JUECES 6
6
Gedeón shuti runatami Dios cayashca
1Israelcunaca, Mandaj Diospaj ñaupajpica, nalitami ruranajurca. Chaimandami Mandaj Diosca, canchis huatacaman llaquichi tucunajuchun, madianitacunapaj maquipi churarca. 2Madianitacunaca, ashtahuan ashtahuanmi israelcunataca llaquichinajurca. Chai madianitacunata manllashpami israelcunaca, jatun utujucunata, alpa ucuman jatun utujucunata, pacajuna jatun pircacunata urcucunapi ruranajurca. 3Israelcuna ña tarpushcapimi, cashna tucun carca: Madianitacuna, amalecitacuna, indi llujshimuj lado llactamanda runacunami, paicunata llaquichingapaj vichai shamun carca. Paicuna vichai shamushpami, macashpa llaquichin carca. 4Paicunaca macanajungapaj shamushpami, carpacunata shayachishpa, pambacunapi fucushcacunata, Gaza shuti pueblo ladocaman tucuchinajurca. Israel llactapica llamacunapaj, huagracunapaj, burrocunapaj micunatallapash na saquinllu carca. 5Paicunaca, animalcunandi, paicunapaj carpacunandi, ashtaca gentecuna vichai shamushpami, langosta jurucunashna jundanajurca. Paicunapash, paicunapaj camellocunapash, maitapash na cuentai ushanallami carca. Shinami, chai llactapi ima tiashcata tucuchingapaj shamunajurca. 6Chashnami israelcunaca, madianitacunapaj jahua, yapa imagupash illaj tucunajurca. Chaimandami israelcunaca, Mandaj Diosta caparishpa mañanajurca.
7Madianitacuna llaquichinajujpimi israelcunaca, Mandaj Diosta caparishpa mañanajurca. 8Shina mañajpimi Mandaj Diosca, pai ima nishcata villaj shuj runaguta, israelcunaman cachamurca. Chai runagumi, cashna nirca: “Israelcunata Mandaj Taita Diosca, cashnami nin: ‘Ñucami cangunataca, Egipto llactamanda llujchimushpa gañan causanajujta llujchishpa pushamurcani. 9Egipto llacta runacunapaj maquimandami cacharichircani. Shinallata tucui llaquichijcunapaj maquimandapashmi cacharichircani. Paicunataca, cangunapaj ñaupajmanda llujchishpa cachashpami, paicunapaj llactataca cangunaman cararcani. 10Cangunataca, cashnami nircani: Ñucami, cangunata Mandaj Taita Dios cani. Canguna causanajunguichi llactamanda amorreocunapaj dioscunataca, na manllanachu canguichi’ nircanimi. Ashtahuangarin ñuca nishcataca, na cazushpami causarcanguichi ninmi” nircami.
11Mandaj Diospaj ángel shamushpaca, Ofra shuti pambapi encina nishca quiru ucupimi tiarirca. Chai pambaca, Abiezer shuti runapaj miraipura Joás shuti runapajmi carca. Chai Joás runapaj churi Gedeón shuti runami, madianitacunamanda pacajushpa, uvasta cutana pushtupi trigota pacalla huairachijurca.
12Chaipimi, Mandaj Diospaj ángel paiman ricurishpa, cashna nirca:
—Ninan shinlli, imatapash na manllaj runa, Mandaj Diosca canhuanmi— nircami.
13Shina nijpimi Gedeón runaca, cashna nishpa tigrachirca:
—Ñucata mandajlla. Mandaj Dios ñucanchihuan cajpica, ¿imashpata tucui cai jatun llaquicunaca shamushcayari? Ñucanchi taitacunaca: ‘Mandaj Diosmi ñucanchitaca, Egiptomanda llujchimurca’ nishpami parlanajurca. Tucui chai juyaillacunata pai rurashcacunaca, ¿imata tucushcayari? Ashtahuangarin cunanga, Mandaj Diosca ñucanchitaca jichushpa saquishpami, madianitacunapaj maquipi churashca— nircami.
