Lúkɑ́shi 19
19
Yɛ́su pɔ́p Sɑkíyɔ
1Yɛ́su kúu Yɛ́líkɔ́, ḿbɔ́ ńjɛ́Ꞌ tʉ́sɔŋ, 2Wɛcɔ́ ŋu cẅɛt, lík yɛ́ pɔ́ ŋɡɔ Sɑkíyɔ, ɑ pɔ́ tɑ́tndɑ́-pɑcẅɛ́ɛntsup-Pɑlɔ́mɑ, ḿbɔ́ ŋɡɑŋyúu tɛꞋ. 3A cẅɛt pɔ́Ꞌɔ, ḿbɔ́ ńdɔ́ɔ nɛjʉ́ɔ yɛ́ ŋu ẅí Yɛ́su wɛ́t, lɑ́ ḿbɔɔ ḿbɔ́ ńjʉ́ɔ shʉ́ pɔ́, mbíꞋŋɡɔ ɑ ḿbɔ́ tɛtuꞋ ŋu, lɑ́Ꞌ pɛn ḿbɔ́ nzʉʉ Yɛ́su tɛꞋ. 4A kʉ̈ɔ́ ŋ́ɡʉ mbi, nǔu shʉ́ yi Yɛ́su ḿbɔ́ ŋ́ɡʉ ńdɛɛ zúꞋu, ŋ́kɔ́Ꞌ ńzɑ́pmɛ tʉ́-síkɔmɔ̂, ḿbyɛ́p pɑꞋ ɑ ɡʉ ŋ́ɡɔ ńdɛɛ ɑ jʉ́ɔ wɛ́. 5Yɛ́su ɡʉ tɛ ŋ́kúu zúꞋu, ḿbʉꞋ tú yɛ́ ńdíŋɛ wɛ́, ńcú ŋɡɔ: «Fɛ́Ꞌnɛ ḿpfúu mbɑ́ɑ Sɑkíyɔ, ɛ́ pɔ́ŋ ŋɡɔ, n dɛ́ pɔ ndɑ́ ɡu lɔ́Ꞌnɛ.» 6Sɑkíyɔ ɡɔ́ɔ ḿpfúu, ńtʉ́ʉ sɛ́, ńdɔk tsɑ́ɑtɛ ŋ́kúkŋɛ Yɛ́su. 7Lɑ́Ꞌ kɑ jʉ́ɔ pɑꞋ pɔ́pmɛ́ ɡʉnɛ, ɛ́sẅíitɛ ŋɡɔ: «A pʉ́ɔ liinɛ, ɑ ɡʉnɛ ndɑ́-ŋu kɛpɔŋ ńdɛ́ lii!» 8Pɔ́pmɛ́ ɡɛ ḿbɔ́ ndɑ́, Sɑkíyɔ tʉ́ʉ mbi yɛ́ ńcú ŋɡɔ: «Tsɑpʉɔ, mɔ ŋ́ɡɑptɛ yúu pɑ́ɑ nji yɛ́pɑ́, ŋ́ɡɑ́ tɑ́Ꞌ nji mbɔ̌ pɛkɛyúu, ḿbɔ́ yi ŋ kɑ lɔk ɡɑ́tɛ ńcẅɛ́ɛ yúu-ŋu, mbɔ mɔ ńtsɔ́Ꞌ ŋ́ɡɑ́ mbɔ̌ ŋɡɑŋ ŋkɑ́ yɛ́nɛ́kwɑ.» 9Yɛ́su zúꞋ, ńcú ŋɡɔ: «Sɛ́ ɡɛ yɔ ndɑ́ luk lɔ́Ꞌnɛ, mbíꞋŋɡɔ Sɑkíyɔ pɛn ḿbɔ́ yɛ́ wɛcɔ́ mɔ́ɔ-Ábɛlɛhɑ̂m! 10Mɔ́ɔ-ŋu kɑ zɛɛ ńtɔ́ pɔ nɛlɔ́ɔ pʉɔ pinɛ pɔ́p kɑ kúunɛ pɛ́, ŋ́ɡɛ pɔ́p luk.»
