Matana Enjil 15
15
Bag. 15.
1Widegon Farisichi werigon wide abajili werigon Urushalimirton talin targi Yesugi wetirsan: 2„Enna hirani ma kurselina gelidadti atogran? Kalgi kallanna wattigi tinna ichigi aewmendan.“ 3Ter rude wetidirsum: „Won irgon, ir ma artina sheriagi atogrun inna gelidadted? 4Mine arti wesum: ‚Imbabkon inengongi kermeir an,’ wide: ‚Weron timbabki wala tinengi nālel diarked di agad’. 5Ama iri awerun: ‚Timbab wer on wala tinen wer on tinna todti wetirkiran: Argi injir an ennai dalged—todton tekki uskeligi wetidirkin: Ai artigi teran baitirossim ir awerisrungi — in toddogor damnum timbabki wala tinengi kermad.’ 6Iri artina sheriagi inna gelidadted wakossun. 7Wo habisi, seregir teran Ishaya nebi idder wesum: 8‚In gebila aig abidi tenna agilged teran aawtanin. Wide tenna shundichiged aigi akermen. Ama tenna a annaiton warigir warianbun. 9Wide aigi sudir aabden, won tiri zolina hadiski akurkidirangon.’ “
10Ter wide jemagi uwedtargi wetidirsum: „Gijir fehmewe! 11Agilged atol zolgi anejisemnum. Agilloton abelil, ter zolgi anejisen.“
12Terin aharro tenna hirani tekk abidi talin torgi wetirsan: „Er iyirna Farisichi weregi gijredirgi uretakkossangi?“ 13Ter rude wetirsum: „Shetil nutin, abo simer dal shetlemenkin, bidukitakkin. 14Mugirwe. Tirdugrim, wide dugrigi akiyelim. Won dugurwer dugur wekki kiyekin, owingari dolin tur bidigirtoran.“
15Butrus rude wetirsum: „Argi in metelgi fesiredecchiru.“ 16Yesu wide wesum: „Irgon terre ittagbokon fehmemenagrun? 17Iri afehmemnu elgon, agillo atol tur ashugurtongi, wide togoged abelingi? 18Ama agilloton abelil arton teran abeltan. Man wide zolgi anejisen. 19Mine arton teran abellan ergi milichigon, berarkon, soroskanegon, uskanegon, magarkon, shahada mursindigon, didtigon. 20Ingu male teran zolgi anejiseli. Ama kale ichin ewarkiyir zolgi anejisemnum.“
21Man agarroton Yesu tale bolosirgi Surkon wide Saidagongir jusum. 22En Kinaniye, man agarindi wer, tennai targi tekki beddisum: „Wo tir, Dawudna tod, aigi dur. Anna buru newerti mili wekked desen doshanbun.“ 23Tekki balekomnum. Tenna hirani tekk abidi awtandigi wide wetirsan: „In engi talekidos, argi wigingon tebaedaïrilgi.“ 24Ter rude wide wesum: „Israelna kan egedi dabburanna jiradilo teran ai ishinburin.“ 25Ama en targi sejdossir wetirsum: „Wo tir, aigi dur!“ 26Ter widegir wesum: „Adelmunum affichina kalgi injirgi weligi lufetidirar.“ 27En wesum: „Seregi wesum, wo tir. Ama weligon tomattichi affichinaiton digriligi adetikallan.“ 28Mani wattigi Yesu rude tekki wetirsum: „Wo en, dulum enna iman. Er awersin nawite ekki awtakkitirel!“ Ter saayen tenna buru genanossum.
29Teddeton Yesu talosirgi Jelilna essin garro tasum. Ter ter gunagi dari kujirgi teddo tegossum. 30Tekk abidi jemachi digrichi weri ta jamesan. Tirgodongon kagsan fogorachigon, dugrigon, mumdigon, sowibuligon, wide echeli digrichi werigon. Wide Yesuna osichinai uskurirsan. Tekkon gengirirsum. 31Inged jemachi ajebir dabusan mumdigi abaindangi nalos, sowibuligon sewayanossangi, fogorachigon atalerangi, dugrigon anallangi. Wide Israelna tirki mejidesan.
32Ama Yesu tenna hiranigi uwedtargi wesum: „Ai in jemagi ashefegerin. Mine olongu ugros toskum aigodon agran. Wala tirgodon kallan damnum. Wala abirigminim dertigi kagrangon talekidirarki, darbir taleburangon digirranna sarkeged.“ 33Hirani tekki wetirsan: „Sayer elon kal ukkottekki bellun in agar halar, jema ini galigki berkidilgi.“ 34Yesu wetidirsum: „Tube mukkoti irgodon dan?“ Tir wesan: „Tube kolod wide kare kinatodirton gelil wer.“ 35Ter wide jemachigi wetidirsum: „Ariddogor tegosw an.“ 36Wide tube kolodingarigi wide karechigongi arrigi wide barkossinn agabir birtos, hiranigi tidirsum, hiranigon jemagi tirsan. 37Male kaled beressann agabir kewdelgi tube kolodna tomattichirton soke jamegirrangad, shibir kolodti eyegirsan. 38Kaleligon ogij eluf kemsi esan, ecchigon affichigonna masir. 39Terin aharro jemagi talekidos, wide kubir toros, Magadanna esheigir tasum.
Zur Zeit ausgewählt:
Matana Enjil 15: XNZ1912
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Published by the British and Foreign Bible Society in 1912.
