Kada Bulawan 4
4
Pangpakainga' nnangah macca
1Ee sininna bati'ku', pesa'dingngii tee pangpangngajahna ambe'mi!
Parinawa meloi miampui kamapahangan,
2nasaba' melo tee kuajaran kamu',
iamo joo pugaukki tee pangpatujungku'.
3Ia tongkubiccu'pa tongkusola unapa tomatuangku', tangpakullepa'
na napakamoja'na' susi anak mesa
4naajahhina' ambe'ku' nakua,
“Ingaranni tee pangpakainga'ku'
muturu'i tee pangpangngajahku'
na masannang katuoanmu.
5Angahhi to kamaccan
pengkulleii nnampa' kamapahangan,
danggi' paboko'i penawa to kadangku'.
6Kamali'i to kamaccan naparakaii to katuoanmu,
danggi' mupaboko'ii penawa, nalendungngiko.
7Ia to kaminang parallu iamo to kamaccan
jaji pengkulleii muampa'i,
na sininna to apa mupangngattai
ia to kaminang parallu iamo to nnampui kamapahangan.
8La muangga' to kamaccan napamala'bihko,
pajio kalei muditaratte'.
9Mudiangga' butung to dipatalikka'i bunga
ba'tu dipasongko'i songko' karajaan to maballo dikita.”
10Ee anakku', pesa'dingngina'!
Parinawa meloi tee sininna pangpakainga'ku',
mumalambeh sunga'.
11Kuajahhimoko umbo dikua macca
sola kupatujumoko umbo dikua tuo maruruh.
12Ia ke susimi joo katuoanmu,
te'da apa ssakkalangngiko
butung to tolumingka te'da mpajo-pajoii
ba'tu tokinjara' tangtitodo.
13Pentoei mandikki to pangpangngajah mangka kupauanko,
danggi' ra'pananni.
Parakai meloi,
nasaba' iamo garonto'na katuoanmu.
14Danggi' mupeula'i panggaukanna to togaja',
danggi' muturu'i lalan katuoanna.
15Pamambelai kalemu danggi' mumale sibawa-bawa,
pessalaii to lalanna mutarruh bang.
16Tangnapumamma' togaja' ke te'da napugauk kagajatan,
te'da narapa' penawanna ke te'dapi nancilakai tau.
17Panggaukan gaja' butung napukande,
na kamaparrangan butung napuwai diiso'.
18Ia to lalan katuoanna tomakassing butung arrang allo makale',
saendek-endekna samacora-coranna ratu lako tangnga allo.
19Apa ia to katuoanna to togaja' butung kamalillinan,
te'da nakitai to la mpatitodoi.
20Ee anakku', parinawai tee kadangku'!
Pesa'dingngii tee sininna pangpakainga'ku'.
21Pallan penawa tonganni,
danggi' mupaboko'i penawa.
22Nasaba' ia ke mupahangngi muturu'i tee pangpakainga'ku',
la masannang katuoanmu
napumalagahhi kalemu.
23Jagai meloi to penawammu,
nasaba' pole llan mai penawammu to mpattantu katuoanmu.
24Danggi' lalo mumangkada tangtongan,
danggi' namessun jio timummu to kada pangnguraga.
25Parinawai to tujunna katuoanmu,
danggi' mumellepang jio mai lalan maruruh.
26 #
Ibrani 12:13
Pikkiri' meloi jolo' to akkatta la mupugauk,
nakeassele' melo to panggaukanmu.
27Danggi' pessalaii to lalan katonganan,
pamambelai to kalemu jio mai panggaukan gaja'.
Zur Zeit ausgewählt:
Kada Bulawan 4: mvpAD
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Wycliffe Bible Translators, Inc. All rights reserved.