Luk 24

Jesus loole se ɛykuo

(Mat 28.1-10; Mak 16.1-8; Jn 20.1-10)

1Se lu ɛ kechii kɛ mbiye se əbwɛy, əbkiy ghii ndu nɛ̀ əbyióséne ngvəəme wɛ ghene nè siysen vi se ɛysɛy naa ɛ bvəse bvəse. 2Ghene chin fo è yɛn nɛ ɛ́ biŋsemen ɛytiy, ɛy lòò se əbchio ɛysɛy fo. 3Ghene lii se ɛysɛy fɛy è sɛ́y jia yɛn ɛygvən ə Báàba Jesus. 4Kenəə tene loo foo ngɛk se ghene, ɛ leghɛ ghel ɛbaa teem è gwiy ɛ ghene ɛybee nɛ ndəyse ghene njante ka ɛyghuu ɛyliakene. 5Əbkiy ghii fan è ngvəkte è təm tekek ə ghen se ntiɛ, ghel ghii suuy se ghene ge: Lu bek ghɛ wɛ ghɛne kiyen wel nɛ əb lu əbtaa ɛ məme ghel ɛkuone. 6Əb báà se lu fɛn, əb loolemen se ɛykuo. Ghɛn kuume kenəə kɛ əb nè suuyen se ghɛn nɛ ghɛne ghene bɛɛy ɛ Galilee. 7Əb nè suuy ge: Ɛ́ lu se naa se vii Wanwel se ɛghoo nə ghele mbeese, é bante wen se kentam, əbchii lun əbtal, əb kase loole se ɛykuo.

8Ghene me kuume kenəə kɛ Jesus nè suuyenmen, 9è nɛy lòò se bene ɛysɛy fo, è fiile è ndu è fiɛl əbnəə əbjim wɛ əb kè ganen se ghon-ɛyfɛl nə Jesus ghɛ njio ɛymok ɛyvəm gese nɛ̀ se ghel ɛlee. 10Əbkiy nɛ̂ ghin nè lu Mɛɛle Magdalene, nɛ̀ Joanna gese nɛ̀ Mɛɛle wɛ no ə Jɛms, gese nɛ̀ əbkiy ɛlee. Ghene nè gwiy è suuy əbnəə nɛ̂ vin se ghɛ́ ntume. 11Dî ghene se kwaate ge əbkiye ten suuye kenəə nɛ ke wiy, è jia beeme. 12Bita me tum è loole, è nyiŋ è ndu se əbchio ɛysɛy, è ngvəkte è yɛn nɛ lu kɛn ndəy sɛ ɛ́ nè limten ɛygvən ə Jesus so ka se nyiŋen, è lòò, è se kfəəye kante ge sɛ kè gan ghɛ-a?

Jesus baksen ghel ɛ jii Emmaus

(Mak 16.12-13)

13Ko se lu kɛn ɛ kechii fo, ghon-ɛyfɛl nə Jesus ɛlee ɛbaa lòò ɛ Jolesalem è se nduu ɛ ntɛk nɛ ɛ́ toŋte ge Emmaus. Əbtəme ntɛk yin se Jolesalem nè lu ka tetaŋ saamba dì. 14Ghene loo ndu è se fiɛle əbnəə nɛ̂ vin əbjim wɛ əb ganen. 15Ghene se fiɛle kante dì ɛ leghɛ, Jesus se wen ə ngeŋ baksen è gwiy nɛ̀ ghene, ghene ghene se nduu. 16Dî nɛ kefaa bukse ɛshiɛ ghen, ghene jia keele ge kè lu wen. 17Əb bif se ghene ge: Lu ghɛ kɛ ghɛne jɛ́len, fiɛlen, ghɛynen lɛ? Ghene me teem fo ɛysen ɛysen. 18Wel əblee ɛ ghene məm nɛ ɛ́ toŋte ge Kleobas fise se wen ge: Lu kɛn wɛ̀ wel ɛyghan ɛ Jolesalem wɛ əb báà se ke əbnəə wɛ əb ganen ɛ əbchii fɛn-a?

