MATIUS 11

Yohanes Bedya Mabo Yesus Ak Bilimek Yuba

(Luk. 7:18-35)

1Wera Yesus ara alja obadya yuba doro diriga ban nang ek pe wenebgogowosuk dara, alda anyagan ara loboka yokok sam byuk. Anya Yesus ara al ulumokaʾ ok berem heik pik Imik Neyung adya unuwanalum wenyaboka lesuk yub enyek leb elekdo yabalesuk.

2Ban Kristus adya unu wa welemok yub era, Yohanes Pembaptis bera alda henga geregoka beiyimek ek ab kebok dara, Yohanes bera alja yuba doro diriga ban nang ek Yesus ak banyek wenyaboka heil binilum aboka orugosuk. 3Dara sikda, ”Neyung o, al anak Imik Neyung adya nimi blebsinaʾ dubnya yanamla amoknya bera anda alan goma, orok dara, nunda onoʾ yoknya bek anam diri ulumnemab gom?” wenyaboka heil binilum aboka lebok. 4Dara Yesus adya sikenek, ”Ugunda Yohanes bek on pik biniboka ugunja seleb heng eiblumaʾ ab, o keblumaʾ ab danyek, nekdo binilumaʾ ara, 5#Yes. 35:5-6, 61:1Henga luma yeilimna nang eillilemak, nonga yana heimna nim eikaʾ yabalamak, nong bokaʾ malya ulusil nimi hwebna dara, bokaʾ dolomak, o ounugamna nim o bakoka kelemak, seleb somogamna nim embengaʾ suboka bulumak, Imik Neyung ak ab perob lero yanggan yub era nimi bonaʾ garan ulumak nim ek lero yabalamlaʾ anyek eiyiboka unulamla aboka nekdo binilum. 6Nak an solom ganya boboka lek senenggulunyak nim era, or pe ulumak!” hyok.

7Wera Yohanes Pembaptis bedya yuba dolomek nang era seleb Yohanes bek, Yesus ara anaso unulamla aboka nekdo byik dara, Yesus ara anyagan nimi nauba ulumek nimi gong ek Yohanes bemba geklewoka lebokja, ”Ugunda hwalek sam balalumaʾ ara hekaʾ ak eibnobaʾ aboka balalum do? Walenja anyek kaboʾ adya bo yabalyaʾ ak eibnobaʾ aboka balalum de? 8Orok dara, ugunda hekaʾ ak eibnobaʾ aboka balalum do? Aklenga pe ongolenya bek eibnobaʾ aboka balalum de? Anaso akleng ongolomak nim era sikda senenggom dub nang ek ok ulumak! 9Anasa wera, hekasa ugunda hwalek sam balalum do? Nim ununumnaʾ lelelenya bek eibnobaʾ aboka balalum de? Aldib, alda ununumnaʾ lenya ulumla. Anya alda ununumnaʾ len nang era or mek so bok, Yohanes bek dara, senenggomnya ulumla. 10#Mal. 3:1Anasa ban Yohanes benyek Imik Neyung yuba bukuk sam men momnya lero dobokja,

Nadya boksenya bera ban e, anda anam bok, alak men pika yarawolulaʾ aboka bokol binimna,

wenhyok ara momnya dobok,” hyok.

11”Ugunda pe beknelum! Nimi nidyaʾ sokok anara hnon senenggomnya unaʾ hyak orok bok, Yohanes bek alak ok hnonok senenggomnya ulumla. Alda anaso ulumlaʾ anaba, Imik Neyung wenesinaʾ ak mekaʾ ululanya benyek senenggomnya ulumlakanya, Yohanes bera alda onoʾ mek so ak ulumla. 12#Luk. 16:16Yohanes bera alda anam yuba lelemok salek ebaʾ moruwoka, nim Imik Neyung wenesinaʾ ak ulumak nim era, yok senenggom nang dangoka ulunob senelemak nang edya malya nenewoka ol neblesak. 13Anya Yohanes be yanggom salek era, Musa bedya unuwanalum an yub ab, ununumnaʾ lelemek nang edya neksik yub eb dara, eimik yokaʾ unuwanamla yub ok leboka neklesik. 14#Mal. 4:5; Mat. 17:10-13; Mrk. 9:11-13Anasa ugunda alak or dib senewanamna senewomun dara, Yohanes bera Elia be an lunuwoka ulumla an, al yanamokaʾ amba dara, ununumnaʾ lelemek nang edya orowek lebgogomek. 15Ugunda o yakaʾ ara, hyak pe kebnelum!” hyok.