Sɑknɛkɛt nǔu ɡɑŋfɑꞋ pɛtɑ́t
(Mɑtʉ̈ɔ 25.14-30)
11Yɛ́su pɔ́ ńcú nu, lɑ́Ꞌ pɔ́ ńzẅíꞋlɛ tɛ ńcú ḿbɔ́ ŋ́kwɑŋɛ ŋɡɔ nɛfɔɔ-Sɛ́ ɡʉ ŋ́ɡɔ́ɔ ńtɔ́ pɔ ŋkɑ́ ɛ̂yɑ́, ńzɛɛ ŋ́ɡɔ ḿbɔ́, mbɔ ɑ ɡʉ tɛ ńtsʉ́Ꞌ ŋ́kúu pɔ Yɛlúsɑlɛm. Yɛ́su lɔk sɑknɛkɛt ńcú mbɔ̌ pɔ́p ŋɡɔ: 12«Wɛcɔ́ mɔ́ɔntɔ́Ꞌ kɑ lɑ́Ꞌ ńdɔ sɛ́, ŋ́ɡʉ tɛ túu pɑꞋ pɛ́ ɡʉ ńdɔk wɛ́ ŋ́ɡɛ fɔɔntʉ̈ɔꞋ lɑ́, ɑ pɛn nzʉʉ, ḿbɔ́ ɛ́sɑ́Ꞌ yɛ́ pɑk-lɑ́Ꞌ#19.12 Ɛ́ ḿbɔ́ tsɛt lɑ́Ꞌ-Pɑlɔ́mɑ, pɛfɔɔ pinɛ pɔ́p kɑ pɔ́ ńzúꞋ ntsu-Kɑ́sɑ, kɑ ɡẅɛɛ nɛɡʉ ńjʉ́ɔ wɛ́, jʉ́ lɔknɛ wɔ́p ŋ́ɡɛ fɔɔntʉ̈ɔꞋ, lɑ́ pɔ́p pɛn nzʉʉ ɛ́sɑ́Ꞌ lɑ́Ꞌ..»
13A ɡɔ ŋ́ɡʉ, ɛ́fúŋ ɡɑŋfɑꞋ pɛ́ nɛɡɛ́m, ŋ́ɡɑ́ pɑk-ŋkɑ́p ɛ́ yi tʉʉ ndɛn mbɔ̌ mbɑ wɔ̌ lɑ́, ńcú mbɔ̌ pɔ́p ŋɡɔ: «Pʉʉ tsʉ́Ꞌ ḿbɔ́ ńtɑ́ŋ ŋkɑ́p yɔ tɛ n dɑ́Ꞌ ḿbɛn.» 14Ŋ́ɡɔ́ɔ ŋ́kɛ́ ŋ́ɡʉ. Lɑ́, pɑlɑ́Ꞌ ɛ̂pɑ́, lɔk pɑꞋ pɔ́p kɑ pɔ́ ḿbɑɑ wɛ́ pɑɑnɛ, ńtúu pʉɔ zʉꞋ yi ɑ ɡʉnɛ́ nɛ́ zúꞋu, ŋɡɔ pɔ́p ɡʉ ńcú ŋɡɔ: «Pɛk kɑ́ pɔ́ ŋ́kɔŋ ŋɡɔ ŋu wɑ́lɑ́ sɑ́Ꞌ wɛk pɔ́.» 