LUKAS 5
5
Ego Takuu-takuu Manaida Binei Mugai
1Meido Ugatameja mana juwiine tijake Jesus maida tipi-tipi etai, Okai Genesaret peku watija jooni-toojogo gaa kodo.
2Koma wija peku watija mijijawi-toojogo dou; kodeja binei muga-tai meido kede mijouwe kijake ebai witogeetigo.
3Koma maana Simon ipuwe ka kodo matakijake mijo gaa jamo pojawii ediimai. Okai animakijake komaida make meido etopai.
4Okai mana muumai tijawijake Simonpa eteete mana, „Ukaida jamo pojake binei mugaine ebai mijaawii,” etii.
5Tijake Simon wo eteete mana, „Kuduu, inii wanee woja ee ma ubaate idaana ma mugai beu! Kodeja aki mana eneege kouja ebai mijaawiipiga,” etii.
6Okei mijaawijake binei kotuu to awidaa tai. Ebai kigibidaa taine ijeida kouja
7okei wa kei te-tai bagee joko ka komaida eedade-tita tijake ganaabegouda manaa-tai. Okei mejake koma wija kodo ebetume tijawijake gibu taine ijeida.
8Okai kou kodo Simon Peterus dojake Jesus jumaapa apaipu tidoke tijake eteete mana, „Ei, Tuhan, najaiki, ani peu umina kojoka,” etii.
9Okai ego takuu-takuu kouja, okai ma enaimo bagee maija, okeija ka binei mugata kodo maida make.
10Kou dani maija Zabdi jokaane Jakub ma, Jahja ma, Simon ma enaimo kei te-tai bagee kede. Tijake Jesus Simonpa eteete mana, „Weda te gai. Ito make wado me mugaitage,” etii.
11Okei koma iteida mijimakijake utoma agijo utoma jaikidokijake Jesus eepei.
Tomo Jago Dani Me Ojawii
12Maki enaida tota gaa tomo jago dani kiipigi koupagi me idaana mei. Okai Jesus edojake maki jato mijouga kijake bida peu ediimeete mana, „Ei, Tuhan, kou danite aki enaa gape ko, aki bida jago kojoka naojawii,” etii.
13Tijake okai gane mapido atii. Ejakidojake eteete mana, „Ani ide. Aki oodoke ti,” etii. Okai kou gaa kodo maija tomo dani kodo igadaa tai.
14Jesus etimakeete mana, „Me idaana ma te etii, kodeja aki akaato imampa emuwake-uwijake oodoke keege kouja menija agijo menii, Musaja nitimakita danite, okei dimi ga-tita tijake,” etii.
15Kodeja umina kodo okai maida make mana wudigi tidoke tai. Me umina wedaba ejuwaine ma, didi beu jaawe-tita ma okaapa kotuu to tigoo.
16Kodeja Jesus me beuda uwijake sembahjang tigoo tei tita.
Bado Ekogadaa Tita Me Beu Jaawii
17Naagoona Jesus etopeetigo gaa Parisi bagee ma kapogeije epi bagee ma kouda kodaa animaki-toojogo; okei Galilea dokoo ka e maki te maki make mejake, daana Judea make ma, Jerusalim make ma; Tuhanja bida agijo kodo okai maida, didi bagee beu jaawe-tijake.
18Me ka bado ekogadaa tita me idaana uno umii kejage maida edokai. Jesus jumaapa emakijawiine tijake woujo kaine ita ubai.
19Kodeja ita beu kijake me tipi kouja owaimouda wadouwe kai. Owaimo kebajawijake edokita kejage maida me jupiida Jesus jumaapa mijouwaawii.
20Okeija ka maakodo gai kodo Jesus jadojake eteete mana, „Ei, me ki, akija peu awitaido ipa kajaikidokii,” etii.
21Kapogeije epi bagee ma, Parisi bagee ma mana go-motii, kei teete mana, „Kii ke meime Ugatame eduwaate mana godaate kidi? Meija peu awitaido ipa ejaikija? kodeja Ugatame kidaa to,” wegai.
22Okeija ka dimi kodo Jesus epi kouja wo eteete mana, „Magijo ka kegepa duba mana wegaate?
23Kawi ka ki ekowadoke, ’Akija peu awitaido ipa kajaikidokii’ etii ki, mee? ’Anigojake uwina ti’ etii ki.
24Kodeja me Joka makiida kiija peu awitaido ipa ejaiketijake boko jaduwajawita me kidi ikii epi ke-tita” tijake bado ekogadaa tita meepa eteete mana — „Ani katii, anigou. Akija uno umii kejage dokijake owaapa uwii,” etii.
25Okai kou gaa kodo okei pekaida okai anigojake uno umii kejage dokijake owaapa uwii, Ugatame muta etuwaate.
26Okei utoma umina maa kou ego takuu-takuu tijake Ugatame muta etuwai. Okei weda umina gajake wegaate mana, „Ito naago inii gai beu mana dooge kodaa,” wegai.
Lewi Manaa-tita
27Wadoutouga Jesus podomijake mege kotuu te-tai me idaana eka ki Lewi mege kotuu te-taida animaki-toojogo edou. Tijake okaapa „Naapei,” etii.
28Utoma agijo jaikidokijake okai joonidoke tijake eepei.
29Lewija owaapa ibo buka oonai. Mege kotuu te-tai bagee wedaba ma, joko ka bagee ma, me wedaba mejake oonai.
30Tijake Parisi bagee ma, Parisi jaida kapogeije epi bagee ma Jesus etope-taido kitigi motigi eteete mana, „Magijo ka ikii mege kotuu te-tai bagee ma, peu bagee ma enaimo noote?” etii.
31Tijake Jesus wo eteete mana, „Bida bagee doktoda dim te egaja, kodeja didi bagee to.
32Ani enaa bagee ebukaine mei ko beu, kodeja peu bagee ebukaine mei, okei tedeme-tijake,” etii.
Te Nai Dijo Dou Mana
33Tijake okei wegaate mana, „Jahjaja etope-taido kigi inoudo te nai dijo do-tai ma, sembahjang ma; Parisi etope-taido maija kou dani, kodeja akija etope-taido nai to tigoo,” etii.
34Tijake Jesus eteete mana, „Waka bukeete me kidi ogaaneido ma toojogo gaa kodaa, buka oonoote bagee kede te nai dijo dou etija, mee?
35Kodeja putu naago kaita kodo, waka bukeete me okeepa make beu kijake, okai kou gaa kodo okei te nai dijo doutai,” etii.
36Tijake ena dani awe-tai mana etii, „Me idaana ma ija kagaba kapoona te wigo-motija, doga kagaba maida puumaine tijake. Kou kei ti-toojogo, ija kagaba kodo wigodoke, daana ija wigomotita kapo kodo doga kagaba ena dani beu.
37Daana me idaana ma ija utaadijo doga kado tapuja duba te wagaawija; ija utaadijo kodo potu tijake kado tapuja wigodoke kouja. Tijake utaadijo kodo tuumijake kado tapuja peu kai.
38Kodeja ija utaadijo ija kado tapujaida wagaawija.
39Daana meena ma doga utaadijo nojake ija utaadijo ide beu, ’Doga ka ko igi enaa no’ wegai kouja.”
Zur Zeit ausgewählt:
LUKAS 5: EKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