19Əb bif ge: Əbnəə əbkɛ? Ghene me se suuye se wen ge: Lu əbnəə wɛ kum Jesus wɛ̂ Nazalet, wɛ nè luun ntum ə Feyin. Əb nè nɛɛye əbnəə əbchio əbyúméné, fekte əbfektene, nɛ Feyine bente wen, nɛ ghele bente sɛ̂y. 20Ghele mbiy se ghɛ́ ntaŋlee gese nɛ̀ ghel ghɛ ɛ́ saken ghɛs nè lô fo wen ge ɛ́ chiase ɛysak ge ɛ́ yúy, ɛ́ me bante se kentam. 21Ghɛs sɛ́y bo nè kwaate ge lu wen wɛ əb nɛ̂y fəyse ghele Islael se ngɛkse. Báà mɛy kɛn kii nɛ̂ kine, shi əbchii ɛ leenen əbtal se ka əbnəə vine ganen. 22Se baksen se keghene, əbkiy ɛlee ɛ ghɛs ə ngoo kè suuy kenəə əbchio əbyúméné se ghɛs. Ghene kè ndu əbchio ɛysɛy ɛ bvəse bvəse lan, 23è jia yɛn ɛygvən ə wen, è kase fiile è gwiy è se suuye ge ghene kè lô yɛn nchiyse-ndaa nə Feyine ɛy suuy ge əb bo bɛɛy əbtaa. 24Ghele ngoo nə ghɛs ɛlee ndu ɛ bene ɛysɛy fo, è yɛn nɛ ɛy lu kɛn ka əbkiy ghii kè suuyen dì, è jia yɛn wen.

25Jesus me suuy se ghene ge: Ghɛne ngoole ghɛ lɛ. Ke taa se ghɛn se beeme əbnəə əbjim wɛ ghele ntum nə Feyine nè suuyen bek ghɛ? 26Vi wɛ Feyine nè Yiosen lɛ nè báà se lu se yɛne ngɛk shin se gee se yɛ yio əbjuŋ əbghaake nə wen-a? 27Jesus me jɛmte əbnəə əbjim wɛ ɛ́ nè nyaken kum ngeŋ ə wen ɛ ŋwaale-Feyin. Əb nè kɛɛte nɛ̀ ŋwaale sɛ ɛynyake Moses è me diaŋten è ndu nɛ̀ sɛ́ ghele ntum nə Feyine naa ɛjim.

28Ghene ghene ndu è loo bɛɛte ɛ ntɛk yɛ ghene nè nduun ɛ ten Jesus se nɛɛye ka əb chia chian. 29Ghene beŋte wen ge: Kiy wɛ̀, ghɛsen ko ndu è chii, bek ka shiin ɛ likfəəy, nɛ əbtəke se jiɛ. Əb me ndu ge ghene ghene chii. 30Nɛy se lu ka əb nè diom se yɛ yíɛ́ ghene ghene, əb liɛ keban, è bɛ̀ɛ̀lè Feyin è bɛkte, è fo se ghene. 31Ɛshiɛ ə ghene me laane, ghene se keele ge kè lu Jesus, ɛ leghɛ əb me liime è lɛy. 32Ghene se kante ge: Tetem ə tɛso lɛ kè báà se fuo ka ɛ́ kwaay əbvəs ɛ ten ɛ əbliy wɛ əb kè suŋnen se ghɛsoo ɛ jii-a, gese dinte kenəə kɛ ŋwaale-Feyine suuyen-a?

33Ghene kante dì, è me loole kɛn se əbliy è kase fiile se Jolesalem, è yɛn ghon-ɛyfɛl ghɛ njio ɛymok ɛyvəm bene fɛ ghene ɛlee nè kaamen kelik kemok, 34è se suuye ge: Ke lu se əbluuy nɛ Báàba loolemen se ɛykuo. Simon kè lô yɛn wen.

35Ghon-ɛyfɛl ghɛ ɛbaa ghii me fiɛl se ghene əbnəə wɛ əb kè ganen se ghene ɛ jii, gese nɛ̀ ka ghene kè keelen Jesus ɛ əbliy wɛ əb kè bɛkten keban.