15Lɑ́ ɑ ɡʉ tɛ ŋ́kúu zúꞋu, pɛ́ kɛ ńdɔk wɛ́ ŋ́ɡɛ pɔ fɔɔ, ɑ pɛn nzʉʉ ŋkɔ̂ɔnɛ, ɛ́fúŋ ɡɑŋfɑꞋ pɛ́ pinɛ ɑ kɑ ɡɑ́nɛ ntʉ̈ɔt-mɛtɑ́ɑ mbɔ̌ pɔ́p lɑ́, nɛpɔ́ yi pɔ́p ɡʉ ɛ́sẅíi wɛ́ pɑꞋ pɔ́p kɑ tsʉ́Ꞌnɛ nzʉʉ ńtɑ́ŋ tɛ ɛ́ pɔ́ pɔ́Ꞌɔ. 16Nduŋmbi tɔ́, ńtʉ́ʉ mbi yɛ́ ńcú ŋɡɔ: «Zɑɑ mɔ́ɔ, n tɑ́ŋ ŋkɑ́p yi ɔ kɑ ɡɑ́nɛ mbɔ̌ mɔ lɑ́, tɛ ńjʉ́ pɑk nɛɡɛ́m.» 17Fɔɔ tsɔ́Ꞌ ŋɡɔ: «Ɛ́ pɔ́ŋ, ɔ ŋɡɑŋfɑꞋ wɛ sʉ́Ꞌnɛ. PɑꞋ ɔ pɑ́ɑnɛ mɔ́ncɛꞋ yúu sʉ́Ꞌnɛ lɑ́, mɔ ŋ́ɡɑ́ mɛtʉ́sɔŋ nɛɡɛ́m ɔ pɔ́nɛ ɛ́sɑ́Ꞌ.» 18Mbɑ́ɑtɛ tɔ́ yɛ́ ńcú ŋɡɔ: «Mɛ́ntɑ́ɑ, n tɑ́ŋ ŋkɑ́p yi ɔ kɑ ɡɑ́nɛ mbɔ̌ mɔ lɑ́, tɛ ńjʉ́ pɑk pɛ́tɑɑ.» 19Fɔɔ tsɔ́Ꞌ mbɔ̌ wɛ́ ŋɡɔ: «Ɛ́ ɡʉ nǔu ɡu, mbɔ mɔ ńdɔk wú ŋ́ɡɛ Ŋɡɔ́mnɑɑ ẅí ɔ ɡʉ ɛ́sɑ́Ꞌ mɛtʉ́sɔŋ mɛ́ntɑɑ.» 20Wɛcɔ́ tɔ́ ńcú ŋɡɔ: «Mɛ́ntɑ́t, tɑ́Ꞌ pɑk-ŋkɑ́p yu yɑ́ pʉ́ɔ, ŋ kɑ lɔk yúu-ndẅí ŋ́kút ńdẅɛꞋ. 21Ńzɛɛ ńdẅɛꞋ pɔ́Ꞌɔ, pɔ mbíꞋŋɡɔ ŋ kɑ pɔ́ ḿbɔ́k wú pɔ́knɛ. Ɔ ŋu ńcʉ̈ɔ́k tɛꞋ, ɔ lɔ ḿbɛ́ɛ yúu pɔ zʉꞋ yi ɔ ŋ́kɑɑ zúꞋu nɔŋ, ḿbɛn ŋ́kɑ́p yúu mi ɔ ŋ́kɑɑ pi. 22Fɔɔ tsɔ́Ꞌ mbɔ̌ wɛ́ ŋɡɔ: Ɔ ŋu ŋɡɑŋfɑꞋ kɛpɔŋ. Ŋ ɡɛ ńdɔk pɔ ntsu wú ŋ́ŋɑk wú. Ɔ kɑ jí ŋɡɔ mbɑk-nu yɑɑ tɛn tɛꞋ, ŋɡɔ n dɔ ḿbɛ́ɛ yúu zʉꞋ yi ŋ kɑ́ nɔŋ, ńtsɔ́Ꞌ yúu zʉꞋ yi ŋ kɑ́ pi. 23Mɛlɑ́Ꞌkʉ̈ɔ́ ɔ ŋ́kɑɑ kɛ́ ńníꞋ ŋkɑ́p yɑɑ mbɑ̂ŋ pɔ́, zʉꞋ yi mɔ ŋ́ɡɛ ḿbɛn ŋ́ɡɔ ńtɔ́ ńcẅɛ́ɛ, pii zɑ́pmɛ́ nǔu pɔ́ ɔɔ?» 24Ŋ́ɡɔ́ɔ ŋ́kɛ́ ńcú mbɔ̌ pʉɔ pinɛ pɔ́p ḿbɔ́nɛ zúꞋu ŋɡɔ: «“Pʉʉ ɡẅɛɛ wɛ́, ńcẅɛ́ɛ yɛ ŋkɑ́p, ŋ́ɡɑ́ mbɔ̌ ŋu ẅí ɑ jʉ́nɛ pii pɑk nɛɡɛ́m.”» 25Pɔ́p zɔŋ ŋɡɔ: «“Mɛ́ntɑ́t, ɑ ńdɑ́Ꞌ mɔ́ ŋ́ɡẅɛɛ pɑk nɛɡɛ́m!”» 26Fɔɔ tsɔ́Ꞌ ŋɡɔ: «“Ɛ sẅíi wʉ́ʉ, ŋu lɑɑ ɛ́sɑ́Ꞌ tʉʉ tɛ ŋ́ɡẅɛɛ yúu, mbɔ pɛ́ ɡɛ ŋ́kẅiꞋ. Lɑ́ ŋu kɛ́ ḿbɔɔ sɑ́Ꞌ tʉʉ pɔ́, mbɔ pɛ́ ɡɛ ɛ́fú mbɔ̌ wɛ́ ńcẅɛ́ɛ mbɑ mɔ́zʉꞋ yúu minɛ ɑ ɡẅɛɛnɛ.”» 27Ɛ́ ɡʉ nǔu ɡɑŋmbuu pɑ́ɑ, pʉɔ pɑ́ pinɛ pɔ́p kɑ pɔ́ ńdʉꞋ ŋɡɔ ŋ kɛ́ pɔ́ fɔɔ wɔp pɔ́ lɑ́, pʉʉ lɔk wɔ́p ńtɔ́ zɑ́Ꞌnɛ, ŋ́ɡwɑt wɔ́p mbi mɔ.
Yɛ́su kúu Yɛlúsɑlɛm
(Mɑtʉ̈ɔ 21.1-11, 15-17; Mɑ́lɛ́kúshi 11.1-10; Jɑ̂ŋ 12.12-16)
28Yɛ́su cú yɔ sɑknɛkɛt mbɔ̌ lɑ́Ꞌ tɛ ḿmik, ńdɛɛ ḿbɔ́ mbi, ḿbɔ́ ḿbʉʉ nɛ Yɛlúsɑlɛm. 29Ŋ́ɡʉ tɛ ḿbɔ́ ŋ́kúu nɛpɑ́ɑtɛ Mbɛtfɑjɛ́ɛ pɔ́p Mbɛtɑni, mbʉʉ-nɛŋkɔ́Ꞌ-mɛtʉ́-mɛɡwɛ́t-Ɔlíivɛ, ńtúu ɡɑŋku pɛ́ pɛ́pɑ́, 30ńcú mbɔ̌ pɔ́p ŋɡɔ: «Pʉʉ ɡʉ tsɛt lɑ́Ꞌ yɔ yi ɛ́ mbi pʉʉ lɑ́ɑ. Pʉʉ ɡʉ ŋ́kúu zúꞋu, ńjʉ́ɔ mɔ́ɔ-njɑkɑ́ɑshi ẅi pɛ́ cʉŋɛ́nɛ, ɑ pɔ́ ẅi ŋu ŋ́kɑɑ mɔ́ ndǔ ńnɑ́ŋ. Pʉʉ kyɛꞌ ńdɔk ńtɔ́. 