Jan 1
1
Tar kə̂ in rɔ Lubba tə̂
1Kunn-kutu nɛ̂n tə̂ njaa, Tar ee tə̂ənn mban. Tar le ee mbɔr Lubba tə̂ ngaâ Tar le to Lubba. 2Kunn-kutu nɛ̂n tə̂ njaa, Tar le ee mbɔr Lubba tə̂. 3Lubba dda nɛ̂n tɔyn ddəw tə̂ laa. Nɛ̂n kâra kə̂ Lubba inyɛ̂ a dda kə karɛ̂ baa goto. 4Təbbə to mə Tar tə̂ le ngaâ təbbə le to lo-karɛ lə dəwje. 5Lo-karɛ le aw ndoko lo ndul tə̂, a lo ndul le tɔɔy dɔɛ̂ ang.
6Lubba ula marə dəw kə̂ ria nan Jan. 7N̂-ddee to nje-tar-naji, ta kɔru naji lə lo-karɛ bba karə dəwje tɔyn ooje məde tə̂ kə lo-karɛ le ddəw tə̂ laa. 8Jan to lo-karɛ le ang, n̂-to nje-tar-naji lə lo-karɛ le.
9Tar le to lo-karɛ kə̂ tɔkɔrɔ. N̂-ddee dɔ nangə tə̂ ngaâ n̂-ndoko dɔ dəwje tə̂ tɔyn.
10Tar le to duninya tə̂ nəənn. Ngaâ duninya to ddəw tə̂ laa. A duninya le gəre ang. 11Tar le ddee bbeê laa njaa, a njê kə̂ bbeê laa le tɛɛ̂je kə rɔde tə̂ ang. 12A dəwje tɔyn kə̂ tɛɛ̂je kə rɔde tə̂ ngaâ ooje məde tə̂ saa, dede le, narəde singa karə n̂-ddeeje to ngann lə Lubba. 13Ngaâ n̂-ddeeje to ngann lə Lubba kə̂ dujude ddəw mə-ndiki tə̂ lə Lubba, bbo ddəw kuju tə̂ lə dəwje ang ddəm ddəw mə-ndiki tə̂ lə dəwje ang ddəm.
14Tar le təl to dəw ngaâ dda bbe horoje tə̂. Mə-maji laa kə tar kə̂ tɔkɔrɔ laa uta dɔɛ̂. Joo piti laa kə̂ in rɔ Lubba tə̂.
15 Jan to nje-tar-naji laa. N̂-pa kə ndu kə̂ mɔngu nan: «Ne kə̂ m-pa tar laa le â nəənn: Dəw kə̂ aw ddee gom tə̂ le to dəw kə̂ ngəng utam, mba n̂-to kete narəm.»
16Nɛ̂nje kə̂ maji dduse arə jeje tɔyn njaa n̂-bbar tar kə̂ maji dɔje tə̂ kə dɔ naan tə̂, dɔ naan tə̂. 17Lubba arəje Ndu ləw ddəw tə̂ lə Mɔyijə, a mə-maji kə tar kə̂ tɔkɔrɔ ddeeje ddəw tə̂ lə Jeju-Kristə. 18Dəw kâra oo Lubba ang. A Ngonn-kâra kə̂ to Lubba kə̂ isi mbɔr Bɔɛ̂je tə̂ le dda arə dəwje gəreje.
Tar-naji kə̂ Jan-Batisi pa
19Njê-kɔnje dɔ Jiipije kə̂ Jerujalɛm ulaje njê-poloje Lubba kə njê kə̂ gəl Lebi tə̂ rɔ Jan tə̂ ta duje se, ne n̂-to nân wa? Tar-naji kə̂ n̂-pa â nəənn. 20N̂-kusude tar ang. A n̂-pa kəmde tə̂ tɔyn kə majɛ̂ nan: «M-to Kristə le ang.» 21N̂-dujeje nan: «Yeenn a, ə-to nan wa? Ə-to Eli wa?» Jan ilade tə̂ nan: «M-to Eli ang.» N̂-təl n̂-dujeje bbay nan: «Ə-to nje-kila mbər tar wa?» Jan ilade tə̂ nan: «M-to nje-kila mbər tar ang.» 22Yeenn ngaâ n̂-təl n̂-dujeje bbay nan: «Ə-to nân wa? Maji karə n-təl jaw pa tar kə̂ ila tə̂ le jarə dəwje kə̂ ulajeje. A əi njaa, ə-pa nan ə-to nân wa?» 23Jan ilade tə̂ tokə lə Ejayi kə̂ to Nje-kila mbər tar lə Lubba nan: «M-to dəw kə̂ aw ila mbər mə kɔr tə̂ nan:
‹Ə-ddaje ddəw lə Əbbə-dəwje arəje ndɔju njarara.› »
24 Parijinyɛje eeje horo dəwje tə̂ kə̂ dulade rɔ Jan tə̂ le. 25N̂-dujeje nan: «Ə-to Kristə ang ddəm Eli ang ddəm ə-to nje-kila mbər tar lə Lubba ang ddəm. A mba ddi bba aw dda dəwje batɛm wa?» 26Jan ilade tə̂ nan: «Əman, maw dda dəwje batɛm maann. A marə dəw kə̂ ə-gəreje ang ee horose tə̂ nəənn. 27Naw ddee gom tə̂, əman, masə ta tutu kula nɛ̂n-gɔl laa ang.» 28Nɛ̂njeenn tɔyn teeje bbe tə̂ kə̂ Betani, tura Jurdɛn tə̂, lo tə̂ kə̂ Jan aw dda dəwje batɛm tə̂.