16”Nara nimi wen ululum nim emba dara, hekaʾ ak sunuwoka lebnesin do? Nimi nidyaʾ ara deknaʾ gasaʾ ak salyaʾ yuba saro bulumak mab enesoʾ ak ulumak. Hnon mab edya yok mab ek lelemakja,

17Nunda ugunsamba perob bera doboka seblesab bok, ugunda eiya hlaboka sunuknenggululum! Nunda ugunsamba ganya engewanasuso bera seblesab bok, ugunda ganya suguwoka engenggululum!

aro bulumak. 18Yohanes bera yeiniboka, alda gwanenga lobsiniwoka, anggur dok mek anaba denggulumok; dara nim adya dara, Alda bisaʾ wekemla, alamek. 19Wenyek dara, nimi dibaʾ me nera, alda yeiniboka gwanenga deregoka, meka deregoka ulumla dara, nim adya dara, Ugunda benyek kendululum! Denaʾ hwamnya, malya meka salyaʾ denya, mok soko amba rupiah molowoka don nang eb, malya unaʾ nim eb dadya sikjaʾ hem benyaʾ, alamak. Ban wenyalamakaʾ anyek, perobaʾ uboka geremsengaʾ ara unulumakaʾ damokok onob laga geknel balamla,” hyok.

Dib Senenaʾ Orok Heik Ak Lebok Yuba

(Luk. 10:13-15)

20Wera Yesus ara alja yuba nauba leboka, lok soʾ migib ununaʾ nauba unulumok heikek ara, nimi nauba malya unaʾ ak ab loboka ganya dangawanggumekaʾ anasa, gorogoka nauba lelemok. 21#Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4Dara, ”Korazim heik o, anda hyak omom nongaʾ ak ululam! Onoʾ Betsaida heik amba hyak omom nongaʾ ak ululam! Ugun gangganek an unulamna senenggomaʾ lok soʾ ara Tirus mok eb Sidon mok eb seleb unusinya dara, anasa sikda nidyaʾ sikja hukuk sam aso lob golubdangoka, seleb malya unaʾ ak ab loboka ganya dangamnaseng. 22Ugunda banyek pe seiniwoka beknelum! Soko sidyaʾ daknamla sum era, Tirus mok nim eb, Sidon nim eb dara, or sikenek mek so obnesil bok, ugunuk dara, hyak nauba obnesil! 23#Kej. 19:24-28; Yes. 14:13-15Anya Kapernaum heik o, anak imik nenewoka imik heikek sam nenewanenggel de? Hyak orok! Anda hyak somokna nim heikek ak sam boboganenggel! Anasa an ululamaʾ gangganek an lok soʾ senenggom damok unulamnaʾ ara, men Sodom heikek seleb unusinya dara, Sodom heik ara weneba or ubnamso! 24#Mat. 10:15; Luk. 10:12Ugunda banyek seiniwanalum, soko sidyaʾ daknamla sum era, Sodom nim ek dara, Imik Neyung adya sikja malya unaʾ amba mek so obnesil bok, ugunuk dara, nauba so obnesil!” hyok.

Yesus Adya Nak Yalalulum Hyok Yuba

(Luk. 10:21-22)

25Ban sum enyek, Yesus adya heng uboka molowanamokaʾ ara, ”Neyung o, anda im ab soko ab dara, anja uyilum! Ban unulumaʾ damok ara geremseng nim eb, yok-yok ella danganaʾ dolomak nim ek sam ara, anda doknowoka gunulumukanya, alda yokaʾ-yokaʾ ella danganaʾ orok nimi mek nang ek sam amalesilimaʾ anasa, nara anak perob aboka giblenggen. 26Ban unusulumaʾ ara, an dam nang orowek perob senelumaʾ adya unulum,” hyok.

27 # Yoh. 3:35, 1:18, 10:15 Dara Yesus adya lebokaʾ ara, ”Yokaʾ-yokaʾ nidyaʾ ara neyung bedya nak elegoka lobongganyok. Nimi nidyaʾ ara me ak ara elgom ulumak bok, neyung bedya ok hnonok ella ulumla. Nimi nidyaʾ anaba, neyung anak ara elgom ulunjak bok, me adya ok ella ulunggel, anya me adya nadya neyung bera ban aboka amalesin nim edya hnon anak ara ella ulunjak.”

28”Ugunda nidyaʾ hmeng uboka, igina yakaʾ adya igina kwelesil nim era, nadya ugunuk jakmana gibiyiwanasinaʾ anasa, nak an yanalum. 29#Yer. 6:16Nara namen uboka, ganya sokok gebdangoka ulunanya bek anasa, nadya bollilesin igin yakaʾ era dobnelum dara, nak anyeb yokaʾ nidyaʾ einiwoka ella danalum dara, nara ugunuk ganya daklinggoka unaʾ eleganesin. 30Anasa, nadya lelesin yub era, yongonaʾ ak ulumla, nadya ugunuk bollilesin igin yakaʾ era jakmanaʾ ak ulumla,” hyok.

Zur Zeit ausgewählt:

MATIUS 11: LAINLC

Markierung

Kopieren