31Pʉʉ lɑɑ ḿbɔ́ ŋ́kyɛ́Ꞌ, ŋu píkŋɛ wʉ́ʉ ŋɡɔ pʉʉ kyɛꞌ njɑkɑ́ɑshi wɔ mɛlɑ́Ꞌkʉ̈ɔ́ ɔ́ɔ? Pʉʉ tsɔ́Ꞌ ŋɡɔ Tsɑpʉɔ lɑ́Ꞌnɛ ḿbɔ́ ńtsɑ́ɑ.» 32Pʉɔ pinɛ ɑ túunɛ wɔ́p ɡʉ tɛ ŋ́kúu zúꞋu, ńjʉ́ɔ mbɑ kʉɔ lɑ́ pɔ́ pɔ pɑꞋ Yɛ́su lɑ́Ꞌnɛ sẅíi wɔ́p. 33Pɔ́p pɔ́ ŋ́kyɛꞋ ɡɑŋ-njɑkɑ́ɑshi ɛ̂wɑ́ cú ŋɡɔ: «Pʉʉ kyɛꞌ mɔ́ɔ-njɑkɑ́ɑshi wɔ mɛlɑ́Ꞌkʉ̈ɔ́?» 34Pɔ́p tsɔ́Ꞌ ŋɡɔ: «Tsɑpʉɔ lɑ́Ꞌnɛ mbɔ́ ńtsɑ́ɑ.» 35Pɔ́p lɔk njɑkɑ́ɑshi ńtɔ́ tɛ ŋ́kúu nɛjɔ́ŋ Yɛ́su, ńzɑ́p mɛndẅí-fɑ́k mɔ́p ŋkwɛn yɛ́, ŋ́ɡɛ ɑ kɔ́Ꞌ ńnɑ́ŋ ndǔ. 36Yɛ́su pɔ́ ŋ́ɡʉ, pʉɔ pɔ́ sɑŋtɛ mɛndẅí mɔ́p ndǔ sɛ̂ndúŋ, ɑ nɛn ndǔ. 37A ɡʉ tɛ ḿbɔ́ ɛ́fú nɛŋkɔ́Ꞌ-mɛtʉ́-Ɔlíivɛ ńcúŋ, ɡɑŋku pɛ́ pi pɔ́p ḿbɔ́nɛ nzʉʉ yɛ tɛ ḿbɔ́ pɔ́p lɑ́Ꞌ mɔ́ ńzɛ nɛtsɑ́ɑtɛ, lɔk ŋɡi tɛnnɛ ŋ́ɡúꞋlɛ Sɛ́ nǔu mɛnu mɑɑ mɑɑnɛ mi pɔ́p kɑ jʉ́ɔnɛ Yɛ́su ɡɛ, 38ḿbɔ́ ńcú ŋɡɔ:
«Mbɔ́tnɛ pɔ́ mbɔ̌ Fɔɔ ẅí ɑ tɔ́nɛ nǔu lík-Tsɑpʉɔ.
Sɛ́ tʉ́nɛ́pú ḿbɔ́ Ŋɡɑŋ-mbɔ́tnɛ,
ɡúꞋlɛ pɔ́ mbɔ̌ wɛ́ ẅi ɑ tɛ tʉ́nɛ́pú.»
