Luk 23

Jesus ɛ Bailɛt ɛyshiɛ

(Mat 27.1-2,11-14; Mak 15.1-5; Jn 18.28-38)

1Ghene lòò naa ghel əbjim è ndu nɛ̀ Jesus se Bailɛt, 2è me kɛɛte se yɛ toy əbnəə ɛ wen əbghun suuye ge: Ghɛs nè yɛn biɛ vin nɛ əb fəmse ghele ghɛsen suuye ge ghàà ghene yɛ lake shile se əbfon ə Lûm. Əb nè suuye sɛy ge yi lu Vi wɛ Feyine nè Yiosen nɛ lu əbfon. 3Bailɛt bif se wen ge: Lu wɛ̀ əbfon ə ghele Juus-a?

Əb fise ge: Ke lu ka wɛ̀ suuyen. 4Bailɛt suuy se ghele mbiy se ghɛ́ ntaŋlee ghene kenone ghel kii ge: Mɛ báà yɛn kejas ə wel vin. 5Dî ghene soote se Bailɛt ketaan ge: Əb ghane nɛɛye ge ghele yɛ taa ketuu, dinte əbnəə wen nɛ̂ vi ɛylake Judea ɛyjim. Əb nè kɛɛte ɛ Galilee, se lu nɛ əb gwiymen è chin so se fɛn.

Jesus ɛ Helod ɛyshiɛ

6Bailɛt yio dî ɛ leghɛ è bif ge: Wel vin chèmè lu wele Galilee-a? 7Se lu ka əb keelen ge Jesus lòò ɛ kelik nɛ ke lu ɛ ɛyshaa ɛysak nə Helod, əb me suuy ge ɛ́ liɛ wen è ndu so se Helod. Nè lu əbliy fo nɛ Helod lu ɛ Jolesalem.

8Helod yɛn Jesus, è se saŋle naa se ŋaŋ bek feteete fɛ əb nè yionmen kum wen. Əb nè lô se ki shii se əbtəm se yɛne wen è me se kwaate ge əb nɛɛy əbnəə əbchio əbyúméné é yi yɛn. 9Əb me se bifte əbnəə se Jesus naa se ɛydio, əb jia ben. 10Ghele mbiy se ghɛ́ ntaŋlee ghene ghel ghɛ ɛ́ nè dinten tesak ə Moses nè lô se tiy fo suuye ketaan ge Jesus lu nɛ əb jas. 11Helod ghene ghel ɛyghoŋ nə wene se foo ngɛk se wen ɛ jii ɛybee, buu wen, è lafse wen nɛ̀ ndəy sejuŋe, è kase tinse wen se Bailɛt.

12Se kɛ̀ɛ̀tè kechii fo, Helod ghene Bailɛt me kase se lu sunse. Ghene nè báà se fəye fo se mbiy.

Bailɛt tenen nsak ge ɛ́ yúy Jesus

(Mat 27.15-26; Mak 15.6-15; Jn 18.39–19.16)

13Bailɛt me jaŋte ghele mbiy se ghɛ́ ntaŋlee, nɛ̀ chɛɛse, gese nɛ̀ ghel ɛjime, 14è suuy se ghene ge: Ghɛn kè gwiy nɛ̀ wel vin se mɛ è suuy ge əb nɛɛye nɛ ghele taa ketuu. Mɛ liimen ɛ wen ə kenəə ɛ ghɛn ɛyshiɛ è jia yɛn kejas ə wen. 15Helod kè báà yɛn sɛy kejas ə wen. Ghan kenəə kɛ ke kè nɛɛyen əb kase fise wen se ghɛsen. Əb báà nɛɛy kenəə kɛ lòó ɛ́ yúy wen se ten. 16Fene mɛ suuy, ɛ́ nəkse wen kɛn nəksen è vəse.