Jeju to Ngonn lə Lubba
29Lo-karɛ̂ kə̂ goe tə̂ a, Jan oo Jeju kə̂ aw ddee kə rɔɛ̂ tə̂ ngaâ pa nan: «Ngonn batə lə Lubba kə̂ to nje-kɔru majang lə dəwje kə̂ duninya tə̂ â nəənn. 30Ne â m-pa tar laa, m-pa nan: ‹Marə dəw kə̂ aw ddee gom tə̂ le ngəng utam, mba n̂-to kete narəm.› 31Əman, m-gəre kete ang. A m-ddee ta dda dəwje batɛm maann, ta dda karə dəwje kə̂ Ijarayɛl gəreje.»
32 Jan pa tar-naji lə Jeju le nan: «Moo Ndil kə̂ in darâ ddisi tokə dər ngaâ isi dɔ Jeju tə̂. 33Əman, m-gəre ang. A Lubba kə̂ ulam karə m-dda dəwje batɛm maann â pa arəm nan: A koo dəw kə̂ Ndil a ddee kisi dɔɛ̂ tə̂. Ne â nâ dda dəwje batɛm Ndil-mə-nda. 34Əman njaa moo nɛ̂njeenn le ngaâ m-pa tar-naji nəənn m-pa nan: Dəw nəənn to Ngonn lə Lubba.»
Jeju bbar njê-njaje goe tə̂ kə̂ dɔngɔr
35Lo-karɛ̂ a, Jan de kə njê-njaje goe tə̂ joo n̂-təl n̂-ddeeje lo tə̂ənn. 36Jan aa Jeju kə̂ aw nday ngaâ pa nan: «Ooje, Ngonn batə lə Lubba â nəənn.»
37Njê-njaje go Jan tə̂ kə̂ joo le ooje tar le ngaâ unnje go Jeju. 38Jeju turu rɔɛ̂ a, oode daw dunnje goe ngaâ dujude nan: «Ddi â aw sangəje wa?» Dilɛ̂je tə̂ nan: «Rabi, lo kə̂ dda aw to tə̂ wa?» Gəl Rabi le nan: «Nje-nɛ̂n-tɔju.»
39Jeju ilade tə̂ nan: «Ə-ddeeje a, â kooje.» Dawje ngaâ dooje lo kə̂ Jeju le to tə̂ ngaâ n̂-naynje saa ndɔɛ̂ tə̂ənn. Kar aw ngɔsi kə gɔl kar sɔ kə̂ lo-kul tə̂.
40Andere ngokɔn Simɔn Piyɛr to dəw kə̂ kâra horo dede tə̂ kə̂ joo kə̂ dooje tar lə Jan ngaâ dunnje go Jeju le. 41Dəw kə̂ dɔngɔr kə̂ Andere le ingɛ̂ to ngokɔɛ̂n Simɔn ngaâ n̂-pa narɛ̂ nan: «Jinga Mesi.» Kandə ri le nan: «Kristə.»
42Naw kə Simɔn le rɔ Jeju tə̂. Jeju aa Simɔn le ddekeke ngaâ pa arɛ̂ nan: «Ə-to Simɔn, ngonn lə Jan. Dâ bbari nan Sepas ngaa.» Gəl Sepas le nan: «Piyɛr.»
43Lo-karɛ̂ a, Jeju ndiki ta kaw Galile. Ninga Pilipi ngaâ n̂-pa narɛ̂ nan: «Unn gom.» 44Pilipi to dəw kə̂ Betesayida kə̂ to bbe lə Andere de kə Piyɛr. 45Goe tə̂ a, Pilipi inga Natanayɛl ngaâ pa arɛ̂ nan: «Jinga marə dəw kə̂ Makəturu-Ndu lə Mɔyijə kə lə njê-kilaje mbər tar lə Lubba paje tar laa le. Dəw le to Jeju kə̂ Najarɛtə, n̂-to ngonn lə Jojɛpə.» 46Natanayɛl le pa arə Pilipi nan: «Marə nɛ̂n kə̂ maji a kasə ta kin Najarɛtə tə̂ tee tɔ wa?» Pilipi ilɛ̂ tə̂ nan: «Ə-ddee oo.»
47 Jeju oo Natanayɛl kə̂ aw ddee kə rɔɛ̂ tə̂ ngaâ pa tar dɔɛ̂ tə̂ nan: «Ngonn Ijarayɛl kə̂ tɔkɔrɔ â toonn. To dəw kə̂ ngəm to rɔɛ̂ tɛɛ̂ ang.» 48Natanayɛl le duju Jeju nan: «Ə-gərəm tokə baânn wa?» Jeju ilɛ̂ tə̂ nan: «Kete bba karə Pilipi bbari, mooi kar tə̂ kə̂ ee nɛ̂n kɔ kakə pigə tə̂.» 49Yeenn ngaâ Natanayɛl le pa arɛ̂ nan: «Nje-nɛ̂n-tɔju, ə-to Ngonn lə Lubba, ə-to tɔkə mbay kə̂ Ijarayɛl.» 50Jeju ilɛ̂ tə̂ nan: «Mba pa kə̂ m-pa mari nan mooi kɔ kakə pigə tə̂ le bba oo məi tə̂ wa? A koo tɔkə nɛ̂nje kə̂ a kuta yeenn bbay.»
51Jeju təl pa bbay nan: «Tɔkɔrɔ m-pa marəse, a kooje dara kə̂ təəyn ngaâ anjəje lə Lubba a kinje dɔ Ngonn lə dəw tə̂ kaw kə taar ddəm ddisi kə dɔɛ̂ tə̂ ddəm.»
Zur Zeit ausgewählt:
Jan 1: KabbaDkS
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