14Mandaj Diosca, paipaj ñavita ricushpami cashna nirca:
—Israelcunataca, cambaj tucui ushaihuan shinlli tucushpa, madianitacunapaj maquimanda llujchigri. ¿Nachu ñuca candaca cachajuni?— nircami.
15Shina nijpimi Gedeón runaca, cashna nishpa tigrachirca:
—Ñucata mandajlla. Ñucaca, ¿imahuanda israelcunataca quishpichishayari? Ricui, ñuca familiacunaca, Manasespaj aillu purapica, imagutapash na charijcunamari. Ñuca taitapaj huasi ucu purapica, ñucami tucuicunapaj jipa capani— nircami.
16Shina nijpimi Mandaj Diosca, cashna nirca:
—Na llullashpami nini, ñucami canhuan casha. Madianitacunataca, shujlla runatashnami mishangui— nircami.
17Shina nijpimi Gedeón runaca, cashna nishpa tigrachirca:
—Cambaj ñaupajpi ñuca ali ricurishca cajpica, can ñucahuan parlashcata yachangapaj, shuj rurashcata ricuchihuayari nipanimi. 18Ñuca canman caranata apamushpa, cambaj ñaupajpi churangacaman, caimandaca amara ripanguichu— nircami.
Shina nijpimi, angelca:
—Can tigramungacaman, caipi shuyajushallami— nishpa tigrachirca.
19Gedeón runaca, huasiman yaicushpami, shuj maltun chivota huañuchishpa yanurca. Shinallata ishcai chunga ishcai kilota pezaj jacutaca, levadura illaj tandatami rurarca. Aichataca, shuj canastapi churashpa caldotaca, shuj mangapi churashpami, encina nishca chai quiru ucuman apamurca. 20Ña apamujpimi Taita Diospaj angelca, cashna nirca:
—Aichatapash, levadura illaj tandatapash japishpa, cai jatun rumipi churashpa, caldotapash chai jahuapillata talilla— nishpa mandajpi, Gedeonga chashna rurarca.
21Mandaj Diospaj angelca, chai aichatapash, levadura illaj tandatapash, pai charijuj caspi pundahuanmi tacarirca. Shina tacarijpimi, chai rumimanda nina llujshishpa aichatapash, levadura illaj tandatapash tucuillata rupachirca. Shina rurashpaca, Mandaj Diospaj angelca, pai ricujujpillata ñapash chingarcallami. 22Mandaj Diospaj ángel cajta yachashpami, Gedeón runaca cashna nirca:
—Mandaj Jatun Dioslla. Mandaj Diospaj angeltamari, ñavi ñavi ricushcani— nircami.
23Shina nijpimi, Mandaj Diosca:
—Ama manllaichu, na huañunguichu. Casilla ali causaigutami charingui— nirca.
24Chaimandami Gedeón runaca, Mandaj Diosman shuj altarta chaipi rurarca. Chai altartaca: “Mandaj Diosca, casilla ali causaigutami caran” nishpami shutichirca. Chai altarca, Abiezer shuti runapaj miraicuna causanajuj Orfa shuti pueblopimi, cunangaman tiajun.
25Cashnapashmi tucurca: Mandaj Diosca, chai tutallatami Gedeón runataca cashna nirca:
—Cambaj taitapaj huagra puramandaca, canchis huatata charij shuj cati huagrata japingui. Chai jipaca, Baal shuti diosman cambaj taita rurashca altarta urmachingui. Shinallata chai ladopillata Asera shuti huarmi diosman rijchajtapash faquingui. 26Chai jipaca, canda Mandaj Taita Diosman cai jatun rumi jahuapi, maipi ali cana cajpipash shuj altarta rurai. Chai jipaca, cati huagrata ñucaman carashpa huañuchigri. Chai aichataca, Asera shuti huarmi diosman rijchajta faquishca yamdahuan, tucuilla rupachingui— nircami.
