Genesis 9
9
Akngeyel Noah renh ileyel, rarl atnyerr ilkwel atwey-angenh ywerrelhilemel aleth-antey
1Akngeyel Noah renh ilek, alerikw ikwerenh-rnem-akert, “Ampa akngerr atnyena ahern nhel, thip-rnem-then, ahernel alheyel-rnem-then, aker irrpeng-then. Ahern nhel akngerrirretyek ampa akngerr anetyek. 2Atnwenth ingkerr arrekantherrety ater irrayntem aneyenh, ahern nhel. Nga ingkerrenhek Atyetyart aneyenh. Atha ngenh arrernem Atyetyart nga anetyek, ahern-areny ingkerrenhek. 3Aker ntwa alhewer arlkwetyek, ingwerek-ingwer. Atha ngenh atnwenth ingkerrenh anthem, ntwa arlkwayntetyek. Kel, atha ngenh anthek amern ntwa arlkwayntetyek.
4Aker menty, arrkngewenyirremel ayntey. Iteth-antey, ra arrkngakert-anteyarl atnwenth ran. Nthakenh arrngeynp arlkwey-angenh. Arrknga thela ahern-warl, artwerretyilemel, aker arlkwey-alenty. 5Atnwenthel artwa anyent ipmek atwenty, artwa ingwerel ipmek arrpemarl atnwenth renh atwetyek. Artwa anyentel artwa ingwer ipmek atwenty, ipmek arrpemarl atwetyek.
6Artwa ingwerel atwem, angkep renh atwenhey arrpem. Atha ahern-areny ingkerrenh arrpmernek, atyeng-apeny ingkerrenh anetyek. 7Ntwa akngerr-anem ahern nhel ngkwenh-rnem atnyena! Artwa akngerr ntwa anetyek, ahern nhel artwa akngerrirretyek.”
8Akngeyel Noah ikwerenh-rnem-akert ilek, 9-11“Atha arrenhantherr ilem, Nhepenh-anyeman kwaty arrekantherr-warl atha tyarleweyang-anem, menty. Kel anyent-inger atha kwaty ilkwan tyarlewek, ingkerrenh atwetyek, ingkerrenh ahern nhek irrarlketyek. 12-13Mpwelarr ilkwa alkerek atha arrekantherr arrernem. Mpwelarr arrantherr alker-itwek aremel, arrantherr iterl-aretyek wetharl atha arrenhantherr ilek-angkwarr.
14Kwaty kwenpayel mpwelarr aremirrenty atha iterl-aremel atharl weth arrekantherr ilek-angkwarr. 15Nthakenh atha atnyerr ilkwel atwey-angenh ywerrelhilemel aleth-antey. Yanh-angkwarr atha ilek, nthakenh atwey-angenh. 16Atharl arem mpwelarr alker-itwel aremirrenty, atha iterl-aremarl atharl weth arrenhantherr ilerlelpek-angkwarr.
17Mpwelarr lwewarrernelheyel alkerel apmelerrarl atharl weth ilerl-alpek-angkwarr, arrantherr iterl-aretyek. Ilenh atyetyart impen anwantherr iterl-aretyek.” ...
Zur Zeit ausgewählt:
Genesis 9: aly
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
