Matana Enjil 8

Bag. 8.

1Gunarton shugrosingad jemachi digrichi weri tekki tebaesan.

2Baraskol wer tatirrigi ungosirgi wetirsum: „Wo tir, er on birigkin, er eskergi aigi bigengirin.“ 3Yesu tenna igi midergi tekki kumos wetirsum: „Abirigrin. Genan!“ Tenna lehdayen tenna barasirton genanossum. 4Yesu tekki wetirsum: „Wekkongi ingi wetirmen. Ama jurgi fegirki enn agi amintir, widi gojir Muse weredagsingi awu, tinna shehadan jiradilo.“

5Kafrinahumir Yesu torossinn agabir tekk abidi imilgi akiyel wer targi tennaiton werissum: 6„Wo tirti, anna hadam katur sowos lufebun. 7Wide desen odin.“ Yesu tekki wetirsum: „Ai targi tekki bigengirrin.“ 8Imilgi akiyel wide wetirsum: „Wo tirti, ai bichena kar mine er biton? Ai istahalemnim er anna habikan togor tongi. Ama were habitoddekki weros. 9Anna hadam tekked bigenanin. Mine aigon teran zol amurtogor dabul erin. Ama askari weri ann in togor daran, Ingi ‚Juw’ ankirin, ajun. Wide owittigi ‚Tar’ ankirin, atan. Widegon anna nugudti ‚Ingi aw’ ankirin, aawin.“ 10Ingi Yesu gijred ajibesum. Wide tekki tebaedaligi wetidirsum: „Aleged irgi wetidirrin, ai iman ini galig wekki elkomnim, wala Israello. 11Wide irgi wetidirrin, digrichi weri maltirton wide tindoton targi biwelesetegran Ebrehingon Isaagkon wide Yagubkongodon, simechina mulkir. 12Ama mulkin affichi duluma bochindir bilufetakkikandan. Teddogon arwijarkon wide nelina duskarkongi bellan.“ 13Terin agabir Yesu imilgi akiyelgi wetirsum: „Ju! Er amnesin nawite ekki awtakkitiringed.“ Tenna hadam manin saa genanossum.

14Yesu Butrusna kar bidasinn agabir uru nalsum tinogo huma wekked lufebungi. 15Tenna igi kumingad huma tekki talgossum. Ter wide imbelligi tirgi ajelirsum.

16Gu shareyaningad, tekk abidi doshi digrichi werigi owolgirtirsan. Ter newertichi milichigi were habitoddekked turosirsum. Wide odili malegi gengirirsum, 17were Ishayaged webulgi timer an: „Ter teran anna mailkanegi arel, wide ann odarigi injel.“

18Tenna keliged jemachi digrichi werigi uru nalos essin jerkir wawarki amresum. 19Abajil wer tekk abidi talin torgi wetirsum: „Wo tirti, er junn agarro ekki bitebaerin.“ 20Yesu widegirtirsum: „Abulhiseni goldigi koran. Wide simen kawirtechi ushichigi koran. Ama zolna tod tenn urki uskurinn agarki komnum.“

21Owitti wer tenna hiranirton tekki wetirsum: „Wo tir, koyalgi ambabki ju kuyros tarinbokon wakos.“ 22Yesu widegirtirsum: „Aigi tebae. Wide dibuligi mug tinna dibuligi kuyirw an.“

23Kubtur atongon tenna hirani tekki tebaesan. 24Lehdayen essi imbelligi mojked kubki tagrossum. Tekkon hunir nerbusum. 25Hirani tekk abidi awtandigi agsos wide tekki wetirsan: „Argi durir, wo tir, ar adabrun.“ 26Ter tirgi widegirtidirsum: „Ir ma sarkeburun, ogji iman gelilkoni?“ Terin aharro imbelligi turugkon wide essigongi jezmetidiringad male santossan. 27Wide man ogji ajebked eyos wesan: „Ni terre in, tekki turgigon wide essigon agijirtirili?“

28Essina jerked bidangad, Jedrichin esheyir, newerti milichiged degbul owi tekki abidisan, techirton belburangon. Ter ogj owina miligid desen us esinged, zol wer manged eskergi anogkomnum. 29Tiri wide uwesan: „Min wer argon ekkonna barer dan, wo tirna tod? Er indo tama argi jugrirri an wattin owollo?“

30Warirgon dasum hanzirna doh wer. Aïwsum. 31Newerti milichi tekki beddi wetirsan: „Er on argi aturirkin, argi ishiniru man hanzirna dohtur.“ 32Yesu wetidirsum: „Juwe!“ Mani wattigi belligi hanzirna dohir tosan. Hanziri wide bodti dosh wekki bodirgi, doh male essir jag torgi disum essin tur.

33Ama tirgi aïweli dosirgi mediner ju, ta nogel malegi wetidirsan, wide newerti miliged degbueliged awtakkelgi. 34Inigodon medine kamil bel targi Yesugi abidos tekki beddisum, tinn esheirton nog an.

Zur Zeit ausgewählt:

Matana Enjil 8: XNZ1912

Markierung

Kopieren