27Shina nijpimi Gedeonga, paita servij puramanda chunga runacunata pushashpa, Mandaj Dios nishcashnallata rurarca. Ashtahuangarin paipaj taitapaj familiacunata, pueblopi causajcunata manllashpami, na punlla rurashpa, tuta chashna rurajurca. 28Chai pueblopi causajcuna, cayandi tutamanda jatarishpaca, Baal shuti diospaj altartapash urmachishcata, chai altar ladopillata Asera shuti huarmi diosman rijchajtapash faquishcatami ricunajurca. Shinallata Gedeón rurashca altarpica, cati huagrata huañuchishpa, tucuillata rupachishcatapashmi ricunajurca. 29Chaita ricushpami, caishuj chaishuj: “¿Pita caita rurashcanga?” nishpa tapurinajurca. Shina tapushpa, mascashpa purinajushpami: “Joás shuti runapaj churi Gedeonmi, chaita rurashca” ninajurca. Chaimandami chai pueblopi causajcunaca, Joás runataca cashna ninajurca:
30—Cambaj churita huañuchingapaj canllaman llujchimui. Paimi, Baal shuti diospaj altartapash urmachishpa, chai altar ladopi Asera shuti huarmi diosman rijchajtapash faquishca— ninajurcami.
31Shina ninajujpimi Joás runaca, paipaj ladopi tucuilla shayanajujcunataca, cashna nishpa tigrachirca:
—¿Cangunachu Baal shuti diospaj randi shayarishpa, fiñashpa rimashun ninguichi? ¿Mitsashpa jarcashpachu paimanda shayarijushun ninguichi? Maijambash paimanda fiñashpa rimajca, cunan tutamandallata huañuchun. Diospacha cashpaca, paipaj chai altarta urmachishca runataca, paillata fiñashpa llaquichijuchun saquichilla— nircami.
32Gedeondaca, chai punllallatami, Jerobaal shutita shutichirca. Chai shutica, Baal shuti diospaj altarta Gedeón urmachishcamandaca: “Baal shuti diosllata, paita fiñashpa llaquichijuchun” nijunmi.
33Ashtahuangarin tucui madianitacuna, amalecitacuna, indi llujshimuj lado llactamanda runacunaca, shujllashnallami tandanajurca. Paicunaca, Jordán yacuta chimbamushpami, Jezreel shuti pugru pambapi carpacunata shayachishpa tianajurca. 34Shinamandami Mandaj Diospaj Espíritu, Gedeón runapajman shamurca. Cachuta pai huacachijpimi, Abiezer runapaj miraicunaca paihuan tandanajurca. 35Tucui Manasés aillumambash villachun villajcunata cachajpimi, paicunapash Gedeonhuan tandanajurca. Shinallata Aser, Zabulón, Neftalí shuti aillucunamambash villachun cachajpimi, paicunapash tuparingapaj llujshimurca.
36Chai jipami Gedeón runaca, Taita Diosta cashna nirca: “Can nishcashnallata, israelcunataca ñuca maquihuan quishpichina cajpica, 37ricui cai trillana pambapimi, llama milmata churagripani. Caya tutamandapaca, chai milmatalla jamzi paramuhuan mutiyachishpa, chai muyundi alpaca chaquishca pacarijpica, can nishcashnallata israelcunataca ñuca maquihuan quishpichinatami yachasha” nircami.
38Chashna nishcashnallatami tucurca. Cayandi tutamanda jatarishpa, chai milmata capijpica, milma mutiyashcamandaca, shuj jatun tasta junda yacumi llujshirca. 39Ashtahuangarin Gedeonga, Taita Diostaca cashnami nirca: “Cutin canda cashna rurapai nishpa mañajpica, ama nina japirinshna fiñaripanguichu. Cunambash, cutinmi cai milmahuan yachangapaj munapani. Cunan tutaca, chai muyundi alpataca jamzi paramuhuan mutiyachishpa, milmatalla chaquishcata pacarichipairi nipanimi” nircami.
40Chai tutapash Taita Diosca, Gedeón runa mañashcashnallatami rurarca. Milmallami chaquishca pacarishca carca. Jamzi paramuca, chai muyundi tucuilla alpatami mutiyachishca carca.
Zur Zeit ausgewählt:
JUECES 6: QUII
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Quichua Imbabura Bible © United Bible Societies, 1994.