MARKUS 15
15
Jesus Pilatus Jumaapa
1Abata digii imam iboudo ma, me iboudo ma, kapogeije epi bagee ma, mana pika-tai kotuu ma mana wegai. Okei Jesus buda egadimijake Pilatuspa eekegajawigou.
2Tijake Pilatus egaado teete mana, „Aki ki Jahudi ejakimaketai me kidi, mee?” Etijake Jesus eteete mana, „Akija eneege dani,” etii.
3Imam iboudo ka mana muto wedaba Jesus ewidogai.
4Tijake Pilatus kigeena ma egaado teete mana, „Aki manaana ma wo te etii, mee? Juwidodou, mana muto wedaba aki maida kawidogeete,” etii.
5Kodeja Jesus manaana ma wo etii beu kouja Pilatus ego takuu-takuu.
Barabbas
6Ibo naago kodo Pilatus kidi wanee owaa duba ka me idaana jajaikeigi, okeija ka ediimija me kidi.
7Me idaana eka ki Barabbas kidi okaija ogaaneido ma enaimo wanee owaa duba toojogo, tetepepe ewaa awijake okai me wagimakai kouja.
8Meido kodo Pilatuspa uwijake kei teigi danite nijakei tetijake ediimai.
9Tijake Pilatus wo eteete mana, „Jahudi ejakimake-tai me kijajaikai ide, mee?” etii.
10Imam iboudo kede be egajake kouja eekegajawii Pilatus epi kouja.
11Kodeja imam iboudo ka meido kodo monoo etai, Barabbas jajaikai ediime-tijake.
12Tijake Pilatus kigeena ma wo eteete mana, „Keetigo ko ani magijo Jahudi ejakimake-tai me eebateegai kidi kei etai ko?” etii.
13Tijake okei emeeme teete mana, „Pija boko maida edajawii,” etii.
14Tijake Pilatus eteete mana, „Má peu agijo kei tijake ka?” etii. Kodeja okei umina emeeme teete mana, „Pija boko maida edajawii to tai.”
15Tijake Pilatus meido ideide etijawiine tijake Barabbas kidi jajaikai. Okai Jesus godijai etijake pija boko maida edajawetijake eekegajawii.
Serdado Kedaa Jesus Ewidogai
16Serdado ka owaapa ouwii, mana pika-tai kotuu ka owaapa kodaa. Tijake serdado imouto kotuu timakai.
17Okei Jesus maida digijo kagaba jamakijawii, daana dogo buda bubukajake dagi maida kobeigido makita jatijawii.
18Tijake okei migaakobe eteete mana, „Ei, Jahudi ejakimake-tai Ibo kidi!” etii.
19Mome ka okaija dagi maida wagii, daana epoge etuwai. Tijake okei bado donimakijake migaakobe etai.
20Ewidogijake digijo kagaba kodo jabeja-motijake okaija makita kagaba jamakijawijake ouwii, pija boko maida edajawiine tijake.
Jesus Pija Boko Maida Edajawita
21Me idaana mudeida make meetigo, eka ki Simon, Kireni makijo ka me, Iskandar ma Rufus ma nakame kidi; kii me kidi pija boko jadoke-tijake tapa-tapa etai.
22Eka ki Golgota ouwii, me manaida awi-toojogo ko, Dagi Mitoo Kotuuda.
23Utaadijo enege peu uwo ma takaa tijake menii kodeja okai motii beu.
24Okei pija boko maida edajawijake okaija kagaba okei wudii. Tipa po momogo tija dani kei tijake okei me gakita aki-motii-motii taine tijake.
25Meuka tegemiida gaa okei pija boko maida edajawii.
26Ewidogai mana kodo okai wadouto kii dani ebijamakita, „Jahudi ejakimake-tai me.”
27Oma mote-tai wija okai ma enaimo etikaato meena, akaato meena pija boko maida edajawita.
28Kou dani kapogeija mana kobadoke tita: Peu bagee ma enaimo egakita.
29Koudaiga jaweete bagee ka migo kuneewatii tijake ewidogeete mana, „Jee! Aki ki Ugatameja owaa bogomijawija, daana naago wido to migijawija kidi,
30aki akaato petii tidodou, daana pija boko maida make mijouwe kidodou!” etii.
31Kou dani maija imam iboudo ma, kapogeije epi bagee ma ewidogeete mana, „Okai joko ka bagee petii etijawita. Okai akaato petii te timake.
32Keristus kidi, Israil ejakimake-tai me kidi ki, pija boko maida make ito ki mijouwe kai enaa, inii edojake maakodo egaipage kojoka,” etii. Okai ma enaimo pija boko maida edajawita kede maija ewidogai.
Jesus Bokata
33Dagi epouda make kou makiida maki utoma wanee kijake kou kodo meuka amouwe dagiida to.
34Meuka amouwe dagiida gaa Jesus kuutakaa emeeme teete mana, „Eloi, Eloi, lama sabachtani?” Me manaida awi-toojogo ko, „Ei, anija Ugatame, anija Ugatame, magijo ka najaikeege?” etii.
35Okai kouda kodaa joonita bagee wija wido juwijake kei teete mana, „Juwidowei, okai Elias manaa-teete,” wegai.
36Me idaana tibigi uwijake enege utaadijo duba oobaa tokamijake mome momogiida juku atii; tijake no-tijake menii, kei teeté mana, „Todowei, Elias mejake mijouwe eewiipagije, beuje, dou no,” wegai.
37Tijake Jesus kuutakaa emeeme tijake ebeejo wo motidoke.
38Ugatameja owaa bede duwajawita kagaba petaago jupiidaiga wija kai, waiko make wako to.
39Serdado migougu kidi okai jumaapa joonita kidi kou dani bokapi mana kodo dojake okai wegaate mana, „Beu maa kou, me kii ke Ugatame Joka,” wegai.
Pija Boko Epaapa ka Jagamoudo
40Kouda kodaa jagamoudo maija poto make edoutou. Kou kodo ko Marjam Magdalena ma, weneka Jakub ma Josias ma ukame Marjam ma, daana Salome ma.
41Okei Jesus eepejake eedadita bagee, okai Galilea toojogo gaa. Daana ino ka jagamoudo maija okai ma enaimo Jerusalim wado uwita.
Jesus Me Oka Emakita
42Uwaataa kijake, kou naago kodo epeepi timakai naago kodo, aweetaa Sabbat naago kouja,
43Arimatea ka me Jusuf kidi, kii ke mana pika-tai kotuu ka ibo ejaikita me idaana kidi mei. Okai maija Ugatameja jakimakita makiida douto-tai me idaana. Okai uu peu kidi Pilatuspa Jesusja má jato ediime-uwii.
44Pilatusja Jesus bokapi mana juwijake ego takuu-takuu. Tijake serdado migougu kidi manaa-tijake, maakidi Jesus bokai tiki, mee? beu tijake etidou.
45Serdado migougu kidiipa make epi kijake okai Jesusja má jato Jusuf kidiipa menii.
46Jusuf enaa kagaba edajake Jesusja má jato mijouwe eewijake etonimakai. Tijake mogo duwimakita me oka duba emakijawii. Me oka damouto mogo taki atii.
47Marjam Magdalena ma, Josias ukame Marjam ma Jesus emakitaida aadou.
Zur Zeit ausgewählt:
MARKUS 15: EKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
