LUKAS 3
3
Baptis Tei Tita Me Jahja Kidi
1Kaisar Tiberius maki jakimakita gaa idibi ma gaatijago taun kodo; Pontius Pilatus kidi Judea ka Gubernur ki-toojogo; daana Herodes kidi Galilea ka Gubernur; daana kenekame Pilipus kidi Ituria ma, Terachonitis ma ka Gubernur; daana Lisanias kidi Abilene ka Gubernur.
2Hannas ma Kajafas ma Ibo Imam aatoojogo gaa, Ugatameja mana Zakaria jokame Jahja maida kita, gei tapa make.
3Okai Jarden onee watija bobi-motii, tedemijake baptis tai mana pitokeete, peu awitaido ipa jajaike-tijake.
4Tikauwa ka gokobaki tijawiidaiga wegai tita me Jesaja kapogeije ebijamakita danite:
Gei tapa mana emeeme tina:
Tuhanja ita epeepi jawadijawii.
Kago-pagooja maija doodoo jaawii.
5Dobaa dobaija wado edijake tai,
Daana bago ma kotu ma mukajake tai,
Ekoba dani kodo doodoo awii,
Daana takuudo gakimijawii.
6Tijake me tuma tumaija Ugatameja ajii bokouto doutai.
7Baptis taine meta me wedaba kedeepa Jahja etei tita: „Kowaa kei, jina tuma, kumi dimi putu duwadoke taita kodoopa make okii mana kodo meija kitipi?
8Ikii tedemai mana ma utuutu ka uta gojawii, daana ikii kede kegepa duba ’Iniitai Ibrahim kidi’ mana kodo wegaate te go-motii. Ani kitii kouja, Ugatame kei mogoudo kei Ibrahim jokaane eewii bida jago kidi.
9Ito kou maija pija epaapa jika makijake topi. Okai kouja pija gakita enaa uta gojawii beu daniija kobimakijake bodija jookogai,” etii.
10Tijake me wedaba kede wo eteete mana, „Inii magijo kei tai?” etii.
11Tijake meidoopa wo eteete mana, „Meija badju wija ewaa kipi, beu me kidi ena menii. Daana naija agijo makipai bagee maija, okai kii dani tai,” etii.
12Mege kotuu te-tai bagee maija baptis taine mejake eteete mana, „Ei, Kuduu, inii magijo kei tai?” etii.
13Tijake eteete mana, „Kitita agijo abuma te motii,” etii.
14Serdado maija egaado teete mana, „Inii ke magijo kei tai?” Etijake wo eteete mana, „Me peepu te etai, daana puja manaida make meido ijeije te etai. Daana ikiija kei tai age kodo tiki gai,” etii.
15Me utoma douto-douto teetigo, daana kegepa duba kei teete mana, Jahja kidi Keristus kidi kipi gaa, mee? gajake.
16Jahja kidi wo eteete mana, „Ani ki uwo ka baptis kitai, kodeja ani ma ko okai ki bida jago me meitagi. Okaija bado awii buda jaekegai ko nadou peu. Okai kidi Rohulkudus ma bodija ka ma baptis kitaitagi.
17Jimu mapagi te-tai agijo kodo okaija ganeida topi, uta epaida deekumijake gandum uta awimakijaida awimake-tita. Kodeja kopu jato ko te madinimake bodija duba jookogaitagi,” etii.
18Joko ka etopai mana kodoudaiga maija ajii mana kodo meido kodoopa japitokai.
19Kodeja wiijago kabuuda maki jakimake-tai me Herodes kidi Jahja ka ewidogita, kenekameja waka Herodiah maida make, daana joko ka peu agijo kei tita maida make maija.
20Tijake kei manaido utoma abuma peu aweete Jahja wanee owaa duba amo eewii.
Tuhan Jesus Baptis Etita
21Meido utoma kede baptis etita gaa, daana Jesus baptis etijake sembahjang teetigo gaa, epa damo kebadoke tai.
22Tijake Rohulkudus okai maida mijouwe kai, wonou epoo dani bukaa. Tijake epa duba make ka mana wuu tijake eteete mana, „Aki ki ani Joka didé. Ani umina juma dege-dege katai,” etii.
Tuhan Jesus Keristus Mijo Ekebata Mana
23Jesus kidi taun jokagaati dani umijake kei tai go-motita gaa. Me ka egai ko, okai Jusuf joka; Heli joka,
24Matat joka, Lewi joka, Malchi joka, Janna joka, Jusuf joka,
25Matatias joka, Amos joka, Nahun joka, Esli joka, Naggai joka,
26Maat joka, Matatias joka, Simei joka, Jusich joka, Juda joka,
27Juana joka, Resa joka, Zorubabil joka, Sjaaltiel joka, Neri joka,
28Malchi joka, Adi joka, Kosam joka, Elmodam joka, Er joka,
29Jusa joka, Eliazar joka, Jorim joka, Matat joka, Lewi joka,
30Simeon joka, Jahuda joka, Jusuf joka, Jonan joka, Eljakim joka,
31Malia joka, Minna joka. Matata joka, Natan joka, Daud joka,
32Jisai joka, Obed joka, Boaz joka, Sala joka, Nahsjun joka,
33Aminadab joka, Arni joka, Ezrom joka, Paris joka, Jahuda joka,
34Jakub joka, Isak joka, Ibrahim joka, Tarah joka, Nahor joka,
35Saruch joka, Ragau joka, Palik joka, Abir joka, Sala joka,
36Kainan joka, Arpaksad joka, Sem joka, Nu joka, Lamech joka,
37Metusalah joka, Enoch joka, Jarid joka, Mahlalel joka, Kainan joka,
38Enos joka, Set joka, Adam joka, Ugatame joka.
Zur Zeit ausgewählt:
LUKAS 3: EKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
