Jan 2
2
Jeju dda arə maann ddee to koto
1Ndɔ mota laa a, kusu taa-naan to ngonn bbe tə̂ kə̂ Kana, nangə Galile tə̂. Kɔn Jejuje ee loe tə̂. 2N̂-bbar Jeju kə njê-njaje goe tə̂ kusu tə̂ le tɔ. 3Kar tə̂ kə̂ koto bɛn tunga a, kɔn Jejuje pa arɛ̂ nan: «Bɛn tunga ngaa.» 4Jeju ilɛ̂ tə̂ nan: «Dɛnɛ̂n, ddi a osoje tə̂ əman je səi wa? Kar ləm asə ang bbay.» 5Kɔn Jejuje pa arə njê-kulaje nan: «Ə-ddaje nɛ̂n tɔyn kə̂ nâ pa karəse.»
6Dura kə̂ n̂-dda kə ər ee tə̂ənn misan. To duraje kə̂ Jiipije aw tokoje nɛ̂n nɛ̂n-yərəwje ləde ddəw nɛ̂n-ji-bbe tə̂ ləde. Dura kâra a, məɛ̂ asə litərə kɔr kâra. 7Jeju pa arə njê-kulaje le nan: «Unguje maann mə duraje tə̂ nəənn arəje ddusu.» Njê-kulaje le unguje maann mə duraje tə̂ le ddusu. 8Yeenn ngaâ Jeju pa arəde nan: «Bbasinɛn, ɔruje awje nɛ̂n arəje nje-kɔn dɔ nɛ̂n-kusa le.» Njê-kulaje le awje nɛ̂n arɛ̂je. 9Nje-kɔn dɔ nɛ̂n-kusa le nan maann kə̂ təl to bɛn le. N̂-gərə lo kə̂ bɛn le in tə̂ bba ddee ang. A njê-kulaje kə̂ ɔruje maann le a gərəje. Yeenn ngaâ nje-kɔn dɔ nɛ̂n-kusa le bbar nje-dɛnɛ̂n le 10ngaâ, pa arɛ̂ nan: «Dəwje tɔyn aw kaynje bɛn kə̂ maji dɔngɔr, ta goe tə̂ kə̂ dəwje ayje asəde bba kaynje bɛn kə̂ maji gatə ang. A əi, ə-ngəm bɛn kə̂ maji ndərəng kar tə̂ nəənn wa?»
11Dɔngɔr nɛ̂n-mɔri kə̂ Jeju dda â nəənn. N̂-dda nɛ̂ɛnn le Kana, nangə tə̂ kə̂ Galile, n̂-tɔju nɛ̂n piti laa kə ddaka ngaâ njê-njaje goe tə̂ ooje məde tə̂ saa. 12Goe tə̂ a, naw Kapɛrnawum, ne kə kɔɛ̂nje kə ngakɔɛ̂nje kə njê-njaje goe tə̂. A n̂-naynje tə̂ənn ndɔ banya ang.
Jeju tubba njê-nɛ̂n-labbəje kəy-polo Lubba tə̂ Jerujalɛm
13Kusu lə Jiipije kə̂ to Pakə nayn ngɔsi baa ngaa, a Jeju aw Jerujalɛm. 14Mə kəy-polo Lubba tə̂ le, ninga dəwje kə̂ aw labbəje mangəje, batəje kə dərje kə njê-mbəlje narɛje kə̂ isije ta tabələje tə̂ ləde. 15Yeenn ngaâ Jeju ore kula naan tə̂ to ndəy ngaâ tubba nɛ̂n dəwjeenn le tɔyn kə mangəje kə batəje ləde kəy-polo Lubba tə̂ le kə ddang. N̂-sanrɛ kandə narɛje lə njê-mbəlje narɛ le nangə̂ ngaâ n̂-tuta tabələje ləde n̂-tila. 16N̂-pa narə njê-labbəje dərje le nan: «Ə-jinje nɛ̂njeenn tɔyn lo tə̂ nəənn kə ddang. Ə-ddaje kəy lə Bɔmje to kəy nɛ̂n-labbə ang.» 17Njê-njaje go Jeju tə̂ oleje məde dɔ tar tə̂ kə̂ mə Makəturu tə̂ lə Lubba kə̂ nan: «Əbbə-dəwje, bbo kəy ləi a ddam tokə lə puru kə̂ aw ɔn.»
18Yeenn bba, tɔkəje lə Jiipije paje arəje Jeju nan: «Nɛ̂n-mɔri ddi â, â dda ta tɔju to ee kə ddəw ta dda nɛ̂n nɛ̂n kə̂ ə-dda nəənn wa?» 19Jeju ilade tə̂ nan: «Ə-tɔje kəy-polo Lubba nəənn a, mâ təl nɛ̂n kunda taar mə ndɔ mota tə̂.»
20 Jiipije le paje arɛ̂je nan: «Junn bbal dɔsɔ gire misan bba n-dda nɛ̂n kəy-polo Lubba nəənn n-tunga. A əi, a karə in ar taar mə ndɔ mota tə̂ wa?»
21 Kəy-polo Lubba kə̂ Jeju aw pa tarɛ̂ le to da-rɔɛ̂ ne njaa. 22Kar kə̂ Jeju oy ngaâ ndol a, njê-njaje goe tə̂ oleje məde to n̂-pa tar tokə baann. Yeenn ngaâ dooje məde tə̂ kə tar kə̂ Makəturu lə Lubba pa kə tarje kə̂ Jeju pa le.
Jeju gərə kəjə lə dəw
23Jeju ee Jerujalɛm kar tə̂ kə̂ daw dda kusu Pakə. Dəwje nya ooje nɛ̂n-mɔrije kə̂ Jeju aw dda le ngaâ ooje məde tə̂ saa. 24A Jeju unda məɛ̂ dɔde tə̂ ang, mba n̂-gərə kəjə ləde tɔyn. 25N̂-duju karə dəw â pa tar dɔ dəwje tə̂ arɛ̂ ang, mba n̂-gərə kəjə kə̂ to mə dəw tə̂.
Zur Zeit ausgewählt:
Jan 2: KabbaDkS
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
