Matana Enjil 13

Bag. 13.

1Man ugroskollo Yesu karton bel targi essin garro tegossum. 2Jemachi digrichi weri tenna hawalendo targi jamerangad, kub werro toros wide teddo tegos jemachi abdogor tebiligi abaintidirsum. 3Ter meteli digrichi weriged tirgodon bainsum:

4„Terigi amugil wer belsum, terigi mugiry an. Terigi amugingon terirton bagid wer darubdogor digirsum. Kawirtechi tararrigi terigi detessan. 5Bagid owitti digirsum kororn agar werdogor. Teddo esked libab dameningad, kawite bersum aridna kutikaneged. 6Ama masil bel targi jugrossum, kōigi komeningad. 7Widegon sowossum. Bagid echel wer kilisechina barer digirsum. Kilisechigon berrigi gidossan. 8Bagid wekkon arid adel werro digirsum. Ter wide iwgi attasum. Libi wekkon libi imilgi attasum. Libi owitti wekkon sitingi attasum. Echel wekkon talatingi attasum. 9Ulugki kolna tirti gijr agad!“

10Tenna hirani awtandigi wide wetirsan: „Er ma tirgodon meteliged abainin?“ 11Tirgi widegirtidirsum: „Miney ankomnum, irgi tidirtakkisum simechina sirigi iyirar. Ama ingugi tidirtakkikomnum. 12Mine dalna tirtigi bitirtakkin wide bizidetakkitirin. Ama komenilna tirtigi tennai daltodton bartakkin. 13Inin jiradilo teran tirgodon meteliged abaindin, mine misichi kusburangon analminan, ulugki korangon agijirminan wala afehmemnan. 14Tidder teran nebi Ishayana were timesum, webul: ‚Inna ulgiged bigijirkandun. Ama bifehmekanmunun. Inna misichiged burukandun. 15Ama binalkanmunun. Mine in gebilana a kogoranossum. Tinn ulgigon gijossan. Tinna misichigon kufossan, mine tinna misichi nallanna sarkeged, tinna ulgigon gijirranna sarkeged, wide, tinn achiged fehmed aig abidi rejekran, bigengirirrinna sarkeged.’ “

16„Ama inna misichi barkeburan, anallangad. Inn ulgigon barkeburan, agijirrangad. 17Aleged, irgi wetidirrin, nebichi digrichi weri wide sewachi digrichi werigon nalarki werissan iri anallungi. Wide nalkomnan. Wide gijrarki werissan iri agijirrungi. Gijirkomnan.“

18„Ir eleken gijirwe terigi agulilna metelgi: 19Gir nutinder, ogij wer mulkina weregi gijirkin, wide tenn an tur tomenkin, mili taka teri gulitakkelgi adetedin tenna arton. In teran i teri darubdogor gulitakkibuel. 20Wide korordogor berbul, ter ogij weregi gijred koyalgi gurattiged ajamegrin. 21Ama tenna kidir kōigi komeningad, geliltoddekki akewdin. Dig wer tatirkin, walagon jomari werena jiradilo tatirkiran, lehdayen adigrosin. 22Kilisechin barer digrelgon ogij weregi agijril teran. Ama in alamna hemichigon wide duguna seyadton weregi agidosran. Wide aterikiyanin. 23Ama teri arid adello terbul, ter zol weregi gijirka afehmel teran. Tekkon iw digrigi aattal teran. Bagidton imilgi aattan. Bagid owittigon sitingi aattan. Bagid toskittigon talatingi.“

24Metel echel wekkon owolgirtidirsum. Wide wesum: „Simechina mulki ashebihen zol wekki, teri adel wekki tenna gur gulisingi. 25Zoli nerburangon tenna aduwi wer targi ugwen huret wekki ilena seler teros nogsum. 26Zara berrigi dulan keyirgi iwgi injingad, mani wattigi huret binesum. 27Kana tirtina nugdi targi wetirsan: ‚Wo tirti, er eleken teri adel wekki enna gur terkomnu? Won sayerton in huret tedder targi tom?’ 28Ter wetidirsum: ‚Zol aduwi wer ingi awsum.’ Nugdi tekki wetirsan: ‚Awerisna ar jurgi detosrungi?’ 29Ter wesum: ‚Ilah an. Mine ilegi hurettodon dukosrunna sarkeged. 30Mugosirwe ittiwrigodon karijw an jorarbokon. Jorarna ugrosir ajoriligi biwetidirrin: Koyalgi huretti jamegir rabdachigir digdigos igir luf undurw an, ama ilegi anna shunar undurwe.’“