17Ɛ́ nè sɛɛ lóó yiɛ Kechii Ɛyboyse, Goveno yɛ lu se fəyse wele nchak se ghele.#23.17 Ndiote ŋwaale seməə báà se ki kentime kin. 18Ghel ghi me chìntèn ɛjim è waame ge: Mɛyse wen mɛysen, è fo Balabbas se ghɛs. 19Balabbas lu wel nɛ əb nè ndu nchak bek ge əb nè lu ɛ məme kenon kɛ ke nè losen əbchio ge ɛ́ bak ɛysak, gese nɛ̀ ka əb nè yuyen wel. 20Bailɛt me gese suŋnen se kenone ghel kii bek ge əb nè ki shii se vəse Jesus, 21Ka əb suŋnen dî ghene sɛy waame ge: Bante wen se kentam, bante wen se kentam. 22Əb gese suŋnen ge kaŋ ɛtal bife ge: Kejas ə wel vin lu ghɛ? Mɛ báà yɛn kenəə kɛ əb jasen kɛ lòó ɛ́ yúy wen se ten. Mɛ suuy ɛ́ nəkse wen è vəse. 23Ghel ghii waame kɛn ketaan ketaan se Bailɛt ge: Ɛ́ lu se bante Jesus se kentam. Kɛ ghene me fɛl. 24Bailɛt me chiase ɛysak ge ɛ́ yúy Jesus ka ghene nè kɛŋen. 25Əb nè fəyse wel wɛ əb nè nduun nchak nɛ əb nè ndu bek ka əb nè luun ɛ məme kenon kɛ ke nè losen əbchio ɛ ntɛk ge ɛ́ bak ɛysak, gese ka əb nè yuyen wel, è me fo Jesus ge ɛ́ yúy ka ghene nè kɛŋen.

Ɛ́ Bante Jesus se Kentam

(Mat 27.32-44; Mak 15.21-32; Jn 19.17-27)

26Ghel ɛyghoŋe me liɛ Jesus əbliy nɛ̂ fo, è se nduu se bante, è loo ndu, ghene ghe wele wɛ̂ Silen əblee konen nɛ ɛ́ toŋte ge Simon, nɛ əb kfəəy əbkwak. Ghene me koo wen è kan əb bɛɛy kentam ə Jesus è se jumte nduu nɛ̀ wen.

27Ghele nè lô se jumte nduu nɛ̀ Jesus naa se ɛydio. Əbkiy ɛlee nè lu ɛ kenon fo toŋnene gese koosen ɛysen se wen. 28Jesus benle è suuy se ghene ge: Əbkiy ghɛ Jolesaleme, ghàà ghɛn yɛ diy mɛ, ghɛn yɛ diy ngeŋ ə sɛn gese diye ghon ə ghɛn. 29Bek ge əbliye gwiye wɛ ghele nɛ̂y yɛ suuy ge: Jofe kɛ əbkiy ghɛ luun əbkan, nɛ̀ ghɛ ɛ́ nè báà bii wán gese nɛ̀ ghɛ ɛ́ nè báà yi nyoŋse wán. 30Ɛ́ nɛ̂y loo lu əbliy fo é ghele yɛ suuy se tetaŋe ge: Ghɛn fɛyke ɛ ghɛs əbtuu, suuye se kfənse ge: Ghɛn chite ghɛs. 31Ghele lɛ mome əbnəə ka vine nɛ fekake bɛɛy fezəə, é ke nɛy yɛ lu lɛɛy əbliy wɛ fe yumenmen?

32Ɛ́ se nduu nɛ̀ Jesus di, nɛ ɛ́ liɛ ghel ɛlee ɛbaa, nɛ lu ghel nɛ ɛ́ nè fɛy ɛysak, ge ɛ́ ndu è yuy ghene ghe Jesus. 33Ghene nɛy ndu è chin ɛ kelik nɛ ɛ́ toŋte ge: Kevəf ə ketuu, è me bante Jesus se kentam, gese nɛ̀ ghel ghii ghɛ ɛ́ nè fɛyen ɛysak, əblee ɛ Jesus ə ɛybee əbkoy əbtaa, nɛ̀ əblee ɛybee əbkoy əbkiye. 34Jesus nɛy loo è suuy ge: Ba ə wom, lɛyse kejas ə ghen bek ge ghene báà se ke kenəə kɛ ghene nɛɛyen. Ghel ghii mak kaŋ se keele jii yɛ ghene giate ndəyse Jesus ɛ ten. 35Kenone ghele se tiy fo kiye, nɛ chɛɛse buu wen suuye ge: Əb nè ghane boyse ghel, əb boyse yi ngeŋ ə wen ɛ lefɛ əb luun Vi wɛ Feyine nè Yiosen, ka əb nè choken!

36Ghel ɛyghoŋe se buu sɛy wen, è kokte è fo əmnduk nɛ əm ngwɛymen se wen, 37suuye ge: Boyse ngeŋ yiɛ ɛ lefɛ wɛ̀ luun əbfon ə ghele Juus.

38Ɛ́ me nyak ŋwaale è base se Jesus ə ketuu kentam nɛ ɛy suuy ge: Vin lu əbfon ə ghele Juus.

