Kada Bulawan 2
2
Den bua'na to macca
1Ee anakku', tarimai to pangpangngajahku',
mutuli nningaranni to pangpatujungku'.
2Parinawa tonganni to macca,
mupatuju lakoi kamapahangan to penawammu,
3peta'dako kamapahangan
mumetamba meta'da arannai mapahang tonganko,
4muangahhi butung to nnangah pera',
ba'tu butung to nnangah ewanan jiong litak mandalan.
5Ia ke mupugauk ngasanni joo,
la mupahang apa battuananna to ngkalaja' ngkasiri' Puang Allataala
muwa'ding nnissenni inda to Allataala,
6nasaba' Puang Allataala mbenki' kamaccan,
na pole jio mai kadan-Na to kapaissenan sola kamapahangan.
7Ia mpasadian pangtulungan lako tomaruruh penawanna,
Nabutung perisai llendungngi tote'da caccana.
8Da'tan njagai katuoanna totangmangpasilaenan,
na mparakai katuoanna to tonturu' pakkaeloran-Na.
9Iamo muwa'ding mapahang jiona kamakassingan, tangmangpasilaenan mumaruruh penawa,
umbopi la muissen umbo dikua tuo mangpanggaukan melo.
10La maccako,
na kapaissenanmu la mpamasannangko.
11Naparakaiko kamatarrusan pangpikkirisanmu,
najagaiko kamapahanganmu,
12dikua nadanggi' mumangpanggaukan gaja'
mupamambela kalemu jio mai tomajekkong
13to ssalai lalan maruruh,
nannola lako lalan kamalillinan,
14tomasannang mpugauk kagajatan,
tompumario nnuraga tau,
15totuli majekkong,
nalao sala.
16La maccako dikua mula'pah jio mai baine bandarang.
Danggi' muturu'i to bainena tau massede manggauk sala.
17Ia to baine susi joo ssalaimo muanena,
to nasialan tonna malolle'pa,
na te'da naingaranni to bassena tonna botting,
to mangka naakui jio olo-Na Allataala.
18Ia ke maleko lako bolana battuananna mangnguju lakoko kamatean,
pada una to mbawa kalemu lako lino tomate.
19Sininna to nturu'i to baine susi joo
te'damo nakullei pole la mangnguju lako lalan katuoan.
20Iamo joo, turu'i to panggaukanna tomelo penawa,
mualai palelean mata to tomakassing.
21Nasaba' ia to tomaruruh penawanna, iamo la ntorroi tana Nabasseanni Puang Allataala,
sininna to tote'da caccana la torro tarruh jio.
22Apa ia to togaja' la dilanynya'i llan mai joo tana,
na ia to totangdikatappa'i la diula'i llan mai.
Zur Zeit ausgewählt:
Kada Bulawan 2: mvpAD
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Wycliffe Bible Translators, Inc. All rights reserved.