31Metel echel wekkon wetidirsum: „Simechina mulki hardelna libi wekki ashebihen. Zol wer tekki ojjurgi tenna gu werro terossum. 32Tekkon terichina edi norotod teran. Ama ber boloskin, ter zarachina edi dul teran. Wide ajowanin. Wide tenna dulkanegedgon simena kawirtechi taka tenna bakichir tinna ushichigi aawran.“

33Metel echel wekkon wetidirsum: „Simechina mulki kalise nadi wekki ashebihen. En wer arrigi norti barasi toskir sawrossum, male ittiwrigodon kosw an.“

34In maleged Yesu jemachigodon bainsum meteliged. Wala metelikiyir tirgodon bainkomnum. 35Ingon nebiged webulgi aleyan an: „Meteliged ai, anna agilgi kus, bibaindin, wide bokibulged alamna goyarn owolloton.“

36Manin aharro Yesu jemachigi talekidosir ka werro torossum. Tenna hirani tekk abidi tale targi wide wetirsan: „Argi huretna metelgi fesire wedecchiru.“ 37Ter rude wetidireum: „Teri adelgi ateril zolna tod teran. 38Gugon alam teran. Zara adelgon mulkin toni teran. 39Huretton milin toni teran. Aduwi huretti terilgon Iblis teran. Jorarkon alamna kemal teran. Ajoriligon malaikari teran. 40Huretti jamegirka ajugurran nawite, ikke biturubkanin in alamna kemal. 41Zolna tod tenna malaikarigi bishinirkanin, tenna mulkirton jamegirw an atran idigon wide miligi aawiligongi. 42Wide ig fahurandir bilufundurirran. Mando teran oyarkon wide nelina duskarkon dan. 43Ama sewachi masil nawre bidawekandan tinn abona mulkir. Ulugki kolna tirti gijrarna jiradilo, gijr agad!“

44„Simechina mulki dahira gu werro kuybul wekki ashebihen. Ogij wer eledirgi tenna gurattiged bokkiros jurgi tennai darel malegi janos man gugi janessum.“

45„Widegon simechina mulki ogij tajir wer luluchi serechi werigi akashil wekki ashebihen. 46Ter lulu adel dugu digrikol wekki eledirgi tekkon talin jurgi ter kosin malegi janosirgi tekki janessum.“

47„Wide simechina mulki tili essir lufebul wekki ashebihen. Tekkon kare jinsi malegi jamegir undur kagsum. 48Eyosingad bochigir tole osossan. Wide tegos karechi adeligi dadichir jamegir undursan. Ama usigi bochigir lufosirsan. 49Ikke teran alamna kemallo bawtakkin. Malaikari belligi bibarosran usigi adelina barerton. 50Wide tirgi ig ulibullo bilufundurirran. Teddo wigarkon wide nelina duskarkon beltakkin.“

51„Ir in malegi fehmesure?“ Tir wesan: „Eyo, wo tirti.“ 52Tirgi wide wetidirsum: „Ikke teran bun abajil nutin, simechina mulkiged kurbul, ogij kana tirti wekki ashebihen, tenna dahirarton erigon wide kurseligongi atolosilgi.“

53Yesu in meteligi bajkiringad, mandoton talossum. 54Wide tenn esheigir tasum. Teddo kurkidarki tinna jamar ugudisum. Tir wide desenkiyr ajibe wesan: „Sayerton tekki tatirum in hegma wide in ayachigon? 55Eleken in najarna tod termunu? Tinengon Meryem emna? Wide Yagubkon wide Yusifkon wide Simangon wide Yahudagon timbesi termina? 56Widegon tinisichi argodon agmina? Sayerton tekki in tatiru?“ Ter tinna aïrad ter esum. 57Yesu wide wetidirsum: „Nebi tenn eshein idirton keremkiyum.“ 58Inin jiradilo ayachi gelili werigi teddo awsum, tinna imankiyikaneged.

Zur Zeit ausgewählt:

Matana Enjil 13: XNZ1912

Markierung

Kopieren