka nimi denga yubaʾ dombadya nang (empat ribu orang) delemek.
39Wera Yesus adya nimi nidyaʾ ara ugunja ek sam binilum aboka orugosuukanya, alak dara, mek ekla bunaʾ bukoka, Magadan mok ek sam byuk.
Zur Zeit ausgewählt:
MATIUS 15: LAINLC
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
