LUKA 17

Sual

(Mt 18.6-7,21-22; Mk 9.42)

1Tin, Isuan a zirtîrte hnênah, “Tlûknate hi awm lo thei a ni lo; nimahsela, tlûkna awmtîrtu chung chu a pik e! 2Hêng mi tête zînga pakhat pawh tihtlûk ai chuan, a titlutu tûr nghâwngah chuan buh râwt sawmna lung awrhtîrin, tuifinriatah thlâk sela, a tân a ṭha zâwk ang.

3Fîmkhur rawh u: i unauvin thil a tihsual chuan zilh rawh; a inchhîr chuan ngaidam rawh. #Mt 18.15 4Ni khatah i chungah vawi sarih thil tisualin, vawi sarih, ‘Ka inchhîr e,’ tia i lama a lo hawi leh chuan i ngaidam tûr a ni,” a ti a.

Rinna

5Tin, tirhkohte chuan Lalpa hnênah, “Kan rin tiphui deuh vang che,” an ti a.

6Tin, Lalpa chuan, “Anṭam mu fang khat ang rin in neih chuan, he thingtheihmu kûng hnênah hian, ‘Lo inphawi la, tuifinriatah lo inphun rawh,’ in ti ang a, in thu a âwih mai ang.

Chhiahhlawh tih tûr

7Nimahsela, nangni zîngah tu pawhin lei letin emaw, berâm vêngin emaw bâwih nei ula, a lo sûl hâwn veleh, ‘Chaw rawn kîl nghâl rawh,’ tu nge lo ti ang che u? 8‘Ka ei tûr mi siamsak la, puan veng la, ka ei ka bâr zawh hma loh chu ka rawng mi bâwl rawh; chumi hnuah chuan nangin i eiin i bâr ang chu,’ tu nge lo ti zâwk lo vang che u? 9In thu anga a tih avângin in bâwih hnênah lâwmthu in hrilh ngai em ni? 10Chutiang bawkin nangni pawhin, in hnêna thupêk zawng zawng anga in tih hnuin, ‘Bâwih ṭhahnem lo kan ni e; kan tih tûr rêng a ni kan tih ni,’ ti rawh u,” a ti a.

Phâr sâwm tihdam

11Tin, heti hi a ni a, Jerusalem khuaa an kal dâwnin, Samari leh Galili ram chu a kal pêl a. 12Tin, khaw engah emaw a luh dâwnin, mi, phâr hlîr sâwmin an tâwk a; chu mite chu hla takah an ding a; 13tin, aw ring takin, “Isu, Zirtîrtu, min khawngaih rawh,” an ti a. 14Tin, ani chuan anmahni chu a han hmuh chuan an hnênah, “Puithiamte hnênah va inentîr tawh u,” a ti a. Tin, heti hi a ni a, an kal lai chuan an lo thiang ta hlawm a. #Lev 14.1-32 15Tin, an zînga pakhat chu a dam ta tih a inhriat veleh, aw ring taka Pathian fak chungin a kîr leh ta a; 16tin, a ke bulah a bawkkhup a, lâwmthu a sawi a; chu mi chu Samari mi a ni nghe nghe a. 17Tichuan, Isuan a chhâng a, “Mi sâwm kha in lo thiang ta a ni lâwm ni? Pakuate kha khawiah nge? 18He awze mi chauh lo hi Pathian fak tûra lo kîr leh an awm na nge?” a ti a. 19Tin, a hnênah, “Tho la, kal rawh; i rinna hi i dampui a nih hi,” a ti a.

Pathian ram thlen tûr thu

(Mt 24.23-28,37-41)

20Tin, Pharisaiten Pathian ram lo thlen hun tûr an zawh avângin an hnênah, “Pathian ram chu hmuh theihin a lo thleng lo ve; 21‘En teh u, heta hi!’ emaw, ‘Sawta saw!’ emaw an ti hek lo vang; ngai teh u, Pathian ram chu in zîngah a awm a ni,” a ti a, a chhâng a.

22Tin, zirtîrte hnênah chuan, “Mihring Fapa dam lai nite hi, ni khat tal hi in hmuh duh nite a la awm ang; nimahsela, in hmu tawh si lo vang. 23Tin, in hnênah, ‘En teh u, sawta saw!’ ‘En teh u, heta hi!’ an ti ang che u; kal chhuak suh ula, anni chu zui hek suh u; 24vân hnuai lehlama kâwl a phêta, vân hnuai lehlam thlenga a êng ṭhîn ang hian, Mihring Fapa hi a lo kal niin a awm dâwn si a. 25Nimahsela, chumi hma chuan thil tam tak a tuar ang a, tûnlai chhuante duh lohvin a awm bawk ang.

26Nova dam laia thil awmzia ang khân, Mihring Fapa a lo kal leh nite chuan a awm bawk ang. #Gen 6.5-8 27Nova lawnga a luha, tui a lo lêta, an zaa a tihhlum tâk vek ni kha a thlen hma loh zawng, an eiin an bâr a, nupui pasal an innei ṭhîn a. #Gen 7.6-24

28Chutiang bawkin Lota dam laiin a lo awm; an eiin an bâr a, an leiin an hralh a, an chîngin an sa ṭhîn a. #Gen 18.20—19.25 29Nimahsela, Sodom khua ata Lota a chhuah ni chuan, vân aṭangin mei leh kât a sûr a, an zain a tihlum ta vek a. 30Chutiang bawkin Mihring Fapa hi a rawn inlâr ni chuan a awm ang. 31Chumi nîah chuan tu pawh a sum in chhûnga awma, amah in chunga awm chu, chuh tûrin chhuk suh se; lova awm chu hâwng bawk suh se. #Mt 24.17-18; Mk 13.15-16 32Lota nupui hre reng rawh u. #Gen 19.26

33Tu pawh a nun humhimna zawng apiangin a chân ang a, tu pawh a nun chân apiangin a humhim ang. #Mt 10.39; 16.25; Mk 8.35; Lk 9.24; Joh 12.25

34Ka hrilh a che u, chumi zânah chuan khum pakhatah mi pahnih an awm ang a, pakhat chu kal bopuiin a awm ang a, pakhat chu hnutchhiahin a awm ang. 35Hmeichhe pahnih buh râwt sawmin an awm ang a, pakhat chu kal bopuiin a awm ang a, pakhat chu hnutchhiahin a awm ang,” #17.35 Kutziak bu ṭhenkhatah chuan châng 36 thu, “Mi pahnih lovah an awm ang a, pakhat chu kal bopuiin a awm ang a, pakhat chu hnutchhiahin a awm ang,” hi a chuang. a ti a.

37Tin, anni chuan a hnênah, “Lalpa, khawiah maw?” an ti a, an chhâng a.

Tin, ani chuan an hnênah, “Sa ruang awmna apiangah mulukawlhte pawh an awm ang,” a ti a.

Zur Zeit ausgewählt:

LUKA 17: MIZOVBSI

Markierung

Kopieren