MATTHAI 4

Jesuh kah Suek-halh Tawngna

(Mk. 1:9-11; Lk. 3:21-22)

1Tecoengah Muithla lawng Jesuh te Seitan kah suek-halhna tawng ham ramhum huhang la a ceh puei. 2Khawhin sawmlii yiin daai buh a mueh dawngah Jesuh tah a bung pawng poen. 3Tecoengah Seitan lawng ahih tengla law tih, “Nang he Pathen Capa tangtang la na awm atah, lungto thli he buh la coeng sak lah” a tina.

4Tede Jesuh lawng, “Caciim lawngah, ‘thlaang he buh bueng oen hing thai nawh, tede Pathen huikaa khui kalawng aka thoeng awl oen ni a hing’ ti;” a tina.#Daan 8:3

5Tecoengah Seitan lawng Jesuh te aciim Jerusalem khawpui kah Tempal bok-im imphu ah a ceh puei tih. 6Ahih tengah, “Nang he Pathen Capa la na awm tang atah sungpung thuk lah, metihtiah Caciim dawngah, ‘Pathen lawng amah kah vanthlaang hue te nang ham awl a peek vetih na khow pateng lungto dawngah na khuek nawh ham nang te a kut oen n'dawm u ai,’ tila awm” a tina.#Saam 91:11-12

7Jesuh lawngah, “Caciim lawng, ‘Bawipa na Pathen te noekdak boel, ti de lah koen,’ a tina.#Daan 6:16

8Tecoengah Seitan lawng Jesuh te a sanghlang tlaangsawm pakhat la a luui puei tih, dilai dawngkah ram boeih oen te ram kah a bawilenna boeih te a huh sak. 9Seitan lawngah, “Khuklu oen na cuengkueng tih kai he nan bok atah he thli boeih he kan pe ai,” a tina.

10Tevengah Jesuh lawng, “Seitan, atloela cet! Caciim lawngah, ‘Na Bawipa Pathen bueng te bok lang, amah kah bii bueng te bi peh,’ ti” a tina.#Daan 6:13

11Tecoengah Seitan lawng Jesuh te a ceh taak, vanthlaang thli law-u tih Jesuh te a bawm a ceem u.

Jesuh lawng Galili Ah Bii a Tawng

(Mk. 1:14-15; Lk. 4:14-15)

12Johan thawngim ah a thlaak u tite Jesuh lawng a yaak vengah Galili peng la cet. 13Ahih lawng Nazaret ah awm ohla Kapernaum khaaw ah awm hamla cet. Kapernaum khaaw tah Zebulun oen Naptali thlaangphun kah ram khui Galili tuilii keeng ah awm. 14He tila a awm he tah Tawngha Isaiah lawng a thui oepsoeh te asoepna ham ni. A thui oepsoeh tah,

15“Zebulun oen Naptali ram

Tuitunlii la cehna lawngpui,

Jordan tuiva khatben rall,

Gental thli kah ram Galili!

16Yiinna khuiah aka awm thlaang

boeih lawng aang abohlang

a huh u ai. Duekna yiin khuiah

aka awm thlaang boeih sawah

aangna va pai ai,” tila a thui te ni.#Isai 9:1-2

17Teveng tue kalawng ah Jesuh lawng, “Vaan ram tah ayoeica poen dawngah, na thawlhna yut u loeih,” tila phungthuina a tong cuek.

Jesuh Lawng Tuihawi Thlaang Palii A Khue

(Mk. 1:16-20; Lk. 5:1-11)

18Jesuh lawng Galili tuiliikeeng ah a yingyawi vengah tui aka hawi boeinau rawi Simon (Piter a ti u te) oen a manau Andru, tuilii ah lok oen nga a heeng hih te a huh. 19Jesuh lawng te rawi te, “Ka hu ah bang hih lah, thlaang tukung la kan coengg sak hih ai,” a tina. 20Ahih rawi lawng lok te a voeih pak tih a hu ah bang pahoei hih.

21Te kalawng cet phai tih thlaangtloe boeinau rawi Zebedi capa Jeem oen Johan te a huh. Te rawi boeinau tah ana pa Zebedi oen lowng khuiah awm haih tih lok a baw u. Te rawi te Jesuh lawng a khue; 22Te rawi lawng ana pa oen lowng te a ceh tak tih a hu ah bang pahoei hih.

Jesuh Lawng A Cang Puei, Phung A Thui, A Hoeih Sak

(Lk. 6:17-19)

23Jesuh tah Galili peng tawm ah cet tih Sinakok bok-im ah a cang puei, Vaan ram kawng Awlthang Theen a thui, thlaangtlo oen natna soeprep aka tlo thli te a hoeih sak. 24Ahih kawng awlthang te Siria ram pum ah thaang khok tih aka tlo thli, tlawhnatna oen patang raina soeprep aka khang, raaithe lawng a kuun thil thlaang thli, raaihum tlawhna aka tlo, aka khawn thli boeih te avan law puei u tih Jesuh lawng a hoeih sak boeih. 25Galili peng oen Dekapolis#4:25: Dekapolis ti he ‘Khaaw paha’ ti ngaihna ni. peng (khaaw paha a ti u peng), Jerusalem Judia peng oen Jordan tuiva khatben rall kah thlaangping broe lawng ahih hu ah bang u.

Zur Zeit ausgewählt:

MATTHAI 4: MCNT2006

Markierung

Kopieren