Jesus din ngeŋ ə wen se ghon-ɛyfɛl nə wene

(Mat 28.16-20; Mak 16.14-18; Jn 20.19-23; Ɛyf 1.6-8)

36Ghene se fiɛle di ɛ leghɛ, Jesus me sasen, è fəy ɛ ghene məm è suuy se ghene ge: Nyiaŋ yɛ lu se ghɛn.#24.36 Nyiaŋ yɛ lu se ghɛn: Ndiote ŋwaale seməə ki wiy kelik nɛ̂ kin. 37Ghene se fane naa se ŋaŋ, chiŋe gese kwaate ge ghene yɛn nɛ lu nkfəsay. 38Əb bif se ghene ge: Foo ghɛ ngɛk se ghɛn? Ghɛne maanen mɛ bek ghɛ? 39Ghɛn kiy ɛghoo ə ghom gese nɛ̀ ɛvəə ə ghome, é ghɛn yɛn ge lu mɛ nɛ̀ ngeŋ ə yom. Ghɛn momte əbghun ə wom, é ghɛn keele bek ge nkfəsay sɛɛ jia ki njia əbghun nɛ̀ əbvəfe ka ghɛn yɛnen nɛ mɛ ki lɛ.

40Əb suuy di, è din ɛghoo wen gese nɛ̀ ɛvəə wene se ghene. 41Ɛysaŋlee nè lô lun se ghene tetem, əbchio yum ghene ɛ jii yɛ ghene nè báà se ke jii yɛ lòó ɛ́ beeme. Jesus bif se ghene ge: Ghɛn lɛ ki kefaa keyíɛ́ne fɛn-a? 42Ɛ́ liɛ kentime səə ɛynyoken è fo se wen, 43Əb fii è kfəl, ghene yɛn.

44Əb me suuy se ghene ge: Əbnəə vin wɛ əb kooyen lu wɛ mɛ nè suuyen se ghɛn ɛ əbliy wɛ mɛ nè bɛɛyen ghɛsen. Mɛ nè suuye ge: Əbnəə əbjim wɛ ɛ́ nè nyaken kum mɛ ɛ ŋwaalese nə Moses, nɛ̀ wɛ nè nyaken ghele ntum nə Feyine gese nɛ̀ wɛ ɛ́ nè nyaken ɛ ŋwaale Salm kum mɛ lu se kwɛn. 45Əb suŋnen di, è me yɛm ɛytof ə ghen ka ghene keele kɛ ke luun ɛ ŋwaale-Feyin, 46è me suuy se ghene ge: Ɛ́ nyak ɛ ŋwaale-Feyin ge: Vi wɛ Feyine nè Yiosen lu se naa se yɛne ngɛk se kuo, é əbchii chin əbtal əb loole se ɛykuo. 47Ke gese se lu ge, ɛ́ lu se nɛy se kɛ̀ɛ̀tè ɛ Jolesalem se yɛ fekte əbtum əbjim ɛ mɛ ɛyghel ge, ghele kubsen tetem ə ghen é Feyine lɛyse mbeese ghen. 48Ghɛn lu ghel ghɛ ɛ́ yɛnen əbnəə vin wɛ ə́b kooyen. 49Yɛn mba! Mɛ nɛ̂y tinse nkakma yɛ Ba ə wom nè kaken ghɛn so. Se lu nɛ ghɛne gok è yɛ lu ɛ ntɛk fɛn se chin se əbliy wɛ Feyine nɛ̂y tinse əbtaawe wɛ əb lòòn ɛ ɛyyio se ghɛn.

Jesus Kok se Ɛyyio

(Mak 16.19-20; Ɛyf 1.9-11)

50Əb suuy di è me liɛ ghene, ghene ghene fəy se ntɛk fo, è ndu è loo bɛɛte Betani, əb me lose ɛghoo ə wen, è bose ghene. 51Əb se bose ghene ɛ leghɛ, è me lòò, Feyin liɛ wen è kokse se ɛyyio. 52Ghene ngvəmle wen, è yese è kase fiile se Jolesalem, nɛ ɛ́ lun nɛ̀ ɛysaŋle ɛyghakene, 53è me se yese lu ɛ ndaa-ɛykokse Feyin, foo ɛykokse se Feyine.

Zur Zeit ausgewählt:

Luk 24: oku

Markierung

Kopieren