Genesis 8
8
1Akngey ra iterl-antey-areyel, iylpelerleweyang New-rnem-then atnwenth-rnem-then. Akngeyel awer tyarlewek. Kwatyarl akelyirreynek ahern ingkerrenh artwerretyiletyek. Kel alakenh-anyem Akngeyel awer thwenek. 2Akngeyel arrkngert arrernek, kwaty ahern-they thelhelenhek. Akngeyel kwaty apeynt ywerrelhilek. Akngeyel kwaty alker-areny ywerrelhilek arrpemarl. 3Arlta 150-penh kwaty akelyant-anem ahernel rtnenh. Alkent 5-ek-atwety kwaty ra akely-anem irreynenh. 4Kwatyarl atnyerr ywerrekel, rtnwa ilkwa ra Ararat apwertel-anem arrernelhey-alpek. 5Alkent 10-penh apwert ingkerrenhan akethel-anem arem-anemirrek. Alkent 10-ek-atwetyarl rtnek-penh kwaty akelyirrek.
6-7Alkent anyent-penh Noah-el iwerr tyet altywerilek, ra aretyek. Noah-el thip anyent irrpwerl angerl thwenek. Noah arntarnt-arelhenh thip ikwer ra apey-alpentyek. Ahern artwerretyirreyek-atwety thip alkerel-antey alhenh. Alkerel-antey ra amperelenh, kwaty-antey ra arenh. 8Kwaty ywerreynentyek Noah ra thwenek thip pwelker-anem, kwaty ywerreynentyek ra aretyek. Thip anyent ra arrernelhetyekan ikwer arrangkwarl. 9Kwatyantarl ayntek. Ra apey-alpek arrpemarl, rtnwa ilkwa ikwer-warl. Noah-el thip anyent renh anterrkwey-ayntek, kwen arrpemarl akwernemel rtnwa ilkwa ikwer-warl.
10Arlta 7-penh, Noah-el pwelker anyent renh arrpemarl thwenek. 11Thip ra apey-alpek atwerrp, alperr anyent-akert-anem. Noah ra arek kwatyarl ywerr-anemirrek. 12Arlta 7-penh pwelker renh thwenek arrpemarl, ra arlta ikwerel apey-alpeyang ywerrey-alhek. 13Noah-el iwerr altywerilek-anem, rtnwa ilkwa renh ahern artwerretyirrenty aretyek. Ra arek ahernan atwerrety-anem. Noah-el arek kwatyarl kel-anem ywerreyneyel. 14Alkent atherr-penh ahernan ingkerrenh-angkwarr artwerrety-anem.
15-16Akngeyel Noah renh ilek, “Ngan ngkwenh-rnem-akert tyerr-anemelha, rtnwa ilkwa ilenh-theyan. 17Atnwenth ilenh-rnem-then thip-rnem-then ahern alheyel-rnem-then ingkerrenh tyarlewa rernem akngerr arrpemarl irretyek ahern nhel.”
18Noah rernem-tangkwel atwarrek rtnwa ilkwa ikwer-they. 19Atnwenth ingwerek-ingwer ingkerrenh atwarrek rtnwa ilkwa ikwer-they, amentew-ament.
20Noah-el apwert ilperr-ilperr arrernek, aker ampernetyek. Noah-el tyenkerr INGKART renh anthek, kwenirremel angkek. 21Akngeyel aker intenek mwerr-angker ikwakert. Rernemarl apmwel-areth aneyelek, ampa akely-penh, atha ahern apmweley-angenh-anem. Akngeyel renh ilek, “Atha ahern-areny-rnem nthakenh atwey-angenh weth atha atwek-apeny, menty-anem. Anyent-inger-antey athan irrarlkek. Akely-penh apmwangkwarr alkenhirreyelan, awaretyel.
22Atha ahern-areny ingkerrenh atwey-angenh-anem. Ahern nhenh intem-antey aynteyenh. Rernem amern lyapelheletyek, amern akwetyetyek. Ahern nhenh ywerrey-angenh arltel, ingwel, aherretyel, alyangkwel ywerrey-angenh. Ahern nhenh aherretyel ywerrey-angenh, ahern nhenh ingwel ywerrey-angenh. Ahern nhenh intem aneyenh ahern nhenh ywerreyek-atwety.”
Zur Zeit ausgewählt:
Genesis 8: aly
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