39Pɛcɔ́ Pɑ́fɑlísɑy pinɛ pɔ́p ḿbɔ́nɛ yɔ́p zúꞋu, fú tsɛtsɛt lɑ́Ꞌ, ńcú mbɔ̌ Yɛ́su ŋɡɔ: «Cícɑ, ɡɛ ɡɑŋku pú nɑꞋ!» 40Yɛ́su tsɔ́Ꞌ ŋɡɔ: «Ɛ sẅíi wʉ́ʉ: pɔ́p lɑɑ ńnɑꞋ, mbɔ mɛŋɡɔꞋ ɡɛ ḿbɑ́klɛ zʉꞋ!» 41Yɛ́su ɡʉ tɛ ḿbɔ́ ŋ́kúu Yɛlúsɑlɛm, ńdíŋɛ tʉ́sɔŋ ńzɛ nɛkíi, 42ḿbɔ́ ńcú ŋɡɔ: «Pʉʉ Pɑyɛlúsɑlɛm, pʉʉ lɔ́Ꞌnɛ, ḿbɔɔ ḿbɔ́ ńjí yúu mi mbɔ ɛ́ ɡɑ́ wʉ́ʉ nɛ́ mbɔ́tnɛ pɔ́, ɛ́ pʉ́ɔ mík pʉʉ. Lɑ́ ɛ́ lʉɔmɛ mɔ́, ḿbɔ́ pʉʉ pɔɔ pɛn ńjʉ́ɔ pɔ́.» 43Yɛcɔ́ ŋkɑ́ ɡʉ ŋ́ɡɛ ḿbɔ́, ɡɑŋmbuu pʉ́ʉ tɔ́, ŋ́kút ŋkɑ́Ꞌ ńdɔk kíitɛ wʉ́ʉ, ɛ́fú mɛshʉ́ mɛshʉ́ ńtɔ́ ńnɔꞋ wʉ́ʉ. 44Pɔ́p ɡʉ ŋ́ɡɛ ńtɔ́, ŋ́ɡɔꞋ wʉ́ʉ, pɔ́p pɔ́ɔ pʉ́ʉ tsʉʉ, ḿbɛn ɛ́sɑt tʉ́sɔŋ yʉ́ʉ tɛ ḿbɔɔ nɑ́ ŋɡɔꞋ pɛn ńzɑ́pmɛ nǔu yɛcɔ́ pɔ́. Ɛ́ zɛɛ ḿbɔ́ pɔ́Ꞌɔ, mbíꞋŋɡɔ pʉʉ kɑ muŋɛ ŋkɑ́ yi Sɛ́ ńtɔ́ nɛɡɛ nu sʉ́Ꞌnɛ nǔu pʉʉ.
Yɛ́su zuŋ pɑtɑ́ŋmɛtɑ́ɑ tsɛt ndɑ́-nɛnɔŋpɔꞋ
(Mɑtʉ̈ɔ 21.12-13; Mɑ́lɛ́kúshi 11.15-19; Jɑ̂ŋ 2.13-16)
45Yɛ́su fú zúꞋu, ŋ́ɡʉ tɛ ŋ́kúu tsɛt ndɑ́-nɛnɔŋpɔꞋ, ńzɛ nɛtɑ́k pɑfɛn yúu, 46ḿbɔ́ ńcú mbɔ̌ pɔ́p ŋɡɔ: «Ɛ́ tsɛt ŋwɑꞋnɛ-Sɛ́, Sɛ́ cú ŋɡɔ: “Ndɑ́ yɑɑ ɡʉ ŋ́ɡɛ ḿbɔ́ ndɑ́-nɛcɛꞋlɛ Sɛ́. Lɑ́ pʉʉ kɑ shɔt ńdɔk ŋ́ɡɛ ŋkɑɑ-pɛtsɔ́ŋ.”» 47Yɛ́su pɛn ḿbɔ́ lɛ́Ꞌ tsʉʉ, ḿbɔ́ pɔ tsɛt ndɑ́-nɛnɔŋpɔꞋ ńzíꞋ pʉɔ nɛ nu-Sɛ́, pɛtɑ́tndɑ́-pɑnɔ́ŋ pɔꞋ, pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ mbɑ pɛkɛ́m-Pɑyúdɑ pɔ́ ńdɔ́ɔ nɛɡɛ pɛ́ jẅí wɛ́. 48Lɑ́ ńdɔ́ɔ kɛ́kɑ́ŋ, mbíꞋŋɡɔ lɑ́Ꞌ tsʉʉ kɑ pɔ́ ńtík mɛtúutɛ́ tɛꞋ ńzẅíꞋlɛ nu yi Yɛ́su cúnɛ.
Zur Zeit ausgewählt:
Lúkɑ́shi 19: JGO
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
CABTAL, 2017