39Wel əblee se məme ghel ghɛ ɛ́ nè fɛyen ɛysak, ɛ́ bante ghene ghe Jesus, sɛ́y me se tɛyle wen suuye ge: Wɛ̀ lɛ báà se lu Vi wɛ Feyine nè Yiosen-a? Boyse ngeŋ ə yiɛ, è boyse sɛy ghɛs.

40Wele vidi kɛy wen è bif ge: Wɛ̀ báà se fane Feyin-a? Ghɛsen nɛ̀ ghe wel vin kuo ɛykuo ɛymok. 41Ke lu ɛ titiy ge ghɛsoo kuo, bek ge ghɛsoo kuo keghoo kɛsoo, nɛ wel vin kuo kɛ wene se lólò. 42Əb suuy di è me suuy ge: Jesus, nɛ̂y kuume mɛ əbliy wɛ wɛ̀ se saken əbfon ə viɛ.

43Jesus suuy se wen ge: Mɛ suuye kenəə kɛ əbluuy se wɛ̀ ge ghɛsoo nɛ̂y yɛ lu ɛ kelik ɛyzəəte lan.

Ɛykuo ə Jesus

(Mat 27.45-56; Mak 15.33-41; Jn 19.28-30)

44Nɛy se lu ka chuy tiysen, mbi sasen è fin naa ɛyjim, è nɛy kase se laane nɛ chuy se make mbàŋse. 45Chuy liime di, ndəy sɛ ɛ́ nè keŋen ɛybuu so ɛ ndaa-ɛykokse Feyin nɛy loo è basen əbwaŋ əbbua. 46Jesus nɛy lòò è toŋ ɛ giɛ ɛytaa ge: Ba ə wom, mɛ vii keyioy kom nɛ lu ɛ wɛ̀ keghoo. Əb suuy di è me mɛy.

47Ketuu ɛyghoŋ kɛ ke nè tiyen fo yɛne əbnəə wɛ əb ganen, nè lô fo ɛykokse se Feyine suuye ge: Ke lu se əbluuy ge wel vin nè lu wele titiy.

48Ngose wel yɛ ɛy nè luun fo kiye, yɛn əbnəə wɛ əb ganen, è vii əmwɛm è se koosen ɛysen kfəəye. 49Əbnəə vin nè gane dì, nɛ ghel ɛjim ghɛ ɛ́ nè looten keen Jesus gese nɛ̀ əbkiy ghɛ ɛ́ nè lòòn ɛ wen ɛybam ɛ Galilee nè lu fo nɛ ɛ́ teem kɛ ghene əbtəm è se kiye.

Ɛ́ gvəəme Jesus

(Mat 27.57-61; Mak 15.42-47; Jn 19.38-42)

50-51Wel əblee nè lu nɛ ɛ́ toŋte ge Josɛf, nɛ lu wel ɛ wɛ̂ ntɛke ghele Juus yɛ Alimatea. Əb nè lu wel əbjuŋ, nɛɛye kɛn ka Feyine kɛŋen, nɛ əb nè gese chiyte əbliy wɛ Feyine nɛ̂y yɛ sak əbfon ə wen. Chèmè lu ka əb nè luun wel əblee ɛ ndaa nsak nə ghele Juuse, əb nè báà vii keghoo ə wen se əbnəə wɛ ɛ́ nè diom è lɛm, nɛ̀ wɛ ɛ́ nè nɛɛyen se yuye Jesus. 52Əb ndu è yɛn Bailɛt è lon ge əb fo ɛygvən ə Jesus se yi. 53Əb lon di, ɛ́ beeme, əb me ndu è səkse ɛygvən ə Jesus yi, è bate ɛ ndəy sefɛɛ, è ndu nyiŋse se ɛysɛy ɛylee nɛ ɛ́ chuf ɛ ɛyghok, nɛ̀ ɛ́ nè bɛɛy ghàà gvəəme wel ɛ ten. 54Kechii nɛ̂ ki nè foo se kechii ɛybame, nɛ ke se mɛye, nɛ̀ əbliy ɛybame se shi se kɛɛte.

55Əbkiy ghii ghɛ ghene ghe Jesus nè lòòn ɛ Galilee, ndu ɛ Josɛf ɛybam è yɛn ɛysɛy, è gese yɛn ka ɛ́ gvəəmen Jesus. 56Ghene kfəəy, è siyse əbyiósén ɛygvən, nɛ əb lu ɛ tenkii tenkii. Kechii ɛybame nɛy kwɛn, ghene yese se zə̀ə̀lè ka ɛysake nè dinen.

Zur Zeit ausgewählt:

Luk 23: oku

Markierung

Kopieren